دوای هەڕەشەكانی ئەلێكساندەر لوكاشینۆی سەرۆكی بیلارووسیا كە رایگەیاندبوو ئەگەر یەكێتی ئەوروپا لەسەر سزادانی وڵاتەكەی سوور بێت ئەوا گازی سروشتی لەسەر سەرجەم وڵاتانی یەكێتی ئەوروپا دەبڕێت و زستانێكی سارد چاوەڕێیان دەكات، روسیاش لەلایەن خۆیەوە راستەوخۆ وتەكانی سەرۆكی بیلاروسیای بەوە وەسف كرد كە بۆ ئەم هەڕەشەیە نەگەڕاوەتەوە بۆ روسیا و روسیا وڵاتێكە هەمیشە پابەندی بەڵێنەكانی بووەو بەردەوام دەبێت لەسەر ناردنی گازی سروشتی بۆ یەكێتی ئەوروپا و پێویست ناگات كەس گومان بخاتە سەر روسیا بۆ دابینكردنی سەرچاوەی گازی سروشتی و جێبەجێكردنی رێكەوتنەكانی .
هەرچەندە لێدوانەكانی روسیا بارودۆخی هەڵكشانی بەهای گازی سروشتی هێوركردەوە بەڵام لەمەودوا یەكێتی ئەوروپا دەبێت بیر لەسەر چاوەی دیكەی سوتەمەنی بكەنەوەو بۆ گازی سروشتی دەبێت روو بكەنە رۆژهەڵاتی ناوەڕاست و هێڵی نوێی بۆری گازی سروشتی رابكێشن چونكە روسیا بەردەوام لەسەر چەندین دۆسێیە ململانێی لەگەڵ ژمارەیەك لەوڵاتانی یەكێتی ئەوروپا هەیە و لەگەڵ هەڵگیرسانی هەر بارگرژییەك بۆری گازی سروشتی نێوان روسیا و یەكێتی ئەوروپا دەكەوێتە بەر هەڕەشە.
یەکێک لەو هێڵانەی کە لە رێگەیانەوە رووسیا گاز رەوانەی ئەوروپا دەکات بەناوی " یامال-ئەوروپا"یە کە بە خاکی بێلاڕووس تێدەپەڕێت.
لەسەر بنەمای "سەرکوتکردنی ئۆپۆزیسیۆن" و " ساختەکاری هەڵبژاردنەکان" یەکێتیی ئەوروپا سزای ئابووریی بەسەر حکومەتی بێلاڕووس سەپاند، لە بەرامبەردا سەرۆکی بێلاڕووس هەڕەشەی کردنەوەی سنوورەکانی بە رووی کۆچبەران و رێگەخۆشکردن بۆ چوونیان بەرەو وڵاتانی یەکێتیی ئەوروپای کرد و لە سەرەتای ئەمساڵەوە هەزاران کەس روویانکردە ئەو وڵاتە و بەرەو پۆڵەندای هاوسنووری چوون و لە چەند هەفتەی رابردوودا و لەگەڵ زۆرتربوونی ژمارەی کۆچبەران پۆڵەندا سنوورەکانی داخست و قەیرانێكی مرۆیی گەورەی لێکەوتەوە .