وەزارەتی خوێندنی باڵا و توێژینەوەی زانستی حكومەتی هەرێمی كوردستان فەرمانێکی وەزاری تایبەت بە کەم کردنەوەى کرێى خوێندن لە زانکۆ و پەیمانگە حکومییەکان و تایبەتەکانى هەرێمى کوردستان دەرکرد.

بەپێی ئەم فەرمانە کرێى خوێندن لە زانکۆ و پەیمانگا حکومییەکان بە رێژەى (٤٥%) لە گشت قۆناغەکانى خوێندنى بەرایى و خوێندنى باڵا (پارالێل - ئێواران) کەم بکرێتەوە و بۆ زانکۆ و پەیمانگا ناحکومەییەکان کەم کردنەوەکە بەرێژەی ١٠%-٢٠% بێت.

 

شایانی باسە کەم کردنەوەى کرێى خوێندن لە زانکۆ و پەیمانگە حکومى و تایبەتەکان بەم شێوەیە دەبێت:

زانکۆ حکومییەکان : داشکانى ڕێژەى (٤٥%) لە کرێى خوێندنى (پارالێڵ) و (ئێواران)ى گشت قۆناغەکانى خوێندنى بەرایى و خوێندنى باڵا لە سەرجەم زانکۆ حکومییەکان و دامودەزگاکانى ترى وەزارەتى خوێندنى باڵا و توێژینەوەى زانستى بۆ ساڵى خوێندنى (٢٠٢١-٢٠٢٢).

 

زانکۆ تایبەتەکان: بەپێى ئەنجامەکانى ڕێزبەندى نیشتیمانى زانکۆکانى کوردستان دەبێت بەم شێوەى خوارەوە:

 

*  ئەو زانکۆیانەى دەکەونە گروپی   B، بە ڕێژەى (١٠%) کرێى خوێندن کەم دەکرێتەوە.

 

*  ئەو زانکۆیانەى دەکەونە گروپی  C، بە ڕێژەى (١٥%) کرێى خوێندن کەم دەکرێتەوە.

 

*  ئەو زانکۆیانەى دەکەونە گروپی  D، بە ڕێژەى (٢٠%) کرێى خوێندن کەم دەکرێتەوە.

 

*  سەرجەم پەیمانگە تایبەتەکان و کۆلێژە زانکۆییەکان بە ڕێژەى (٢٠%) کرێى خوێندنیان کەم دەکرێتەوە.