میشێل باچلێت کۆمیسیاری باڵای مافی مرۆڤی سەر بە نەتەوە یەکگرتووەکان لە لێدوانێكدا ڕوونی كردەوە کە نووسینگەکەی ڕاپۆرتێک لەسەر دەنگۆی پێشێلکارییە رژدەکانی مافەکانی مرۆڤ لە باکووری ڕۆژئاوای ناوچەی "شینگیانگ"ی چین تەواو دەکات، دەشڵێت زۆر نیگەرانم لەوەی کە نەتوانم راپۆرتێكی تێروتەسەل بدەم لەسەر بەرەوپێشچوونی ئەو هەوڵانەی كە دەیدەم بۆ گەڕان بە دوای دەستڕاگەیشتن بە هەرێمی خۆبەڕێوەبەری شینگیانگ ئۆیگۆر.

لەلای خۆشیەوە بەرپرسی بەرنامەو داکۆکیکار لە کۆنگرەی جیهانیی ئویگور لە میونشن جەختی لەوە كردەوە كە  نوێکردنەوەکە لەکاتی خۆیدایە و جێی بایەخە، هاوکاتیشە لەگەڵ سێیەمین ساڵیادی داواکاریی فەرمیی کۆمیسیاری باڵای نەتەوە یەکگرتووەکان.

جێگەی باسە میشێل باچلێت ئەو قسانەی لە سەروبەندی کردنەوەی مەراسیمی ئەنجومەنی مافەکانی مرۆڤی سەر بەنەتەوە یەکگرتووەکاندا كردو ئاماژەشی بەوە كرد كە نووسینگەکەی پێداچوونەوە بەو زانیارییانە دەکات کە لەبەردەستدان لەسەر دەنگۆکانی مافەکانی مرۆڤ و پلانی ئاشکراکردنیان تەواو دەکات.