د بیره‌وه‌ریا ئه‌نفالا بادیناندا:
ژیان طاهر زێوه‌ی
- پێدڤیه حكومه‌تا عیراقێ وێ به‌رپرساتیا دستوری یا كو لسه‌ر ملێت وێ جێبه‌جێ بكه‌ت و قه‌ره‌بویا كه‌س و كارێن قوربانیێن ڤێ تاوانێ بكه‌ت و ده‌ڤه‌رێن زیانڤێكه‌فتی ئاڤه‌دان بكه‌ت.
- ژ بۆ دوباره‌نه‌بوونا تاوانێن بڤی ره‌نگی پێدڤیه عیراق ببیته ئه‌ندام د دادگه‌ها نیڤ ده‌وله‌تی دا.
- زانكو و ئه‌كادێمیستێن مه وه‌ك ئه‌ركه‌ك ئه‌خلاقی و نیشتمانی هه‌می شیانێت خۆ بمه‌زێخن ژبۆ ئه‌نجامدانا ڤه‌كۆلینێن زانستی لسه‌ر ده‌رئه‌نجامێن وێ تاوانا ده‌رحه‌ق گه‌لێ مه هاتی ئه‌نجامدان و ب زمانێن بیانی و بتایبه‌ت زمانێ وولاتێن زڵهێز وه‌رگێرن.
- حكومه‌تا هه‌رێمێ سه‌رهاتیێن شاهد حالان ب دوكومێنت وه‌رگێڕنه سه‌رزمانێن بیانی و هه‌می وان به‌ڵگه و دیكومێنتێن لبه‌رده‌ست و خڕڤه‌بووی بشێوه‌كێ زانستی د موزه‌خانه‌كا نیشتمانی دا بپارێزن. هەروەسا برێیا حکومەتا عیراقێ پتر بزاڤێ بکەت بۆ ڤەگەڕندنا روفاتێن قوربانیان. جهێن مینا قەلعا نزارکێ بەلگێن حاشاهەلنەگرێن ڤێ تاوانێنە و سامانێ ڤی وولاتینە و پێتڤیە حکومەتا هەرێمێ ڤان جهان بکەتە دەرگەهێ ڕاکێشانا خەلکێ بیانی.
- سه‌ركردایه‌تیا سیاسیا كوردی هه‌می شیانێت خۆ بمه‌زێخیت بۆ رێكخستنا ره‌ڤه‌ندا كوردی و هه‌وڵێن ئه‌كتیڤكرنا وان بده‌ت لسه‌ر پرسێن نه‌ته‌وی. كۆمه‌ڵه‌یێن كوردی درست بكه‌ت كو بشێوه‌كێ نه‌ته‌وی كار بكه‌ن ژ بۆ ناساندنا وێ تاوانا بسه‌رێ گه‌لێ مه هاتی. برێكا وان كۆمه‌ڵه‌یان و هه‌ر وه‌سا درست كرنا لوبیان كاریگه‌ریێ لسه‌ر رایا گشتی یا جیهانێ بكه‌ن. كوڕ و سمیناران ب زمانێن وان وولاتان بگێڕن لسه‌ر ڤی بابه‌تی.
- روژنامه‌ڤان و سیاسه‌تڤانێن مه ژ لایێ رۆژنامه‌ڤانیڤه خۆ ڤپێش بێخن دا كو ده‌ستێ وان بگه‌هیته ده‌زگه‌هێن راگه‌هاندنێ ل وان وولاتان و رویدانان ب به‌ڵگه بێخنه به‌ر چاڤێن رایا گشتی یا جیهانێ.
- ره‌ڤه‌ندا كوردی هه‌وڵ بده‌ت بچیته دناڤ پارتێن سیاسیێن وولاتان دا و خۆ بگه‌هیننه ئاستێ بلندێ سیاسیێ وان وولاتان ئو ببنه ده‌نگێ گه‌لێ خۆ. هه‌روه‌سا زاروكێن خۆ لسه‌ر بنه‌مایه‌كێ نیشتماندوستی په‌روه‌رده بكه‌ن و هزرا نه‌ته‌ویا وان به‌رز بكه‌ن دا كو ئه‌و ژی سه‌ركه‌فتنێن سیاسی و ئه‌كادێمیێن خۆ بێخنه د خزمه‌تا ناساندنا وێ تاوانا بسه‌رێ گه‌لێ مه هاتی دا كو بشێن كاریگه‌ریێ لسه‌ر رایا گشتی یا وان وولاتان و هه‌روه‌سا سیاسه‌تمه‌دارێن وان بكه‌ن.
درود و سلاڤ بۆ سەرگیانێ پاکێ هەمی قوربانیێن کۆمکۆژیا بادینان و تەڤایا شەهیدێن رێیا ئازدیێ.
سەرشوڕی بو دوژمنێن مروڤاتیێ.
