غیاس خالد زێباری
وەکی ئەڤرۆ بەری ( ٤٥ ) ساڵا ل (٢٦) ێ گوڵانا سالا ١٩٧٦ وەرچەخانەکا ھەرە مەزن د دیرۆکا بزاڤا رزگاریخوازیا کوردستانی ھاتە کرن ، ئەو ژی بەرپاکرنا شۆڕەشەکا مەزنا کوردستانی ب رێنمایی یێن نەمر مەلا مستەفای بارزانی رێبەرێ دیرۆکی و کنیاتیێ گەلێ کورد و ب سەرپەرشتیا سەرۆک مەسعوود بارزانی و پارتی دیمکراتی کوردستان بناڤێ شۆڕەشا ( گولانێ ) .
گوڵان بەری شۆڕەشەکا چەکداری و جڤاکی و مرۆڤایەتی بیت بەرسڤەکا بھێز و لدەمێ خۆدابوو بۆ پشکدار و چاڤدێرێن پیلانا نیڤ دەولەتی و خیانەتکاریا رەشا جەزائیر دژی بزاڤا رزگاریخوازیا کوردستانی و شۆڕەشا مەزنا ئیلۆنێ ب رێبەریا بارزانی نەمر و پارتی دیموکراتی کوردستان ، بتایبەت رژێما دکتاتۆری و ستەمکاریا بەعسا عیراقێ ، چونکی پشتێ وێ پلانا نیڤ دەولەتی دوژمن و نەیارێن بزاڤا رزگاریخوازیا کوردستانی و نەیار و دوژمنێن ناڤخۆیی ژی خۆ پشتراستکر کۆ پارتی دیموکراتی کوردستان نە تنێ ل پێشەوایەتیا بزاڤ و شۆڕەشێن کوردستانی دوورکەفت بەلکی باوەری بۆ خۆ چێکر کۆ پارتی دیموکراتی کوردستان شیانێن خۆ رێکخستنەڤەکا بچیت نامینیت و دێ ھێتە حەلیان و پارچەپارچەبوون ، وەکی ھندەک پارتیێن کوردستانێ یێن نھۆ بەرامبەر روودان و گۆڕانکاریا خۆ ڕاناگرن و دێ ھێتە دابەشکرن .
لێ ب پشتەڤانیا خەلکێ دلسۆزێ کوردستانێ یێ خودان ھەستەکا بلندا نەتەوی و نشتیمانی و پەروەردەبوویی ل شۆڕەشا مەزنا ئیلۆنێ و ب لێزانینی و دووربین و رێنمایی یێن نەمر مەلا مستەفای بارزانی و سەرکردایەتیا پارتی ب سەرپەرشتیا سەرۆک مەسعوود بارزانی ھیڤی و ئارمانجێن وان کرنە خەون و ھەر زوو بسەر وێ پیلانا نیڤ دەولەتی زاڵ بوو و ب بەرپاکرنا شۆڕەشا گۆڵانێ ل ٢٦/٥/١٩٧٦ ھیڤی ئۆمێد بۆ خەلکێ کوردستانێ زڤراندنەڤە و پارتی دیموکراتی کوردستان لسەر رێبازا پیرۆزا بارزانی بسەردەمانەتر و رێکخستیتر و بھێزتر بەردەوامی دا پێشەوایەتیا بزاڤا رزگاریخوازیا کوردستانی و سەرکەفتن و داستانێن مەزن ژلایێ لەشکر تۆمارکرن .
ژبلی ڤان سەرکەفتن و داستانا ھەلسەنگاندنەکا ھەمەلایەنە بۆ شۆرەشا ئیلۆنێ و خالێن ئەرێنی و نەرێنی و نەخشە و پلانا داھاتی ل کۆنفرانسێ بەرلین لرۆژێن ( ١١ ـــ ١٦ / ٨/١٩٧٦ ) ھاتنە دەست نیشانکرن و دارشتن و سەرکردایەتیا دەمەکی ب سەرۆکاتیا سەرۆک مەسعوود بارزانی ھاتە راگەھاندن ، بڤی رەنگی پارتی ب شۆڕەشا گوڵانی بەرسڤا پیلانا خیانەتکاریا نیڤ دەولەتیا جەزائیر دا .
گوڵان شۆڕش بوو چونکی شیا گۆِڕینین سیاسی و جڤاکی ئەنجام بدەت و خەلکەکێ زۆر ژی لخۆ کۆمکر ، کۆ مەرجێن سەرەکی یێن شۆڕەشا نە ، ژلایێ لەشکری پێشمەرگەھێن شۆڕەشێ کرنە خودان باوەری و ئیرادەیەکا موکۆم کۆ بشێن ب شیانێن کێم یێن ماددی و چەکەکێ سادە بسەر لەشکرێ دەولەتا عیراقێ یێ خودان چەکەکێ پێشکەفتی سەرکەفتنێن مەزن بدەست بینیت و چەندین دەڤەرا رزگار بکەت .
ژلایێ رێکخستنێن پارتایەتی ژی پارتی و شۆڕەشا گوڵانێ شیا شانەیێن پارتایەتی لسەرتاسەرێ ھەرێما کوردستانێ و زۆر دەڤەرێن عیراقێ ژی بەڵاڤ بکەت و دناڤ جەرگێن سازیێن ئێنماھی و ھەواڵگیریا رژێمێ چالاکیێن پارتایەتی ئەنجام بدەت و بەڵاڤۆکێن پارتایەتی و شۆڕەشێ درێکا رێکخستنێن خۆ یێن ھەری وێرەک بگەھینتە بەغدایا پایتەخت نەخاسمە ل کولیج و پەیمانگەھان ، برەنگەکێ گشتی پارتی رێکخستنەکا پۆلایین و وێرەک پێک ئینا کۆ رۆلێ وان چ جارا ل پێشمەرگەھێن سەرنگەری کێومتر نەبوو .
ژلایێ جڤاکی ژی شۆڕەشا گۆڵانێ جەماوەرەکێ ھەرە زۆر لخۆ کۆمکر کۆ دبوارێن رەوشەنبیری و ھۆنەری و کلتۆری و ئەدەبی ل بەرەڤانیکرنێ و ناساندنا شۆڕەشێ و بزاڤا رزگاریخوازیا کوردستانی و داخازیێن ماف و ئارمانجێن نەتەوی و نشتیمانی پێشمەرگەھێن ڤەشارتی بوون، پەروەردەکرنا خەلکێ کوردستانێ لسەر گیانێ خۆبەخشیێ بۆ پشتەڤانیا شۆرەشێ شۆرەشەکا بچیک بۆ دناڤ شۆڕەشا گوڵانا پێشکەفتنخواز ، چونکی ب ھزاران گەنج و لاوێن کورد وەکی پێشمەرگەھێن بەرگری ملی مل بملی پێشمەرگەھی د سەنگەرێن بەرگریێ دا بوون و دناڤ جەرگێ دوژمنی ژی ب ھزاران خەلکێ کوردستانێ ب خۆبەخشانە ب دابینکرنا چەک و تەقەمەنی و پێتڤیێن ساخلەمیێ و خارن و جلوبەرگا ، گەھشتبوویە وی ئاستی بریندارێن پێشمەرگەی ب نھێنی دمالێن خۆدا سارێژدکرن و ھندەک جاران گیانێ خۆ دئێخستە مەترسیەکا دژوار د خەستەخانێن رژێمێ دا سارێژ دکرن .
ئەو ھەست و رێکخستن و پلانێن شۆڕەشا گوڵانا پێشکەفتنخواز فاکتەرێن سەرەکی بوون بۆ سەرگرتنا سەرھەلدانا پیرۆزا سالا ١٩٩١ ێ و بدەست ڤەئینانا دەسکەفتێن ئەڤرۆ یێن خەلکێ کوردستانێ و دامەزراندنا قەوارێ ھەرێما کوردستانێ