«جیهان، بەتایبەتی رۆژهەڵاتی ناوەڕاست، لە بەردەم لێكتێگەیشتنیكی نوێدایە.» ئەمە قسەی سەرۆك وەزیرانی عێراق (عادل عەبدولمەهدی)یە، كاتێ وەڵامی پرسیارێكی دایەوە سەبارەت بە ململانێی نێوان ئەمریكا و ئێران و كاریگەریی ئەو ململانێیە لەسەر عێراق. من لەگەڵ قسەی سەرۆك وەزیرانم، بەڵام لەگەڵ نموونەكانی نیم، كاتێك كۆریای باكوور و یەمەنی كردە نموونە، ئێران لایەن نییە لەو لێكتێگەیشتنەی كە لەو دوو وڵاتەدا روودەدات، چونكە یەكەمیان پەیوەندیی بە سزا ئابوورییەكانی ئەمریكا و ئامادەیی كۆریای باكوور بە وازهینان لە بەرنامە ئەتۆمییەكەی بەرامبەر بە هەڵگرتنی سزاكانەوە هەیە، دووەمیشان پەیوەندیی بە فشارە نێودەوڵەتییەكانەوە هەیە، لەژێر سایەی ئەو لێكتێگەیشتنەدا، زەرەرمەندی یەكەم عێراق دەبێت، چونكە لە هەردوو باردا (لێكتێگەیشتن بێت، یان ململانێ)، هەر عێراق زەرەر دەكات. عێراق بەشێك نییە لەو لێكتێگەیشتنە، چونكە لاوازترین دامەیە لەچاو دامەكانی دیكەدا. عێراق پاش ساڵی 2003 كەوتە ژێردەسەڵاتی دوو وڵات، ئەمریكا و ئێران، سەرەتا لێكتێگەیشتنێك لەنێوان ئەو دوو وڵاتەدا هەبوو، ئەوە بوو دەستی ئێران لە عێراق واڵاكرا، شیعەی عێراق دەبێت باش لەوە تێبگات، كە ئێران تەنیا لەگەڵ بەرژەوەندییەكانی خۆیەتی، كاتێك شەڕ لەنێوان ئەرمینیا و ئازربایجانی شیعی روویدا، ئێران پشتگیریی ئەرمینیای مەسیحی كرد، چونكە بەرژەوەندییەكەی ئەوكات وای دەخواست، ئێران زەرەرێكی زۆری كرد، بە هۆی سزاكانی ئەمریكاوە، بۆیە ئێستا گوێمان لە هەندێك دەنگی ئێران دەبێ، كە لە پرسی نوێدا رێككەوتنێكی نوێ بكرێت لەگەڵ ئەمریكا، یان ئیزافەكردنی پاشكۆیەك بۆ رێككەوتنە كۆنەكە، ئەویش بەرامبەر بە هەڵگرتنی سزا ئابوورییەكان، هێشتا ئێران بە هۆی هەندێك «ئیستیسنا» تووشی هەڵوێستێكی زۆر ناخۆش نەبووە، بەڵام پاش شەش مانگ كاریگەریی خراپی ئەو سزایانە زۆر بە زەقی بەدیار دەكەون، كە لەوانەیە ئابووریی ئەو وڵاتە بگاتە رادەی هەرەس. من پێموایە ئێران بەر لەوەی بگاتە ئەو ئەنجامە دەست بە وتووێژ دەكات، چونكە پێگەی وتووێژەكەی ئەگەر ئێستا بیكات، زۆر بەهێزترە لەوەی پاش شەش مانگی دیكە بیكات، كە حەتمەن ئەوكات چەند مەرجێكی دیكەشی دەخرێتەسەر، یاریزانە ئێرانییەكە باش لەم زانستە تێ دەگات، بۆیە ئامادەیە لەپێناو گەیشتن بە رێككەوتنێكی كۆتایی دەست بە وتووێژی نوێ بكات.