كوردستان لە وەرچەرخانێكی جۆریی نوێدا

كوردستان لە وەرچەرخانێكی جۆریی نوێدا
سەرەتای ناوەڕۆكی ئەم نووسینە وامان لێدەكات نەختێك ئاوڕ لە رابردوویەكی نە چەندان دوور بدەینەوە و ئەو مێژووە ببەستینەوە بە ئێستاوە، چونكە بەشێكی زۆری رووداوەكان درێژكراوەی رووداوگەلێكی ساڵەهای ساڵی بەر لە ئەمڕۆن و ئێستاكە چەند بارە دەبنەوە و تەنیا رەنگ و ئامڕازە بەكارهاتووەكانی جیاوازن، ئەویش بە گوێرەی ئەو پێشكەوتنانەی لە رووی سیاسی، كۆمەڵایەتی و تەكنۆلۆژیادا بەدی هاتوون.
گەڕانەوەیەك بۆ مێژوو
كێشەكانی كوردستان تا ساڵی 1514و جەنگی چاڵدێران بەردەوام كێشەی سەفەوییەكان و عوسمانییەكان بوون، بەڵام لەسەر خاكی كوردستان هێزەكانیان رووبەڕووی یەكتر دەبوونەوە، كەم نەبوون ئەو جارانەی كە خودی كورد دەبوونە هۆی هەڵایسانی شەڕەكان و، هەروەها دووبارە خەتكێشانەوەی سنوورەكانیش هەر لەسەر خاكی كوردستان بووە، دوای هەر رێككەوتنێكی نێوان ئەم دوو دەوڵەتە و گۆڕانكاری لە سنوورەكانیاندا كێشەی نوێی بۆ كورد دەخوڵقاند، بێ لەمەش جۆری ژیانی كورد لە رووی ئابوورییەوە هۆكارێكی دیكەی هەڵگیرسانی شەڕەكان بوون، بەڵام تاكو ئێستاش پاشماوەی ئەم دوو دەوڵەتە و دوای ئەوانیش عەرەبەكانیش كەوتنە هەمان هەڵەوە.
ئەم دەوڵەتانە چەندین جار بە دووقوڵی رێككەوتوون، بەڵام بۆ تەنیا جارێكیش بیریان لەوە نەكردەوە لەگەڵ كورد رێكبكەون، ئینجا لە نێوان خۆیاندا رێكبكەون. ئەم مێژووە هەر لە جەنگی (چاڵدێران و ئەرزەڕۆم)ـەوە بگرە تا دەگاتە جەنگی 8 ساڵەی ئێران و عێراق، هەر لە رێككەوتنەكانی دوای جەنگی چاڵدێران و رێككەوتنی ئاماسیە 29-5-1555 و پەیمانی زەهاو لە ساڵی1639و پەیمانی ئەرزەڕۆمی یەكەم و دووەم و پڕۆتۆكۆلی تاران ساڵی 1911 و پڕۆتۆكۆلی ساڵی 1913 رێككەوتنی ساڵی 1937ی نێوان ئێران و عێراق و رێككەوتنی شوومی ئەلجەزائیر لە ئازاری ساڵی 1975، زۆر جەنگی دیكەو رێككەوتنی دیكەش هەبوون، بەڵام جووڵەپێكردنی هێڵە سنوورییەكان ئێستاش جێگیر نەبوون و كێشەیان لەسەرە، چونكە راستییەكەی هیچ كام لەو دەوڵەتانە خاوەنی ئەو خاكە نین كە مامەڵەی رێككەوتنی لەسەر دەكەن و پرسیش بە خاوەنەكەی نەكراوە، جگە لەوەی دەستی دەرەكی لەو نێوەندەدا زۆر درێژكراوەتە سەر ئەم بابەتە و گرێ كوێرەی زەبەلاحی لێ دروست بووە كە نە بەدەست و نە بە ددان ناكرێنەوە.
دەوڵەتەكانی عوسمانی و سەفەوی و عەرەبییەكانیش پێكەوەو بە جودایش هەوڵی لێكترازانی پێوەندییەكانی نێوان خودی كوردان و بەگژیەكترییەوە نانیان داوە، لە كۆندا مەزهەب رۆڵێكی گەورەو دیاری هەبوو لە خۆشكردنی ئاگری شەڕ و بە گژیەكداچوونەكاندا و لەسەردەمی نوێشدا زەمینەی لێكترازانی پێوەندییە سیاسی و رێكخستنەكانیان خۆش دەكرد و بەردەوام لە پێناو بەرژەوەندییەكانی خۆیاندا بۆ هێشتنەوەی ئەو ئەو بەشەی كوردستان كە لە ژیردەستیاندا بمێنێتەوە، هیچ پرنسیپێكی ئایینی و فیكری و ئەخلاقییان لەبەر چاو نەدەگرت، تا وای لێ هاتبوو كورد كەمتر سیاسەتی لە پێناوی خودی خۆی و بەرژەوەندییە باڵاكانی نەتەوەیی و نیشتمانییەكەیدا دەكرد، بەشی زۆری ئەم بەرۆكی یەكتری گرتنە، كوردی لە چارەسەرەی كێشەی سەرەكی دوور دەخستەوە و دەبووە بەرهەم بە ئاراستەی بەرژەوەندییەكانی ئەو دەوڵەتانە.
حزب و رێكخراوە سیاسییەكانی بە لۆكاڵی و لە چەند ناوچەیەكی دیاریكراوی جوگرافیای كوردستاندا و وەك نوخبەیەك لەسەر ئاستی كۆمەڵایەتی و دەستكورت لە رووی ئابووریدا دەهێشتەوە، هەربۆیە حزب و رێكخراوە سیاسییەكان یەك لە دوای یەك دروست دەبوون و دەتوانەوە. كە ئەمەش بەرەنجامی سیاسەتی ئەو دەوڵەتانە بوو كە كوردستانی بەسەردا دابەشكرابوو، ئەم سیاسەتەیان تا هەشتاكانی سەدەی رابردوو، هەوڵی بە كۆمەڵ و بە تەنهای دەوڵەتەكانی دەوروبەری كوردستان بووە، لەلایەكی دیكەش بەردەوام هەموویان هەوڵیان بۆ ئەوە بووە، هاوشانی دانانی ئابلۆقەی ئابووری بۆ ئەوەی پارچەكانی كوردستان دوور لە پێشكەوتنەكانی تەكنەلۆژیا بە دواكەوتوویی بمێننەوە، لە هەمانكاتدا هەمیشە ئابلۆقەی فێركردن و مەعریفییان لەسەر كوردستان فەرز كردبوو، ئەمەشیان بە یاسای دەوڵەتەكانیان كردووە و لە رێگەی دەزگا داپلۆسێنەرەكانیان و خۆفرۆشەكانیانەوە جێبەجێیان كردووە، بەڵام هەموو ئەو هەنگاوە شەرمەزاركراوانە و ئەو كارەساتە خوێناوییانەی دروستیان كردن، بەری بە بەرگری و خۆڕاگریی كوردان نەگرت و كورد قۆناغ بە قۆناغ لە بیستەكانی سەدەی رابردووەوە دەنگ و هیزی نوێ و سەردەمییانەی بەرهەمهێناوە و هاوشان لەگەڵ پێشكەوتنەكانی جیهان و كرانەوە لە هەموو روویەكەوە و گەیشتن بە سەردەمی گلۆبالیزم، سیحری هەموو پلانەكانیان یەك لەدوای یەك بەتاڵ بوونەوە و رەونەق و كاریگەریی جارانی لەلای كورد نەما. لەمەش زیاتر زۆربەی ئەو پلانانەی بۆ كوردیان داڕشتبوو، بۆ خودی خۆیان بوون بە ئاستەنگ و گۆڵمەزی زل زلی لە ناوچەكە لێ دروست بوو، هاوكێشە و پێوەندییەكانیش ئاڵۆگۆڕی لێ پەیدا بوو، هەروەها ئاڵۆزی نوێش پەیدابوون.
بڕیاری بوێرانە وەرچەرخانی
بە ئاراستەی راست دروستكرد
هەر چەندە كورد تا ناوەڕاستی نەوەدەكانی سەدەی رابردوو بە قۆناغێكی سەخت و دژواردا تێپەڕی و بەدەر نەبوو لەو ئاڵۆزییانە، بەڵام كە بەشێك لە حزبەكانی كوردستان سەركردایەتییەكانیان بڕیاریان دا سیاسەت بۆ كورد و لە پێناو كوردا بكەن، ئاڵۆزییەكانی كوردستان خاوتر بوونەوە و هاوكێشەی نوێ لە ناوچەكە بە گشتی دروستبوون.
كاتێ سەرۆك مسعود بارزانی لە ساڵی 1991 بەو پەڕی حەماس و بوێرییەوە رایگەیاند كە دەبێ شەرعییەتی شۆڕشگێڕی بگۆڕین بۆ شەرعییەتی یاسایی و دەسەڵات دەبێت بگەڕێتەوە بۆ گەل و تەنها گەلی كوردستان ئەو مافەی هەیە كە بڕیار بدات، دەیەوێت چۆن بژی، ئیدی وردە وردە سیاسەتكردن بۆ بەرژەوەندی كورد و كوردستان وردە وردە رێگەی خۆی گرتبەر، ئەم رێگەیە راستە بێ هەوراز و نشێو نەبوو، رێگەیەكی پڕ مەترسیش بوو، بەڵام لەبەر ئەوەی رێگەیەكی راست و دروست و تەندروست بوو، وێڕای ئەو ئاستەنگانەشی هاتەڕێی، بەڵام سوور بووین لەسەر بڕینی ئەو رێگەیە، لەبەر ئەوەی گەڕانەوە بۆ دواوە بێجگە لە خۆكوشتن شتێكی دیكەی تێدا نەبوو.
ئەم هەنگاوانە بۆ سیاسەتكردن لەگەڵ ئەوەی بە بەراورد بە گەلانی پێشكەوتوو سەرەتایی بوون، بەڵام بۆ ناوچەكە هەنگاوی مەزن بوون، راستە سارد و خاو بوون، بەڵام گەرمی و هێزیان لە بەردەوامییان وەردەگرت، بەمەش كورد و تەواوی كوردستانییەكان گەیشتنە ئەو ئاستەی كە بڕوای ئەوەیان لا دروست ببێ، دیموكراسیەت وەكو سیستەم بۆ كوردستان و وڵاتانی دیكەش سووبەدخش دەبێ.
بڕوابوون بە دیموكراسیەت
وەرچەرخانی گەورتر دروست دەكات
پارتی دیموكراتی كوردستان بە سەرۆكایەتی مسعود بارزانی لە روانگەی تێگەیشتن لە چەمكی دیموكراسیەت وەكو سیستەم و زانینی ئەوەی كە ئەو كۆمەڵگە مەدەنییانەی ویستوویانە لە هەموو روویەكەوە زیاتر پێشبكەون، دەسەڵاتی زێدەتر دەبەخشنە سیستەمە دیموكراسییەكە، بەمەش پێشكەوتنی نوێتر و زیاتر بەدەست دەهێنن و، لە سایەی ئەو پێشكەوتنە جۆراوجۆرانەشدا ژیانێكی شایستە بۆ گەلەكەیان دەستەبەر دەكەن و دەبنە گەمەكەرێكی دیار لە داڕشتنی سیاسەتی نێودەوڵەتی و، هەر ئەم شێوە گەمەكردنە و بەشداربوونەشە دەبێتە زامنی ئاسایشی نەتەوەییان. بۆیە پارتی دیموكراتی كوردستان بە كۆمەڵێك بەرنامەی سیاسی و ئابووری و كۆمەڵایەتییەوە، بزوێنەری لۆكۆمۆتیڤی شەمەندەفەرەكەی بەهێز و خێراتر كردو بەرپرسیاریەتی شۆفێرییەكەشی بە هەموو مەترسییەكانیەوە گرتەئەستۆ.
سەرۆك مسعود بارزانی لەم ئاراستەیەدا رۆڵی گرنگی گێڕاو هەموو تاوی هەستان و خێرایی و لەسەرەخۆبوونەكەی زۆر بە چاكی رێكخست و وەكو سەرۆكی وڵات لە شوێنی خۆیدا نەترسانە زۆر دیواری شەرم و ترسی رووخاند، ئەمە وێڕای رەخنە و توانج و رێگرییەكی زۆریش كە لەسەر رێگەی هەبوو، بەڵام هەر بابەتێك لە شوێن و كات و قۆناغی خۆیدا بەكارهات و بەرهەمەكەش ئێستا پێگەیشتووە، ئەگەر بزانین بە شارەزایی و مەوزوونییەوە لێی بڕوانین، ئەوا سوودێكی زۆر نەك هەر بە كوردستان دەگەیەنێ، بەڵكو هەموو ناوچەكە و جیهانیش لێی بەرهەمەند دەبێ.
كوردستان لە ناو ئەتڵەسی وزەی جیهانیدا
جیگەی خۆی كردووەتەوە
نەوتی كوردستان بە درێژایی مێژوو لە بری ئەوەی خێر و بێر بێت بۆ هەموو كات هۆكارێك بووە و جەستەی كوردستانی سووتاندووە، بەڵام لە سایەی پیادەكردنی سیاسەتێكی دووربینانەی حكومەتی كوردستان و سەرۆكەكەی هەڤاڵ نێچیرڤان بارزانی كە خاڵە لاواز و بەهێزەكانی ئەم پرۆسەیەی گرتە ئەستۆی خۆی، زۆر جوامێرانە گەرووی كوردستانی لە دەستی ملهوڕ و توتالیتار و مەزاجییەكان دوورخستەوە، وەك سەرۆك حكومەتێكی لێهاتوو هێزی وەبەر جەستەی فەرامۆشكراوی نێو ئەتڵەسی جوگرافیای نێو دۆسیەی سەر مێز و رەفە تۆزلێنیشووەكانی ژووری سیاسی و دەسەڵاتدارانی وڵاتان هێنایەوە و بە سەركەوتنی لە پرۆسەی دەرهێنان و هەناردەكردنی نەوت، كوردستانی لەسەر نەخشەی وزەی جیهاندا چەسپاند.
هێزی بەرگری و ئەمنیی كوردستان هاوتەریب لەگەڵ هێزی دیبلۆماسییەت و هێزی ئابووری، بووە هاندەر و جورئەتی بەخشی بە كۆمەڵێك كۆمپانیای زەبەلاح تا سەرمایەكانیان بڕژێننە سەر خاكی كوردستان، چونكە دەیانزانی دامودەزگا ئەمنییەكانی كوردستان زامنی پاراستنی رەنجی پێشوو و سوودەكانیان دەبن.
بەرهەمی بڕوابوون
بە سیستمی دیموكراتی
پێشتر كە ئاماژەم بە بڕوابوون بە سیستمی دیموكراتی كرد، بەوەی وەرچەرخانی گەورە لە ناسنامەی نەتەوەكان دروست دەكات و دەبێتە بەشێك لە ئاسایشی نیشتمانییان، مەبەستم تەنیا لایەنی ئابووری و دیپلۆماسی نەبوو، بەڵكو ویستم ئاماژە بەوە بكەم سیستەمی دیموكراسی لێكحاڵیبوون، یا لێكتێگەیشتن و یەكتر قبووڵكردنی سیاسی و نەتەوەیی و ئایینی و مەزهەبی دەخوڵقێنێ و تەبایی و یەكڕیزیی ناوخۆیی لێ دروست دەبێ، لەسەر ئەم بنەمایە شەرعییەتی بڕیار درووستكردن و سەروەریی یاسا وەكو دوو كۆڵەگەی دیار لە تایبەتمەندییەكانی كۆمەڵگەی مەدەنی و پێشكەوتووەكان بەرجەستە دەبن، هەروەها رێزگرتن لەو شەرعییەتە ئاشتیی كۆمەڵایەتی دەپارێزێ و رایەڵەی پێوەندییە دەرەكییەكانمان بۆ ناوچەكە و جیهان بەهێزتر دەكات.
لەناو ئەم سیستەمەدا هاووڵاتی هەست بە بوونی خۆی دەكات و خەمخۆرانە و بەرپرسانە، پاراستن و بەڕێوەبردنی وڵات بە ئەركی خۆی دەزانێ و بەرەنگاری هەموو جۆرە جیاكەرییەك پەیوەست بە نەتەوەیی و رەگەزی و ئایینی و مەزهەبی دەبێتەوە.
پارتی و رێبازی بارزانی بە درێژایی 68 ساڵ لە تەمەنی خەبات و بەرخۆدانیدا، دیموكراسییەتی بە چارەسەری كێشەكان و كۆتایی هێنان بە ئاڵۆزییەكان زانیوەو لە پێناوی تەبایی و ئاسوودەیی كوردستانییەكاندا هەنگاوی لە كات و شوێنی خۆیدا ناوە و زۆر زوو دركی بە مەترسییەكان كردووە و هەوڵی داوە رێڕەوی مامەڵەكان بەرەو هەڵدێر نەچێت و بەری رەنجی دەیان ساڵەی كوردستانییەكان بەفیڕۆ نەڕوا، بۆیەش شێلگیرانە مكوڕ بووە لەسەر پیادەكردنی سیستەمی دیموكراسی و ئەم مكوڕبوونەی پارتی و سەرۆك مسعود بارزانی لەسەر رێبازێك كە پێكەوەژیان و رێزگرتن و كرانەوەی بە رووی پێشكەوتنەكاندا تێدا مسۆگەر دەبێ و ژیانی كەمینە نەتەوەیی و ئایینی و مەزهەبییەكانی تێدا پارێزراو دەبێ و نرخی مرۆڤەكان لەسەر بەهای مرۆڤبوون و توانا و بەرهەمیان سەیر دەكرێت، نەك لەسەر رەنگ و رەگەز و ئایین و نەتەوە، ئەوەی كە لە دنیای ئەمڕۆدا كۆمەڵێك پەیماننامە و میساقی نێونەتەوەیی لە پێناویاندا دروستكراوە و نووسراوە.
كاتێ كە حزب و سەركردەیەك بەرەنگاربوونەوەی تیرۆر و دابینكردنی ئاسایش دەخەنە دووتوێی بەرنامەكانیانەوە، خۆشەویستی و بڕوا دروست دەكات و بەرپرسیاریەتییەكی مرۆڤدۆستی دەگرێتەئەستۆ، كاتێك حزبێك و سەركردەیەك پاراستن و دابینكردنی مافی نەتەوەكانی دیكەش دەگرێتەئەستۆ وەكو بەرپرسیاریەتی نەتەوەكەی خۆی، دەبێ رەنگدانەوەی باوەڕی هزری دیموكراسی بێت، بۆیەش لەسەرتاسەری ناوچەكەش و جیهاندا بەرز دەینرخێنن و لە هاوكێشەكاندا بایەخ و نرخی خۆیان دەبێت، هەروەكو لە چارەسەری كێشەكاندا رۆڵی گرنگی دەبێت.
ئەم وەرچەرخانە جۆری و نوێیە
پێویستی بە یەكڕیزییە
ئەو وەرچەرخانە جۆرییە نوێیەی كردوومەتە ناونیشانی ئەم نووسینە، لەنێو دێڕ و ناوەرۆكی ئەم بابەتەی سەرەوەدا خۆی دەنوێنێ، ئەمەش واتە كاتێك تیرۆریستان و دوژمنانی پێشكەوتن و مافی مرۆڤ، ماف و ئازادی خەڵكەكان پێشێل دەكەن، دەرگاكان واڵا دەكرێن و ئەو كارە شەرمەزار دەكرێت، كاتێك دەستەبەركردنی لێهاتووییە بنەڕەتییەكان دەكرێتە مەرجی پێكەوەكاركردن، كاتێك باوەڕبوون بە ئازادی لە رێكخستنی حزب و سەندیكا و رێكخراوەكانی كۆمەڵگەی مەدەنی دەبێتە خاڵی هاوبەشی پێكەوەبوون، رێزگرتن لە مافی مرۆڤ و نەفرەت لە هەموو جۆرە جیاكارییەك دەكرێت و تاك ئازاد دەكرێت لە رادەربڕین و رێز لە تایبەتمەندیی نەتەوەیی و ئایینی و مەزهەبی و سیاسی دەگیرێت، رێزگرتنی حكومەت و گەلانی دنیا لە ماف و ئازادی و سەربەخۆییت زامن دەكرێت.
خۆڕاگری و واقعبینی و لە جێی خۆیدا هەڵوێست وەرگرتن، وای لە زۆربەی گەلان و دەوڵەتان كرد رێز لە سەرۆك مسعود بارزانی بگرن بە قەد سەنگی ئەو باوەڕ و مامەڵە درووستانەی ئەو لەگەڵ باوەڕی سەردەمییانە و دروستیی خەڵكی كوردستان و خۆڕاگرییان، ئازایەتی و مەردایەتی و چاونەترسیی پێشمەرگەی كوردستان وای كردووە، سەرۆكی ئەم وڵاتە بتوانێ سەرنج و متمانەی تەواوی وڵاتانی هاوپەیمان رابكێشێ و بە شێوەیەكی گونجاو یارمەتی كوردستان بدەن هەتا لەسەر داوای ئەو، یارمەتی بۆ پارچەیەكی دیكەی كوردستانیش دەستەبەر بكرێت.
وەرچەرخانێكی گرنگ لە ژیانی سیاسی و ئابووریی كوردستان رووی داوە و، لە هەمانكاتدا بەلێكتێگەیشتن و یەكتر قبووڵكردن، تەبایی و ئارامی ناوخۆیی و دەرەكی دروست دەبێ و لە ئاكامی ئەم سیاسەتە دروستەدا شەرعییەتی بڕیاردان و سەروەریی یاسا وەكو دوو توخم لە پرەنسیپەكانی دیاری كۆمەڵگەی مەدەنی و پێشكەوتوو سەرتاپاگیرتر دەبێت، ئەم شەرعییەتەش ئاشتیی كۆمەڵایەتی دەپارێزێ و پێشكەوتنی پتر مسۆگەر دەكات و هاووڵاتی هەست بە بوون و كاریگەریی خۆی دەكات و هەموو پێكڕا دەبنە مشورخۆری باشتری بەڕێوەبردنی وڵات و بەرەو پێشەوە بردنی.
ئاوڕدانەوە لە مێژوویەكی نەچەندان كۆن و، لەبەرچاوگرتنی زرووفی بابەتییانەی كۆمەڵگەی خۆشمان و ناوچەكەش و جیهانیشن، هەروەها خوێندنەوەیەكی كۆمەڵناسانەی سەردەمییانە بۆ بارودۆخی خودی گەلەكەمان، وامان لێ دەكات هەڵوێستەیەكی جددی بكەین لەسەر بابەتە هەستیار و گرنگەكانی ناو جەماوەری كوردستان بە هەموو پێكهاتە ئایینی و نەتەوەیی و سیاسییەكانەوە، ئەمە لەگەڵ رەچاوكردنی ئەو هەموو كارەسات و رووداوە ناخۆشانەی چوار دەورەی كوردستانیان گرتووە.
پتر لە هەر زەمەنێكی دیكە خاڵە هاوبەشەكانی لە رووی نەتەوەیی و نیشتمانی كۆمان دەكاتەوە و، دەتوانین ئەم خاڵانە بكەینە بناغەی كاری پێكەوەیی و دروستكردنی كەشوهەوای هەماهەنگی و لێك تێگەیشتن و جیاوازییەكان بە رێزلێگیراوی بهێڵنەوە بۆ كات و قۆناغی گونجاو، ئەوە تاكە رێگەیە بۆ پاراستنی كوردستانی خۆشەویست و گەلە تێكۆشەرەكەی لە مەترسی ئەو پیلان و بەرنامانەی دوژمنان دایدەڕێژن بۆ زیاتر ئازاردانی و رێگەگرتن لە تموحاتی و پێشكەوتنەكانی گەلەكەمان.
هاوتەریب لەگەڵ رەچاوكردنی ئەولەوییاتی بارودۆخی ئێستای كوردستان لە رووی رووبەڕووبوونەوەی تیرۆر و باری بژێوی گەلی كوردستان بەگشتی، بەڵام یەكڕیزیی نیشتمانی و ئاسایشی و پاراستنی دەستكەوتەكان بابەتێكە چاوپۆشی لێ ناكرێت، پابەندبوون بە سەوابیتی نیشتمانی و پشتگیری و كۆبوونەوە لەسەر رێبازی بارزانی و یەكگوتاری و دووركەوتنەوە لە گوتاری ورووژێنەری كات بەسەرچوو، یا گوتاری كات نەهاتوو، ئەمە فێرمان دەكات لەگەڵ ئێستا بژین و بۆ ئایندەی بڕوانین، لە رابردوو تێبگەین، بەڵام بۆی نەڕوانین و بۆی نەژین.
ئێستا لەسایەی سیاسەتە راستەكانی سەرۆك بارزانی دەوڵەتان و گەلان رێزمان لێ دەگرن و هاوكاریمان دەكەن، بۆیە پێویستمان بە هاوكاریی خۆمانە هەیە و ئەم هەلە بقۆزینەوە كە پێشمەرگە زۆر لە تێڕوانینە هەڵەكانی دەوڵەت و گەلانی گۆڕیوە و سەرۆكی هەرێمی كوردستان بە حیكمەت و دوورئەندێشی و سووربوونی لەسەر مافە رەواكانی گەلەكەمان پشوودرێژی و خۆراگریی خەڵكی كوردستان تێكڕا، وایان كردووە وەرچەرخانێكی مەزن لە كوردستان دروست بێ و زۆر دەرگای داخراوی پێشوو، ئێستا واڵا كراون و دەتوانین بۆ بەدیهێنانی ئاوات و ئامانجی رەوای نەتەوەكەمان، لێیان بچینە ژوورەوە.

*بەرپرسی دەزگای رۆشنبیری و راگەیاندن و ئەندامی مەكتەبی سیاسی پارتی دیموكراتی كوردستان
Top