سەرەتا:
دوای ئەوەی ڕۆژی {11. 03. 1974}، جەنگ لە {كوردستان) دەستیپێكردەوە، دوژمنی داگیركەری {بەعس}، لەو باوەڕەدا نەبوو، زۆربەی هەرە زۆری ڕۆڵەكانی گەلی كوردی باشووری وڵات، لە دەوری سەركردایەتی شۆڕشی {11} سێپتێمبەر كۆدەبنەوە، یەكێتیی و تەبایی نەتەوەیی، باڵی پیرۆزی بەسەر ئاسمانی نیشتمانەكەماندا دەكێشێ، هەموو دەستە و توێژ و چینە كۆمەڵایەتییەكانی گەلی كوردیش، لەژێر ئاڵای شۆڕشدا، بە یەك دەنگ و بە یەك ڕەنگ، دژی پیلانە پۆخڵەكانی دەوڵەتی شۆڤێنی {بەعس} دەوەستنەوە. بۆیە بە جارێ تووشی هیستیریا بوو، بە شێوەیەكی زۆر دڕندانە، پەلاماری گەل و نیشتمانەكەمانی دایەوە، شاڵاوی دەربەدەركردنی كورد، بەعەرەبكردنی {كوردستان}، هێرشی سەرتاسەریی و بەرفراوان، هەموو شوێنێكی نێوچە ئازادكراوەكانی وڵاتەكەمانی گرتەوە، تەنانەت ئەو شوێنانەی دەسەڵات دەستیشی نەدەگەیشتێ، بە فڕۆكە مەرگچێنەكانی بۆردوومانیدەكرد، خەڵكی بێ تاوان و بێ دەسەڵاتی كوردی، بە هەموو جۆرە چەكێ، وەك یەك دەكوشت.
قەڵادزێ و هەڵەبجە:
ئەوە بوو، {40} ساڵ لەمەوبەر و بۆ یەكەمین جار، فڕۆكەكانی {بەعس}، ڕۆژی {24. 04. 1974}، شارۆچكەی {قەڵادزێ} و ڕۆژی {26. 04}ی هەمان ساڵیش، شارۆچكەی {هەڵەبجە}یان بۆردوومانكرد، هەردوو شارۆچكەكەیان خەڵتانی خوێن كرد، كوردێكی زۆر بریندار و شەهید بوون، بڕی زیان و ژمارەی قوربانییەكانی ئەو دوو بۆردوومانەش، لە ئەندازە بەدەربوون.
ئا لەو كاتانەدا، هەمووی هەفتەیەك بەسەر هەردوو بۆردوومانەكەدا تێپەڕبووبوو، پۆلێ نیشتمانپەروەری بوێری لەخۆبوردووی دڵسۆزی بیر و ڕێبازی كوردایەتی ڕاستەقینە، وەخۆكەوتن و بڕیاریاندا، كارێكی شۆڕشگێڕانەی بێ وێنە، لە نێوجەرگەی دەسەڵاتی دوژمنی داگیركەردا بكەن، {بەغدا}ی پایتەختی تاوان و خوێن بهەژێنن، دەسەڵاتدارانی {بەعس}ی فاشیش، لە خەونی لەخۆباییبوون و لووتبەزیی ڕاچڵەكێنن، تۆڵەی پەلاماردانەكەی هەردوو شارۆچكەكە و خوێنی شەهیدانی لێ بكەنەوە.
ئەم كارە بۆ كرا؟!
ڕەنگە، گەر هۆی ڕاستەقینەی ئەم نەبەردە گەورەیە نەزانین، یەكسەر بیر لەوە بكەینەوە و بڵێین: هەست و سۆزی ڕووتی كوردایەتی، پاڵی بەو پۆلە خوێندكارەوە ناوە، تا كارێكی سەربەخۆ بكەن. بەڵام لە ڕاستیدا وا نییە، چونكە ئەو چەند خوێندكارە نیشتمانپەروەرە، لە ڕێكخستنەكانی {ی. ق. ك. – ع.} و {پارتیی}دا كاریاندەكرد.
ڕاستە، دەستپێشخەرییەكە لە خۆیانەوە بوو، هەستێكی خاوێنی گڕگرتووی نەتەوەییان هەبوو، دەیانویست، تۆڵەی بۆردوومانەكەی شارۆچكەی {قەڵادزێ} و خوێنی بەناڕەوا ڕژاوی شەهیدەكانی بسەننەوە. بەڵام لە هەمان كاتیشدا، كارێكی ڕێكخراوەیی و ڕێكوپێك بوو، لێپرسراوانی شۆڕش ئاگاداربوون و پتر هانیاندابوون، لە دوژمنی داگیركەری بگەیەنن، دەستی سزا و تۆڵەسەندنەوەی شۆڕش درێژە و گەر بیەوێ، لە نێو جەرگەی دەسەڵاتەكەشیاندا پەلاماریاندەدا. كەچیی دەستی زۆڵەكورد و ناپاكە خۆفرۆشەكان، لە دەستی شۆڕش درێژتربوو، هەر زوو ئەو پلانەیان، بۆ دوژمنی داگیركەر ئاشكراكرد و پوچەڵیانكردەوە!
ڕیكخستنەكانی قوتابیان و پارتیی:
گومانی تێدا نییە، دوای ئەوەی جەنگ دەستیپێكردەوە، هێندێ هێڵی لاوازی ڕێكخستنی قوتابیان و {پارتیی}، لە شارەكانی بندەستی دەوڵەتی {بەعس}دا مابوون و بە شێوەیەكی نهێنیی، كاریاندەكرد. یەكێ لەو هێڵانەش، ڕێكخستنەكانی {بەغدا} بوو. ئەمانیش هەم لەبەر دڕندەیی داگیركەر، هەم بۆ پاراستنی ڕێكخستنەكە و گیانی خۆشیان، بە شێوەی هێڵی جیاجیا و زۆر بە نهێنیی، كاریاندەكرد و ڕێكخستنەكانیان ڕێكخستبوو، چەن شانەیەكی نهێنییان دروستكردبوو، ئەو شانانەش پێوەندییان، بە لێپرسراوێكی تایبەتەوە هەبوو.
ئەو پۆلە خوێندكارەی لەو پڕۆسە گرنگە شۆڕشگێڕانەیەدا بەشداربوون، {نەریمان فوواد مەستی، حەسەن حەمەڕەشید فەتاح، ئازاد سولەیمان میران، ڕەشاد میران، دڵشاد میران، جەواد هەمەوەندیی و لەیلا قاسم} بوون. هەمووشیان خوێندكاری كۆلێژەكانی زانكۆی {بەغدا} بوون. {نەریمان} و {حەسەن}، هەر لە منداڵییەوە هاوڕێ و دراوسێ بوون. هەرسێ {میران}ـەكە، ئامۆزای یەكدی بوون. {جەواد} و {لەیلا}ش، یەكدیان باش دەناسی و خۆشەویستی یەكدیش بوون. لەبەرئەوە، بڕوایەكی تەواویان بە یەكدی هەبوو. كارەكانیشیان بە نهێنیی بوو، بەسەر سێ دەستەدا دابەشبووبوون، خوشكە {لەیلا} ئەڵقەی پێوەندیی و دینەمۆی كارەكە بوو، پێوەندی بە شانەكانەوە دەكرد و ناونیشانی هەمووشیانی دەزانی. بەڵام ئەوانی دیكە، ئاگایان لە یەكدی نەبوو.
بەرەو كوردستان:
دوای بۆردوومانەكە، هەردوو شەهید {نەریمان} و {حەسەن}، لە {بەغدا}وە بۆ {سولەیمانیی} گەڕابوونەوە. بەرەو نێوچە ڕزگاركراوەكان و دەسەڵاتی شۆڕش ڕۆشتبوون. زۆر پێدەچێ، سەردانی نێوچەی {دەربەندیخان} یا {تەوێڵە}یان كردبێ و چاویان بە هێندێ لێپرسراوی دەزگەكانی شۆڕش كەوتبێ. هەر لەو دانیشتنانەشدا، پێشنیازیانكردبوو، لە {بەغدا} كارێكی شۆڕشگێڕانە بكەن، دەست لە دوژمنی داگیركەر بووەشێنن و تۆڵەی بۆردوومانەكەی {قەڵادزێ}ی لێ بكەنەوە. بۆیە داوای چەك و تەقەمەنییان كردبوو. لێپرسراوانیش پێشنیازەكانیان پەسەندكردبوون، داواكارییەكانیشیان بۆ جێبەجێكردبوون، لە بۆمب و چەك، چی پێویستبووبوو، بۆیان ناردبوون.
پلان و دەستبەكاربوون:
چەك و تەقەمەنییەكان گەیشتبوون. ئەو پۆلە تێكۆشەرە، لەسەر چۆنێتی جێبەجێكردنی بەرنامەكانیان، چەند دانیشتن و دەمەتەقێیەكی زۆریان كردبوو. لە ئەنجامدا، لەسەر ئەوە ڕێككەوتبوون، بۆمبەكان لە شوێنە گشتیی و جومگە سەرەكییەكانی دەسەڵاتدا بتەقێننەوە، بە مەرجێ، خەڵكی هەژار و بێ تاوان، بەرنەكەون و تووشی زیان نەبن. ئەوەبوو، هەر دوای چەند ڕۆژێ، هەردوو ئامۆزا {ئازاد} و {ڕەشاد}، دوو بۆمبیان لە سینەمای {ئەتڵەس} و شوێنێكی دیكەی نزیك فڕگەی نێودەوڵەتی {بەغدا} دانا و تەقینەوە. بۆمبەكانیش هەر دەنگداربوون، پتر بۆ تۆقاندنی خەڵك بوون و كەسیان نەدەكوشت. ئەو كارە دەنگیدایەوە و ترسێكی زۆریشی، لە دڵی دانیشتووانی شارەكە و سەرانی {بەعس}دا چاند. لەبەرئەوە، دەزگە سیخوڕییەكانی دەوڵەت، هەر زوو فریای خۆیان كەوتن. سەرەتا سەری داوەكەیان دۆزییەوە، خوشكە {لەیلا} و {جواد}یان گرت. پاشان لە بەرەبەیانی ڕۆژی {29. 04. 1974}دا، سیخوڕە چنگ و نینۆك خوێناوییەكانی {بەعس}، لە شیرینی خەودا، هەموو هەڤاڵەكانی دیكەشیان دەستگیركرد و لە قوژبنی گرتووخانە سامناكەكانیان توندیانكردن. ئیدی لەو ماوە كورتەدا، دەزگەی ئاسایشی شاری {بەغدا} توانی، ئەو دەنگە دلێرانە كپكا، ئەو هەوڵە شۆڕشگێڕانەیەش، هەر لە بێشكەدا پووچەڵكاتەوە.
چۆن ئاشكرابوون؟!
ئاشكرایە، كارێكی وا گەورەی پڕ لە جەربەزە، لە نێوجەرگەی دەسەڵاتی دوژمندا بكرێ، پێویستی بە نهێنیی و دیسپلینێكی زۆر ڕێكوپێك و قایم هەیە. كەواتە، ئەم هەوڵە چۆن ئاشكرابوو؟ دەزگەی ئاسایش، ئەم سەركەوتنەی چۆن بەدەستهێنا؟! چۆن توانیان، هەر دوای چەند ڕۆژێكی كەم، هێڵی ڕێكخستنەكە بدۆزنەوە و هەموو ئەندامەكانیشی بگرن؟!
لە وەڵامدا دەڵێم: هەموو لێكدانەوەكان ئەوەمان بۆ دەسەلمێنن، كە هەر لە سەرەتاوە، دەزگەكانی تۆڕی سیخوڕی دەوڵەتی {بەعس}، چەند زۆڵەكوردێكی ناپاكیان، لە ڕیزەكانی {پارتیی} و شۆڕشدا چاندبوو. لەبەرئەوە، ئاگایان لە هەموو جووڵەیەكیان بووە، ئاگاداری هەموو هەنگاو و پلانەكانیان بوون. بەڵام خۆیان ماتكردووە و پەتیان بۆ بەرەڵاكردوون، تا دوا سەرەداوی پێوەندییەكانیان بدۆزنەوە، ئینجا بیانگرن. دواتریش، هەڵمەتێكی بانگەشەی گەورەی ڕاگەیاندن، بۆ خۆیان و دەزگە نهێنییەكانی دەوڵەت بكەن و تەپڵی سەركەوتن لێدەن، تا لە هەموو لایەنە دژەكانی خۆیان بگەیەنن، دەسەڵات نەنووستووە و ئاگای لە هەموو جووڵەیەكی نەیارەكانی خۆی هەیە، توانای پاراستن و داكۆكیكرنیشی هەیە. بۆیە هەموو ئەو خوێندكارە خەباتگێڕانە گیران و كەسی لێ دەرنەچوو. لەو بارەیەوە، {مسعود بارزانی} نووسیوێتی: {ئاشكراكردنی ئەو شانەیە، زۆر كاریتێكردم.. كاتی خۆی هەوڵمدا، ڕاستینەی ئەو كارە بزانم، زۆر لەگەڵ ئەو كارەدا ژیام و تەنانەت بۆ ساتێكیش، لێم جیانەدەبووەوە. پاشان دوای نسكۆی ساڵی 1975، ڕاستیم بۆ دەركەوت. مونزیر نەقشبەندی ئەندامی لقی پێنجی بەغدا و حەیدەر عەبد عەلی ئەندامی لیژنەی ناوچەی خانەقین ئەلقەی پێوەندی شانەكەی (لەیلا) بوون. دوایی دەركەوت، ئەو دووانە هەر لە ساڵی 1971ـەوە، خۆیان بە دەسەڵات فرۆشتبوو. دەزگەی ئاسایش بەكرێیگرتبوون، سەبارەت بە شۆڕش و كاری پارتی، بە درێژایی ئەو ساڵانە بە شێوەیەكی بەردەوام، كاری بەرزكردنەوەی ڕاپۆرتی پێ سپاردبوون. كە ساڵی 1974یش بە دەستپێكردنەوەی جەنگ كۆتاییهات، هەر لە ڕێی ئەوانەوە، ئەو شانەیە ئاشكراكرا.}(1)
دادگە و لەسێدارەدان:
دوای ئەوەی ئەو پۆلە خوێندكارە نیشتمانپەروەرە گیران، ماوەیەك دەنگ و ڕەنگیان نەما و بێ سەروشوێن كران. لە گرتووخانەدا، ئەشكەنجەیەكی زۆر دران، هێندێ شوێنی جەستەشیان، بە قەمە برینداركردبوون، تا دان بە تاوانەكانیاندا بنێن و ناوی تێكۆشەرانی دیكە بڵێن. بەڵام ئەوان وەك لووتكەی چیا سەركەشەكانی {كوردستان}، سەریان بەرز و ورەیان بەهێزبوو، وەك پیرە داربەڕوو، ڕەگی قووڵی باوەڕی كوردایەتییان، لە كێڵگەی بەپیتی خۆشەویستیی خاكی نیشتماندا داكوتابوو، وەك بێچوەشێر بەرانبەر دوژمن وەستابوون و كەسی دیكەیان تووش نەكرد، وەك چەند تاوانبارێكیش، لە تەلەفیزیۆنی {بەغدا}وە پیشاندران، بەڵام هەڵوێست و خۆڕاگرییان پێوە دیاربوو. پاشان داگیركەری {بەعس}، لە دادگەیەكی كارتۆنیی گاڵتەجاڕانەدا، فەرمانی لە سێدارەدانی خوشكە {لەیلا} و برایان {نەریمان، حەسەن، ئازاد و جەواد}یان دەركرد، ئەو دوو خوێندكارەی دیكەش {ڕەشاد} و {دڵشاد}، لەبەرئەوەی هیچیان لەسەر نەوبوو، بەرەڵاكران.
هەڵبەتە، تازە هیچ شتێ كەڵكی نەمابوو، داكۆكی لە خۆیان بكەن، یا نكۆڵی لەو كارە بكەن. چونكە هەموو شتێ بە بەڵگەوە، دەست دوژمن كەوتبوو، پێش ئەوەی بگیرێن، سیخوڕە كوردەكان ناوەكانیان دابوون، تەقەمەنییەكانیش گیرابوون، وەك دەڵێن: هەردوو سەری قەپات و هەپی بەیاز بەدەستەوە! هەرچەندە چ لە نێوەوە و چ لە دەرەوەی وڵات، هەوڵێكی زۆر درا، ئەو فەرمانە بگۆڕن و لەسێدارەیان نەدەن، بەڵام دوژمنی داگیركەر، لە ئاستی ئەو داواكاریی و تكایانەدا، كەڕبوو، هیچی نەدەبیست!
بۆیە كاژێری {7}ی سەرلەئێوارەی ڕۆژی {12. 05. 1974}، واتە: {40} ساڵ لەمەوبەر، لە گرتووخانەی {ئەبوغرێب}، هەر پێنجیان لەسێدارەدران و جوانەمەرگبوون. ڕۆژی {13. 05.}یش، تەرمەكانیان لە خەستەخانەی {دادوەریی پزیشكیی} وەرگیرانەوە و هەر هەمان ڕۆژیش، تەرمی هەردوو شەهید {نەریمان} و {حەسەن}، لە گردی شەهیدانی {سەیوان}ی شاری {سولەیمانیی} نێژران، خەڵكێكی زۆری نیشتمانپەروەری شارەكە، بەشدارییان لە ناشتنیاندا كرد. تەرمی شەهید {ئازاد} لە {شەقڵاوە} نێژرا. هەردوو تەرمی شەهید {لەیلا} و {جواد}یش، لە {نەجەف} بە خاك سپێردران. ئیدی بەو شێوەیە، ئەو پۆلە شەهیدە كوردپەروەرە، گیانی پاكیان بە خاكی نیشتمان سپارد، بۆ بەهەشتە بەرینەكەی یەزدانی مەزن و بۆ لای خوێندكارە شەهیدەكانی دیكەی، بۆردوومانەكەی {قەڵادزێ} هەڵفڕین!
ئەنجام:
كاتێ شارۆچكەی {قەڵادزێ} بۆردوومانكرا، ئێمە كۆمەڵێ خوێندكار و برادەر بووین، لە گوندی {هێرۆ} ژوورێكمان گرتبوو، چاوەڕێی بارودۆخەكەمان دەكرد، تا بزانین، بەرەو كوێ دەڕوا و بڕیارێ بدەین، ڕوو لە كوێ بكەین. هەر ئەو كاتانە بوو، هەواڵی گرتنی ئەو پۆلە خوێندكارەمان بیست، زۆر نیگەرانیكردین و شەوانە، گوێمان لە وێزگەی دەنگی شۆڕش دەگرت و مەراقمان بوو، چارەنووسی ئەو پۆلە پێشمەرگەیە بزانین. هەموو شەوێ سەركردایەتی شۆڕشیش، هەڕەشەی لە {بەعس} دەكرد و دەیگوت: گەر خوێن لە پەنجەی ئەو خوێندكارانەوە بێ، ئێمە دوو هێندە تۆڵە دەكەینەوە {ساع بساعین}! كەچیی دەسەڵاتی داگیركەر، مێش میوانی نەبوو و هەموویانی لەسێدارەدا، سەركردایەتی شۆڕشیش هیچی نەكرد! بۆیە داگیركەرەكە تێگەیشت، ئەو هەڕەشە و گوڕەشانە، هیچیان لێ شین نابێ، لەبەرئەوە دەستەدەستە، نیشتمانپەروەرانی كوردی لەسێدارەدەدا، بێ ئەوەی لە هیچ شتێ بسڵەمێتەوە، بۆیە هەر ڕۆژی {17. 08. 1974}یش، {37} نیشتمانپەروەری كوردی دیكەی، لە گرتووخانەی {ئەبوغرێب} هەڵواسی، لەوانە هەردوو مامۆستای شەهید {حەمەساڵح فەرەج} و {عیززەت رەشید}، خەڵكی شاری {سولەیمانیی} بوون! ئاخر سەركردایەتی شۆڕش، لە تۆڵەی هەردوو بۆردوومانەكەی {قەڵادزێ} و {هەڵەبجە}دا هیچی نەكرد، ئیدی دوژمن بۆ لەو جۆرە هەڕەشانە بترسێ؟!!
گومانی تێدا نییە، كارێكی هێندە گرنگ و پڕ مەترسی، پێویستی بە كۆمەڵێكی مەشقپێكراوی خاوەن ئەزموون هەیە. هەروەها دەبێ، كەسێكی شارەزا و قاڵبووی كۆڕی خەبات، كەسێكی كامڵ و بە ئەزموون، هەنگاوبەهەنگاو، لە نزیكەوە ئاگای لە هەموو جووڵە و بڕیارەكانی گیانبازان بێ، ڕێنماییانبكا، نەك كۆمەڵە گەنجێكی تازەپێگەیشتووی بێ ئەزموون، لەنێوجەرگەی دوژمنێكی وا گەورە و دڕندەدا، ئەو جۆرە كارە بكەن، تەنیا سەرمایەشیان هەر دڵسۆزیی، بوێریی، لەخۆبووردن و تۆڵەسەندنەوە بێ!
ئاشكرایە، لەوەتەی نەتەوەی كورد هەیە، هەر لەسەر خاكی خۆی داكۆكی لە خۆی كردووە و جەنگاوە، دژی دوژمنی داگیركەر، شۆڕشی بەرپاكردووە، خوێنێكی زۆری ڕشتووە و نیشتمانەكەشی كاولبووە. دوژمنی داگیركەریش، لە ماڵی خۆیدا بێ ترس، پشتێنی لێ كردووەتەوە و حەواوەتەوە. بەڵام لە مێژووی كورددا، ئەوە یەكەمین جار بوو، كۆمەڵێ لاوی نیشتمانپەروەری كورد، بیر لەوە بكەنەوە، كارێكی وا گەورە بكەن، لە نێو قووڵایی قەڵا قایمەكەی دوژمن خۆیدا پەلاماریبدەن و دەستی لێ بووەشێنن، ترس و لەرزێكی بێ وێنە، لە دڵ و دەروونی خۆی و دانیشتووانەكەیدا بچێنن، چونكە هیچ شتێ وەك ئەوە نییە، ماڵ لە دوژمن تێكدەی، خەو لە چاوی دانیشتووانەكەی بتۆرێنی و ژیانی لێ تاڵكەی.
بەڵێ، لە مێژووی كورددا، ئەوە یەكەمین جاربوو، دوژمنێكی داگیركەری دڵڕەق، گوێ لە داواكاریی هەموو لایەنە ئازادیخواز و پێشكەوتنخوازەكانی جیهان نەگرێ، زۆر بێباكانە، كیژە كوردێ لەسێدارەبدا. بۆیە خوشكە {لەیلا} یەكەمین ژنە ڕامیاری كورد بوو، لە خۆرهەڵاتی نێوەڕاستدا، لەسێدارە بدرێ!
كۆتایی و پێشنیاز:
سەیر ئەوەیە، دەزگەكانی ڕاگەیاندنی {پارتیی} بە تایبەتی و هەموو دەزگەكەكانی پارتەكانی دیكەش بە گشتیی، قڕوقەپیان لێ كردووە و باسی هیچ ناكەن، چونكە لەوە دەترسن، دوژمنی داگیركەر، بە كارێكی تیرۆریستیی تاوانباریانكا، بە ڕاستیی، ئەوە جێی نیگەرانیی و مایەی دڵ گرانییە!
جگە لەوەی ئەو پۆلە شەهیدە، سەركردایەتی شۆڕش فەرمانی پێ نەكردبوون و ئەو كارەی پێ نەسپاردبوون، تا كارێكی خۆكوژیی گەورەی لەو جۆرە بكەن، بەڵكو بە ئارەزوو و ویستی خۆیان، ئەو ڕێیەیان هەڵبژاردبوو، زۆر ئازایانەش ویستیان، تۆڵە لە داگیركەری {بەعس} بكەنەوە. كەچیی نەك هەر پشتگوێخراون و ناویان لە نێو ناواندا نەماوە، بەڵكو وەك هەزاران شەهیدی دیكەی كوردیش، ساڵانە یادناكرێنەوە و خەریكە ناویشیان وندەبێ! جا گەر ئەم ڕێكخراو و پارتانەی ئەوڕۆی {كوردستان}، بەو شێوەیە هەڵسوكەوت لەگەڵ یادی شەهیدان و بنەماڵەكانیاندا بكەن، ئیدی دەبێ، نەوەی نوێ بە چ گیانێ پەروەردەكرێن و چی بڵێن؟!
بۆیە لە یادی لەسێدارەدانی ئەو پۆلە شەهیدە نیشتمانپەروەرەدا، پێشنیازدەكەم، هەر شەهیدێ لە زێدی خۆی، پاركێكی جوان، شەقامێكی گەورە، خوێندنگەیەكی نموونەیی، یا هۆڵێكی خوێندن لە یەكێ لە زانكۆكانی {كوردستان}، بە ناویانەوە بنرێ، سەروو پەیكەریشیان بۆ داتاشرێ، لە شوێنێكی دیار و گشتیی شارەكانی خۆیاندا دانرێ. چونكە هێندەی من ئاگاداربم، جگە لە خوشكە {لەیلا}، ئەوانی دیكە هیچیان بۆ نەكراوە!
لە كۆتاییشدا، لە یادی پڕشكۆی {40} ساڵەی شەهیدبوونی، ئەو پێنج داربەڕووە ڕق ئەستوورەدا، بە چۆكدا دێم، سەری ڕێز و نەوازشیان بۆ دادەنەوێنم و دەڵێم: ئێوە نموونەی شەهیدی ڕێی سەربەستیی نەتەوەی كورد و سەربەخۆیی خاكی {كوردستان}ن، زۆر بوێرانە، بەپیر مەرگەوە چوون و لەپێناوی كێشە ڕەواكەی نەتەوەكەتاندا، بە سەربەرزیی ژیان و بە كەڵیی مردن، هەزاران سڵاو لە گیانی پاكتان بێ، ڕەوانتان شاد و بیرەوەریتان هەر زیندووبێ!

* نووسەر و مامۆستای زانكۆ

سەرچاوەكان:
1. مسعود بارزاني، البارزاني و الحركة التحرریة الكوردیة، الجزء الثالث، ثورة أیلول 1961-1975، ص 275-277.
2. دیدار لەگەڵ خاتوو {خەرامانی فوواد مەستی} و دوكتۆر {رەشاد میران}.
3. سایتەكانی ئینتەرنێت.