یەك لە گرفتە هەرە سەختەكانی ئیسلامی سیاسی ئەوەیە، هەموو راستییەكان تەنها لای خۆی گرد كردۆتەوەو، ئەوەی لەگەڵیدا نەگونجا ئیتر ئەوە مولحیدە كافرە لەرێی خوا لایداوەو ...هتد .لێرەوەیە ئیسلامی سیاسی هیچ بوارێكیان بۆ خەڵك نەهێشتۆتەوە تا بیری لێبكەنەوەو گفتوگۆی لەگەڵدا بكەن. هەر عەقڵیەتێكی لەم جۆرەش یەكسەر قاعیدەو بزووتنەوەی تاڵیبان لەبەرچاومان وێنا دەبێت، كە جگە لە خۆیان لایەنێكی دی، گرووپێكی دی،تەنانەت كەسێكی دی قبووڵ ناكەن .ئەم گرفتە لە تەواوی ئەو وڵاتانەش سەلمێنراوە كە بزووتنەوەیەكی ئیسلامی سیاسی لێ هەبووە، كوردستانی خۆشمان نموونەیەكی زیندووی ئەو عەنتەریاتەیە كە ئیسلامی سیاسی یەك زەڕە كەمتەرخەمی لێنەكرد. ئەو عەلی باپیرو سەلاحەدین بەهادینەی كە ئێستا هەر یەكەیان نوێنەری لایەنێكی سیاسین و سوودیشیان لەو پاشخانە ئیسلامییەی خەڵكی كوردستان وەرگرتووە بۆیە ناوی ئیسلامیشیان بۆ حزبەكەی خۆیان لكاندووە، لە ناوەڕاستی نەوەدەكان نەك هەر بڕوایان بە سیستەمی دیموكراسی و كۆمەڵگەی مەدەنی و مافی چارەنووس و مافی مرۆڤ نەبوو، بگرە هەوڵیاندەدا لە لایەك زۆرترین خوێنەر بۆ ئەو ئیسلامییە سیاسییە توندڕەوانەی وەكوو سەید قوتب و دەیانی دیكە دروست بكەن و لەگەڵ نووسینەكانی خۆیان گرێی بدەن و بە گوێی گەنجی كوردی دابدەن تا گیانی یاخیبوون و هەڵگەڕانەوە لە ناخی تاكی كورد دا بچێنن، لە لایەكی تریشەوە بڵاوكراوە ناوخۆییەكانیان ئەو راستییە دەسەلمێنێ كە هەمیشە لە بێ ئیرادەكردنی خەڵك و دوژمنایەتیكردنی هەردوو حزب (پارتی و یەكێتی) نەك تەخسیریان نەكردووە، بەڵكو بەرنامەو پلانی جۆراوجۆری بەردەوامیان هەبووە،بە جۆرێك تێكەڵییەكی زۆریان لەگەڵ وڵاتانی دەوروبەریش دروستكردووە بۆ شكاندنی بەها نەتەوەیی و نیشتمانییەكانی كورد، تا بەهۆی ئەم شكاندنە بگەنە دەسەڵات و ئەزموونی ئەفغانستان لێرە لە كوردستان دووبارە بكەنەوە، بۆیە دەڵێین ئەفغانستان چونكە بەشێكی بەرچاو لەو حزبە ئیسلامیە سیاسیانە بە نهێنی رۆیشتوونەتە ئەوێ و پڕۆڤەی جۆراوجۆریان بینیوە.بۆیە نیازو مەبەستی ئەوان شاراوە نەبووە تا ئێستا خوێندنەوەیەكی دیكەمان بۆیان هەبێت، ئەگەر زەمینەیان لەبار بێت ئێستا لە هەر كاتێكی دیكە كۆمەڵی ئیسلامی یان یەكگرتووی ئیسلامی بڕوایان بە سیستەمی پەرلەمانی نییە، بڕوایان بە حكومەتێك نییە فرەیی بێت، چونكە لە بنەڕەتدا ئەوان دیموكراسیەتیان گەڕاندۆتەوەو بڕوایان بە دیالۆگ نییە.

ئیسلامی سیاسی، عەقڵ و لۆجیكیان لە ژوورێكی تاریكدا قفڵداوە، چونكە لێكدانەوەیەكی دۆگمای حازربەدەستیان هەیە بە جۆرێك ناتوانن و ناشیانەوێت بچووكترین لێكدانەوە لەگەڵ واقیعی نوێدا بكەن.

ئیسلامی سیاسی یان با بڵێین كۆمەڵ و یەكگرتوو دەیانەوێ چیمان فێر بكەن ؟، ئایا خەڵكی كوردستان لە رێگەی یان بەهۆی ئەوانەوە ئایینداری دەكەن ؟ ئەمە ئەگەر وابێ كەواتە كورد هەر (20) ساڵێكە خواپەرستی كردووە!!، كە ئەمەیان هەر كوفرێكەو تەواوی كۆمەڵگەی كوردییان لێ هەڵدەگەڕێتەوە، چونكە بە فیڕۆبردنی (1400)ساڵ خواپەرستییانە، ئەگەر بۆ ئەوەشیانە شوێنی زاناو مەلایانی ئایینی بگرنەوەو پێشنوێژیمان بۆ بكەن، لەمەشدا كورد قەبووڵی نییە، چونكە ئەوان سیاسەتێكی دیماگۆجیانە دەكەن و هەر رۆژەی گوتارێكی سیاسی بۆ قازانجی حزبەكەیان دەڵێنەوەو هەمیشەش هەوڵیانداوە یەكگرتوویی كورد پارچە پارچە بكەن و ناكۆكی بنێنەوە، وەك ئەو ناكۆكییەی كە ئەمیری كۆمەڵ لەگەڵ رابەری پێشووی بزووتنەوەی ئیسلامی كردی و هێندە خەستی كردەوە بە شێوەیەك ئێستاش كەلێنێكی گەورە نەك لە نێوان دوو بنەماڵە بەڵكو لە نێوان دوو حزبدا هەیە.لەكاتێكدا بە درێژایی (1400) ساڵی رابردوودا یەك مەلا لەو كوردستانە شك نابردرێ گوتارەكانی بۆ لەیەك ترازانی خەڵك بووبێ، یان بۆ مەرامێكی شەخسی گوتاری دابێت، بەڵكو هەمیشە رۆڵی پۆزەتیڤیان لە ناو كۆمەڵگەدا هەبووە، بۆیە بە درێژایی ئەو (1400) ساڵەو ئێستاش مەلای كوردستان بە چاوی رێزو میهرەوە سەیر دەكرێن و پێگەیەكی كۆمەڵایەتی بەهێزیان هەیە لە ناو خەڵكدا.بۆیە نەك تەنها لەكاتی نوێژكردن لە ریزی پێشەوەی خەڵكن بەڵكو لە هەموو بۆنە كۆمەڵایەتی و ئایینی و ...هتد هەر لە ریزی پێشەوەی خەڵكن.بە پێچەوانەی كۆمەڵ یا یەكگرتوو كە ئەوان جگە لەوەی نوێنەری سیاسی ئەو ئەندامانەی خۆیانن، نوێنەری خەڵك نین و كەسیش ئامادە نییە بیانكاتە پێشنوێژی خۆیانەوە.