ئەگەر تا دوێنێ پێوەندی نێوان عەرەبی سونە و شیعە ئاڵۆزی زۆری تێكەوتبوو،وا ئەمڕۆ خەریكە ئاڵۆزی لە نێوان حكومەتی مالیكی و حكومەتی هەرێمی كوردستان دروست دەبێت و رەوشی سیاسی عێراق و كوردستان بە ئاقارێكی دیكەدا پێچ دەكاتەوە، كە ترسی ئەوەش هەیە زیاتر بە زەرەری كورد تەواو ببێت، نەك بەغدا.
ئێستا با لەوە گەڕێین كە كورد هەمیشە لە هەوڵی پێكەوەژیان و ئاشتكردنەوەی نێوان باڵ و هێزە پێكناكۆكەكانی بەغدا بووە،چونكە بە درێژایی مێژوو شۆڤێنییەتی عەرەب هەمیشە مەگەر لەكاتی ئەوپەڕی تەنگاوی و ناپووتی دا، تۆی بە دوژمنی گەورەی خۆی نەزانیبێت، دەنا قەت لەگەڵ كورد هەڵینەكردووە، بۆیە هەموو هەوڵەكانی ئێمەش بۆ چاككردنەوەی پێوەندی نێوان هێزو لایەنەسیاسیەكانی عەرەب، چەند لە بەرژەوەندی عەرەب بووە، ئەوەندەش دەرئەنجام زیانی بە ئێمە خۆمان گەیاندووە، بەداخەوە ئەوكاتانەی مالیكی تەلەفۆنی بۆ سەرۆكی كوردستان دەكردو داوای لێدەكرد هەرچۆنێك بێت خۆی بگەیەنێتە بەغداو هاوكاری بكات چونكە ئەوكات بەغدا بۆنی خوێنی لێ دەهات، هاتووچۆ قەدەغەبوو، خۆڵباران بوو بەغدا بەغدای ئەمڕۆ نەبوو، كەچی ئێمە لەبەر رزگاركردنی مالیكی، دڵمان نەدەهات بڵێین وا ئێمە لەگەڵتداین، بەڵام فەرموو ئەم مافانەی ئێمەش واژۆ بكە.
ئەوكاتەی بەغدا توانای ناردنی نیوسریەی سەربازیشی نەبوو بۆ دیالەی بنێرێ، زۆر مەمنوون بوو كە كورد رێگا سەرەكییەكانی پارێزگای دیالەی خستبووە ئەستۆی خۆی، هەرچەندە شۆڤینییەكی وەك ساڵح موتڵەگ ئەوكاتیش دەیوت، ئێمە ئێستا دەستمان شكاوە، با دەستمان چاك بێتەوە ئینجا خۆمان دەزانین چۆن چارەسەری كورد دەكەین،رێك قسەی خۆیان بە جێ گەیاند، هێشتا دەستیان ئازاری زۆری ماوە تەنها كەمێك سووك بووە دەنا وەك موتڵگ وتی خراپتر دەكەن، ئەی باشە ئێمە چی بكەین ؟ ئێستا بەغدا متمانەی نە بە پێشمەرگە هەیە، نە بە كوردیش هەیە، لە كاتێكدا كورد نەتەوەیەكی سەرەكییە لە عێراق و لەم سەردەمەی ئێستاشدا پێویستە مافەكانی بۆ دابین بكرێ، یان وەك لێرەو لەوێی هەندێك لە سیاسییە كوردەكانی خۆشمان گوێبیست دەبین، ئەمڕۆ شەڕ لە قەرەتەپە بكەین باشترە تا سبەی لە ناو كەركوك و موسڵ بیكەین، بەتایبەتی حكومەتی مالیكی خەریكە رۆژ لە دوای رۆژ بەهێزتر دەبێت، ئێمەش هەر وەكوو خۆمانین.
لە راستیدا ئێمە بەرلەوەی بیر لە شەڕ بكەینەوە، پێویستیمان بە زۆر هەنگاوی دیكەی جیدی و عەمەلی هەیە،راستە ئامانجی گرووپی 127 هەڵوەشانەوەی پڕۆسەی سیاسییە لە عێراقدا، كوردیش لە ماوەی ئەم پێنج ساڵەیدا نەیتوانی وڵاتێكی بڕیار بەدەست یا وڵاتێكی هەرێمی بكات بە دۆستی خۆی و هەروەها لە ناو خودی پەرلەمان و وەزارەتەكانی بەغداش بە پێی پێویست نەبووین،كەواتە دەبێت دان بەو راستییە (ئەگەر تاڵیشە) بنێین، كە بەشێك لەو هەڵانەی كراون بەرامبەر بە كورد خەمساردی خوشمانی تێدابووە، بۆیە ناكرێ ئێستا هەڵوێستێكی پەچە كردار(ردفعل) وەربگرین، چونكە هێشتا كاتمان هەیە،مالیكی لەسەر لێواری رووخان بوو راست بووەوە، بۆچی ئێمە نەتوانین خۆمان لە زۆر رووەوە بە هێز بكەین، كە لە بنەڕەتدا ئەوەندە لاوازیش نین و، خاوەنی سەرۆكێكین نەك هەر بەغدا بەڵكو ئەوروپاو ئەمریكاش حیسابێكی زۆر جیدی بۆ قسەكانی دەكەن.
راستە رەوشەكە ئاڵۆزی پێوەیە، بەڵام ئێمە نەتەوەی سەرەكی ئەم عێراقەین، عێراقی نوێێش بەبێ كورد هیچ مانایەكی نابێت، ئینجا ئەمریكاش دەزانێ مالیكی خەریكە خۆی قایم دەكات و زۆر جار حیساب بۆ گوشارەكانی ئەمریكاش ناكات وەك لە رێككەوتنی ستراتیژی ئەمنی نێوان هەردوو وڵات هێشتا نەهاتۆتە كۆتایی، گرفتەكەش خودی مالیكییەو ئەمریكاش باش دەزانێ. سەرباری كێشەی نێوان شیعەو سونەی عەرەب قەت بە كۆتا نایە،بەڵام پێویستە ئیتر سەركردایەتی كوردستانیش پێداچوونەوەی جیدی هەبێت چ بەرامبەر رێككەوتنەكان و هاوپەیمانێتییەكانمان، چ بەرامبەر خەڵكی خۆشمان كە دەبێت كەسانی ئەكتیڤ و كارا لە بەغدا بن، ئاخر سیاسەت وەك سەركردەیەكی سیاسی بەر لە 12 ساڵ بۆی باس كردم وتی سیاسەت وەكو گۆڕەپانی یاریكردنی تۆپانێ وایە، سیاسییەكان یاری تێدا دەكەن، هەر سیاسییەك نەیتوانی گۆل بكات پێویستە خێرا دەری بهێنی یاریزانێكی گۆڵكەر لە شوێنی دابنێی تا زۆرترین گۆل تۆماربكات، دەنا دەیدۆڕێنی، یاریزانێك نەتوانێ یاری بكات بۆچی لەناو گۆڕەپانەكە بێت.پێم وایە دەبێت بەو عەقڵە كار بكەین،ئەگەر وا نەكەین نەك هەر ناتوانین كەركووك بگەڕێنینەوە سەر هەرێمی كوردستان، بگرە ناتوانین بیكەین بە هەرێمێكی سەربەخۆش بۆ ماوەیەكی دیاریكراو.
سیاسەت بە سۆزو عاتیفە بەڕێوە ناچێت، پێویستە هیچ سێو دووی لێ نەكەین لە پێداچوونەوەی خۆمان و دەستنیشانكردنی كەموكورتیەكانمان، تا ئەوە نەكەین با گلەیی لە شۆڤێنییەتی عەرەبی نەكەین، بەڵكو پێشوەختە گلەیی لە خۆمان بكەین.