ئێڤاری یا ئەڤرۆ ٣٠ ێ ئادارا ٢٠٢١ رۆژەکار دیترا گەشە د ئەسمانێ سیاسەت و دبلۆماسیەتا کوردستانی یە لسەر دەستێ سەرۆکێ ھەرێما کوردستانێ سەرۆک نێچیرڤان بارزانی ، ئەو چالاکیا دبلۆماسی یە ئەوا دەنگ و رەنگێ کۆردستانیا ل سەنتەرەکێ کارا و کاریگەر یێ بریارا سیاسی و لەشکری و ئابۆری یا جیھانی ( کۆچکا ئێلیزێ ) کۆچکار سەرۆکاتیا وەڵاتێ فەرەنسا گەھاندیە جیھانێ .
ئەڤە سێیەم جارە سەرەکێ فەرەنسا ل چار سال و سێ مەھێن دەربازبووی دا پێشوازیێ ل سەرۆک نێچیرڤان بارزانی دکەن پشتی سەرەدانێن (٢/١/٢٠١٧ و ١٠/٧/٢٠١٩ )، رەنگە ئەڤ رەنگە سەرەدانە دناڤبەرا سەرۆکێن دوو وەڵاتێن خودان سەروەری و سەربخۆ چالاکیەکا دبلۆماسیا نۆرمال بیت ، لێ بۆ ھەرێمەکا مینا ھەرێما کوردستانێ چالاکی و دەسکەفتەکێ ھەرە مەزنە بتایبەتی کۆمبوونا سەرۆکێ ھەرێمەکا دناڤ دەولەتەکێ دا ، ھەرێمەکا وەکی کوردستانێ دگەل سەرۆکێ وەڵاتەکێ زلھێزێ جیھانێ و ئەنداما ھەردەمی ل جڤاتا تەناھی یانیڤ دەولەتی بڕەنگەکێ نۆرمال ناھێتە دیتن ، بتایبەت ئەو پێشوازیا فەرمی یا مینا سەرۆکێن وەڵاتا و یا پڕی گرنژین، کۆمبوونەکا ( ١٠٨ ) سەد و ھەشت خۆلەکی دناڤبەرا ھەردوو سەرۆکان دا دەمەکێ زۆرێ درێژە و نیشانێ پویتەپێدانەکا زۆرا وەڵاتێ فەرەنسا ب گشتی و سەرۆک ماکرۆنە ب تایبەتی کوردستانێ و رێزگرتنەکا مەزن ل سەرۆک نێچیرڤان بارزانی .
ژلایەکێ دیتر دیار دبیت کۆ ڤی وەڵاتی ستراتیژیەتەکا سیاسی یا درێژخایەن و ئەرێنی بەرامبەر کوردستانێ ھەیە و ب دوست و ھەڤپەیمان دزانیت ھەر لسەر دەمێ دەرکرنا بریارا ٦٨٨ یا جڤاتا تەناھیێ ل سالا ١٩٩١ بۆ پاراستنا کوردستانێ و درۆستکرنا دەڤەرەکا دژە فڕین و وێ پشتەڤانی و رۆلێ وەڵاتێ فەرەنسا بۆ شکاندنا گەماروویێن ئابۆری و لەشکری یێن عیراقێ و ھندەک وەڵاتێن ھەرێمی لسەر ھەرێما کوردستانێ پشتی راپرسیا سەرۆخۆبوونا کوردستانێ و خیانەتا سالا ٢٠١٧ .
دیارە دڤان سەد و ھەشت خۆلەکێن کوردستانی و فەرەنسی چەندین پرسێن سیاسی و ئابۆری و جڤاکی ھاتینە گەنگەشەکرن و زۆر بەرژەوەندێن وەڵاتێ فەەرنسا لگەل ھەرێما کوردستانێ تێکەل بوونە، ئەڤە بەرژەوەندە ژی زێدەتر د خزمەتا ھەرێما کوردستانێ دانە ژھەمی لایەکی ، چونکی ئەم خودان دەولەتەکا سەربخۆ نینە و بەردەوام مەترسی لسەر ھەنە چ ژلایێ عیراقێ یان ھندەک وەڵاتێن ھەرێمی ئەوێن دژایەتیا ھەرێمەکا کوردستانی یا بھێز و ئارام و پێشکەفتی دکەن .
بھێزبوونا کوردستانێ ژی ب پشتەڤانیا وەڵاتێن بھێز دھێـتەکرن .
سەرۆک نێچیرڤان بارزانی ژی ئەندازیار کارئەکتەرێ سەرەکی یێ بھێزکرن و خۆرتکرنا دبلۆماسیەتا کوردستانی یە لسەر ئاستێ جیھانی .
دیسان ئەڤ پێشوازیا سەرۆک ماکرۆن و شێوازێ وێ کەسایەتیا سەرۆک نێچیرڤان بارزانی کریە کەسایەتیەکێ جیھانی و دوزا سیاسی یا کوردی و ھەرێما کوردستانێ وەکی خۆدان پێگەھەکێ مەزن لسەر ئاستێ دەڤەرێ نیشا جیھانێ ددەت ، دڤێرەدا دیار دبیت کۆ سەرۆک نێچیرڤان بارزانی سیاسەتمەدار و کەسایەتیەکا مەزن و کاریزمایە و شیایە کوردستانێ برەنگەکێ دبلۆماسی و ھێمن ژ ھەمی لایەکی بەرەڤ پێشڤە ببەت و بپارێزیت و زێدەتر بدەتە نیاسین .
ئەگەر بەراووردیەکا بچیت دناڤبەرا ھەرێما کوردستانێ وەکی قەوارەیەک دناڤ وەڵاتەکێ فیدرالدا دگەل ھەرێمێن وەڵاتێن دیتر یێن فیدرالی بکەین ژلایێ بەرنیاسبوونێ ، جوداھیەکا زۆر ھەیە و کوردستان مینا دەولەتەکا سەربخۆ دھێنە نیاسین ...! ، ھزا خۆ بکەین ئەم ناڤێن چەند ھەرێما یان سەرۆکێن وان دزانین ئەوێن دناڤ وەڵاتێن فیدرالدا ، مینا نێجیریا ( ٣٦ ) ھەرێم ، مەکسیک ( ٣١ ) بەڕازیل ( ٢٦) ، ئەرجەنتین ( ٢٣ ) ، سوێسرا (٢٦)ئەڵمانیا ( ١٦ ) یان ھند ( ٢٨ ) ھەرێم ھەنە .
ئەڤ ناساندنا کوردستانێ لسەر ئاستێ جیھانی خزمەتەکا زۆرا مەزن دگەھینتە کوردستانێ ژ ھەمی لایەکی و ژ ئەنجامێ سەرکەفتنا دبلۆماسیەت و سیاسەتا سەرۆکێ ھەرێما کوردستانێ و کاریگەریا وی یە بۆ خۆرتکرنا کوردستانێ و پێشڤەبرن و بھێزکرنا قەوارێ ھەرێما کوردستانێ ب پەیوەندیێن لگەل جیھانێ و ئاسۆیێن گەشن بۆ پاشەرۆکا وەڵاتێ مە .