ب درێژاهیا خه‌باتا رزگاریخوازا گه‌لێ كوردستانێدا گه‌له‌ك بویه‌ر و رویدان بسه‌رێ وی هاتینە كو بیرئانینا هه‌ر ئێکێ ژ وان مروڤی جاره‌كا دی به‌ره‌ڤ نیشتمانپه‌روه‌ریێ و ولاتپارێزیێ پاڵ دده‌ت و دهێته‌ڤه بیرا هه‌ر خودان وژدانه‌كی كو گه‌لێ مه دیروكه‌كا تژی تراژیدیا و سه‌روه‌ری هه‌یە. شكه‌ستنا سالا ١٩٧٥ێ و ئاواره‌بوونا هزاران شورشگێر و كوردپەروەران بەرف ئیرانێ ژ وان تراژیدیایانە كو چ جاران ناهێنه ژبیركرن. ژیانا ئاواره‌ییێ ئێك ژ نه‌خوشترین قوناغێن ژیانا گه‌لێ مه بوو؛ ژ دەستدانا سەرکەفتنێن شورشا ئیلونی و دویركه‌فتن ژ كه‌س و كار و وارێ وان کاریگەریەکا خراب لسەر ئاوارەیان کربوو. دسەر هندێ ژیرا، ده‌مێ مروڤ گه‌له‌ك رویدانێن روژێن ئاواره‌ییێ د ئینیته بیرا خو، مروڤ شانازیێ بخو دکه‌ت كو د قوناغێن دویر و درێژدا ژ بو ئارمانج و رێبازه‌كا پیروز خه‌بات كریە. ئێك ژ بیرهاتنێن مە یێن ژیانا ئاوارەییێ ئه‌وە كو هه‌ر جهه‌كێ ئه‌م چووباینێ، ئه‌گه‌ر مه وەک كوردێن عێراقی خو دابا نیاسین، خه‌لك دا حێبه‌تی بن و بێژن: «كوردێن عێراقێ كینه ڤێجا؟!» به‌لێ پا ده‌مێ مه دگوتێ ئه‌م کوردێن بارزانینه هه‌ر ئێكسه‌ر دا تێگه‌هن و بێژن: «ئاها ئێ، مەلا مستەفا. هوین یێ شه‌ری دكه‌ن دا مافێن خو بده‌ستڤه بینن و ببنه ده‌وله‌ت.» و ب دویڤدا دا ب ئاوایەکێ تایبه‌ت و ب رێزگرتن سەرەدەریێ دگه‌ل مه كەن. ل وی ده‌می غروره‌كا تایبه‌ت لده‌ف مە په‌یدا دبوو ده‌مێ مه دزانی بارزانیێ نه‌مر ناسناما گه‌ل و دیروك و خه‌بات و ئارمانجا مه‌یه. بڤێ چه‌ندێ هه‌ستێ شانازیكرن ب خو وه‌ك رێبوارێن رێبازا وی یا پیروز و حەزا به‌رده‌وامیدان ب وێ ل ده‌ف هه‌ر كورده‌كێ خودان وژدان په‌یدا دبوو. به‌رده‌وامیدان ب خه‌باتا حزبی یا نهێنی ل ئاواره‌ییێ و زڤرینا پێشمه‌رگێن قاره‌مان بۆ چەپەرێن بەرگریێ ل شورشا گولانا پێشكه‌فتنخواز و سه‌رهلدانا جه‌ماوه‌ری یا ١٩٩١ێ هێمایێن هه‌ری به‌رچاڤێن وێ چه‌ندێنه كو بارزانیێ نه‌مر دامه‌زرێنه‌رێ قوتابخانا كوردایه‌تیێ بوو.
ئیرو ١١٨ سالیا ژدایكبونا وی زاتێ پیروزە و شانازیێ دکەین کو روژا بونا وی یا هه‌ڤده‌مه دگه‌ل سه‌رهلدانا خه‌لكێ شه‌ره‌فمه‌ند و نیشتمانپەروەرێ پارێزگه‌ها دهوك. ب ڤێ هەلکەفتێ گه‌رمترین پیروزباهیان ئاراسته‌ی هه‌می كه‌س و كارێن سه‌ربه‌رزێن شه‌هیدێن سه‌رهلدانێ و هه‌می شه‌هیدێن رێیا ئازادیێ و پێشمه‌رگێن قەهره‌مان و خه‌لكێ سه‌ربلندێ دهوكێ دكه‌م. بژیت كورد، بژیت كوردستان.
ژیان طاهر زێوه‌ی
