زاروک دایک و بابێن خۆ ب مەزنترین پشتەڤان و ھیڤی و ئومێدا خۆ دزانن و وەسا ھزر دکەن کو کەس ل جیھانێ نەشێت بەرھنگاری وان ببیت و ھەردەم لبن سیبەرا وان دێ ژ ھەمی مەترسیێن ژیانێ د پاراستی بن. من ژی ل زاروکیا خو دایک و بابێن خۆ مینا چیایەکی ددانان و من ھەردەم ھزر دکر چ کەس و چ تشت نەشێن وان لاواز بکەن. ل بیرا منە دەمێ ژیێ من ٥ سال، د رۆژەکا وەکی ئەڤرودا ژ نشکەکێڤە من دیت دایکا من، رەحمەتی داپیرا من و رەحمەتی بابێ من دەست ب گری کرن و بەردەوام دگوتن: «پشتا مە شکەست، ئەم ماینە بێ خودان». ئەز گەلەک ترسام و جیھان لبەر چاڤێن من تاری بوو. ئێکەم جار بوو من ئەو وەسا شەپرزە و بێرێ ددیتن. من پرسیارا ژ دایکا خۆ کر کا چ چێ بوویە. د بەرسڤێ دا گووت: «بابێ مەزن بارزانی وەغەر کر و ئەم ھێلاینە بێ خۆدان». من نەدزانی بارزانی کیە، بەلێ پا ئەو ناڤ ما د ھزرا مندا و پشتی کو من فەھم کری تازە من زانی کو بارزانی ئەو کەس بوو یێ کو د تاریاتیا شەڤا زولم و زورداریێ دا خەتیرا شورەشێ و ھیڤیا پاشەروژێ و ھەست ب ھەبوونا خو کرنێ لدەف گەلەکێ ستەم لێکری و بێ دەستھەلات ھل کری. بارزانیێ نەمر ھێما و ناسنامەیا گەلێ مەیە. ھەمی ژیانا خۆ تەرخان کر ژ بۆ بدەستڤە ئینانا دادپەروەریێ و یەکسانیێ و ڤەژیانەکا ئازادانە و ژ ھەژی بۆ گەلێ خۆ و مینا بابەکی خو ل گەلێ کوردستانێ کرە خودان و خورتێن کوردستانێ فێری ئازادی، نیشتمانپەروەری و دیموکراسی و خۆپێگەھاندنێ کرن. راستە کو وەغەرا وی دلشکەستن و تاریاتیەک دناڤ ژیان و ھیڤیێن گەلێ کورد دا درست کر، بەلێ پا رێبازا وی ما ساخ و نەمر؛ ژ روژا وەغەرا وی وەرە رێبوارێن وێ رێبازا پیروز ب رێبەریا سەروک مەسعود بارزانی بێراوەستان خەباتێ ژبو بجھــ ئینانا ئارمانجێن بابێ روحیێ نەتەوا کورد دکەن.
سلاڤ ژ بۆ گیانێ پاکێ بابێ نەتەوا کورد بارزانیێ نەمر و ئدریسێ ھەردەم ساخ. سەرێ رێز و نەوازشێ ل ھەمبەر ماندیبون و خو گوریکرنا ئەفسانەیێ چیا و ھەمی شەھیدێن رێیا ئازادیێ د چەمینم. رێبازا وی یا بەردەوام بیت و سەرکەفتن بۆ رێبوارێن ڤێ رێبازێ بیت.


* پەرلەمانتار