ماڵئاڤاھیا مەزنترین کاریگەرترین رێبەرێ گەلێ کورد و کوردستانیا ، سەرکێشێ بزاڤا رزگاریخوازیا کوردستانی و دامەزرێنەرێ پارتیا دیموکراتا کوردستانێ سەرۆکێ نەمر مستەفا بارزانی ، مەزنترین روودانا دەرۆنی بوو د دیرۆکا سەردەم یا گەلێ کورد و کوردستانیان دا ، ئەو روودانا چاڤێن تەڤایا کوردستانیێن ھەلگرێن ھەستا نەتەوایەتی و نشتیمان پەروەری یێن ھەمی پێکھاتێن جڤاکی و ئۆلی و ئەتنی و تە و چینا پڕی رۆندەک کری و رۆندک د چاڤێن پشکەکا نەیار و دوژمنێن گەلێ کورد ژی باراندی .
ئەو روودانا وەکی ئەڤرۆ بەری ( ٤٢ ) ساڵان ل ١/٣/١٩٧٩ ھاتیە روودان کۆ وەغەرا داویێ یە یا بارزانی نەمر پشتی ھەڤرکیێ لگەل نەساخیێ ل وەڵاتێن ئیکگرتیێن ئەمریکا .

ب وەغەرا بارزانی نەمر مرۆڤەکێ ھەرە مەزن دڤێ جیھانێ بارکر ، ئەو مرۆڤێ ھەمی ژایانا خۆ بۆ ئازادی و بەختەوەریا گەلێ خۆ و مرۆڤایەتیێ تەرخان کری ، کۆ لسەر دەستێ وی و ب گاڤ و پرۆژە و ھزر یێن بناغێ رێکا ئازادی و رزگاریا کوردستانێ ھاتیە دانان و قۆناغێن مەزن بۆ بڕی و دەسکەفتێنمەزن بدەستڤەھاتی .
لسەر دەستێ بارزانی نەمر ھەست و ھشتیارا نەتەویا کوردی و بزاڤا رزگاریخوازیا کوردستانی گەھشتە قۆناغەکا پێشکەفتی و گۆرانکاریێن ھەری مەزن یێن سیاسی و جڤاکی د بەرژەوەندا کوردستانێ ھاتنە کرن .

ژبەر مەزناھی و کارگەری و دادوەریا جڤاکی یا بارزانی نەمر زۆرینەیا ھەرە زۆرا خەلکێ کوردستانێ بڤی رێبەرێ مەزنڤە ھاتنە گرێدان و خەونێن ئازادیا کوردستانێ پێڤە ددیتن . لەوما ب وغەرا داویێ یا بارزانی نەمر بەھی و شێنی کەفتنە دناڤ ھەمی ماڵان دا و خەمەکا گران دلێن وان پاوان کرن ، لێ سەرەرای ڤێ چەندێ باوەریا خەلکێ کوردستانێ ب رێبازا بارزانی کۆ بارزانی نەمر ل دژوارترین کاودان دا پێشەوایەتی لێ کری دەسکەفتێن مەزن پێ بدەست ئینای خۆرتر و گەشتربوون ، ئەڤە ژی بەرسڤا خەلکێ دلسۆز و وەڵاتپەروێن کوردستانی بوو ئەوێن باوەریەکا موکۆم ب بارزانی و رێبازانی ھەی ، بۆ زۆربەری دوژمن و نەیاران و پیلان دارێژەرێن دژی بارزانی و بزاڤا رزگاریخوازیا کوردی و پارتی دیموکراتی کوردستان کۆ وە ھزر دکر ب وەغەرا بارزانی ئەڤ بزاڤا رزگاریخوازی و پارتی دیموکراتی کوردستان و رێبازا بارزانی دێ لاواز و لەنگەر بن و قوناغێن باشێن ھاتینە بڕین بۆ رزگاریا کوردستانێ ، ئەوێن وە ھزر دکر ب چوونا بارزانی مەشخەلێ شۆرەش و بزاڤا رزگاریا کوردستانێ دێ ڤەمریت و ھیڤیێن وان دێ بجھــ ھێن .

ئەڤ باوەری و دلسۆزیا گەرم و گۆڕ یا خەلکێ کوردستانێ ب رێبازا بارزانی و پارتی دیموکراتی کوردستان وەکی پێشەنگ و پێشەوایێن رێکا رزگاریا کوردستانیا پشتی وەغەرا داویێ یا بارزانی نەمر نیشانە کۆ ئەڤ رێک و رێبازە د کۆراتیا ناخ و ھەستێن جڤاکێ کوردستانێ دا ھاتیە ھەڵاتن و دگەل خوینا وان تێکەل بوویە ، دیسان بەڵگەیە کۆ رێبازا بارزانی خودی پرنسیپێن جڤاکی و مرۆڤایەتی یە و سازیەکا مەزنا رێکخستی یە بۆ دارشتنا پلان و ستراتیژیەتا بدەست ڤەئینانا ماف و ئارمانجێن خەلکێ کوردستانێ .

لەوما ب رێبەریا سەرۆک مەسعود بارزانی کاروانێ خەباتا رزگاریێ لسەر ھەمان بنەمایێن رێبازا بارزانی ئەوا بارزانی نەمر پێشەوایەتی لێ دکر یێ بەردەوام بوو ، چ ژلایێ شۆرەشگێریێ و زاڵبوون بسەر پیلانێن دوژمن و داگیرکارا چ ژلایێ راکێشانا سۆز و ھەستێن خەلکێ نشتیمان پەروەر و وەڵاتپارێز .

لەوما پرسیا گەلێ کورد بوویە پرسەکا نیڤ دەولەتی و رۆژ بۆ رۆژێ دەسکەفت زێدەتر و مەزنتر بوو ھەتا کۆ ئەڤرۆ قەوارێ ھەرێما کوردستانێ بوویە پشکەک ل ھەڤپەیمانیا جیھانی و وەڵاتێن مەزن و گرزیتەکا ئارام دناڤ ڤۆلکانەکا مەزنا ئاگرین دا و ھەولێرا پایتەخت بوویە سەنتەرەکێ مەزن بۆ سەرەدان و پێشوازیکرنێ ل سەرۆک و کەسایەتیێن مەزنێن جیھانی .

ئەڤرۆ ژی بڤێ ھەلکەفتا خەمناک یا ساڵڤەگا وەغەرا بارزانی نەمر ھەمی خەلکێ کوردستانێ ژلایەکی د ماڵێن خۆدا کۆرا ماتەمینی دگرێیت و ژلایەکێ دیتر بیر و باوەرێن خۆ موکۆمتر دکەت ب وێ رێبازا بارزانی نەمر خەبات بۆ کری و قوربانی بۆ دای و خەلکێ کوردستانێ شیانێن خۆ تەرخان دکەت بۆ بجھئینانا ھیڤی و ئارمانجێن بارزانی نەمر کۆ ھیڤی و ئارمانجێن خەلکێ کوردستانێ بوون .