سیاسەتا سیاسیێن کوردستانی پڕانیا ژیانا جڤاکێ کوردستانێ داگیر کریە، ماڵ و مزگەفت ، پەروەردە و زانست، میدیا و هونەر ، وەرزش و رەوشەنبیری و ...هتد هەمی ب سیاسەتێ ڤە گرێدانە ، باشترە بلژین هەمی بووینە ب سیاسەتێ دهێنە ئاراستەکرن .
تاکە سازیا سەرخۆبوونا خۆ ل کوردستانێ پاراستی داستهەڵاتا دادوەریێ یە ، ئەڤەژی دەسکەفتەکێ گرنگە ، چونکی مایتێکرن د سێکتەرێن دیتر دا چەندا خەلەت و نە ڕەوا بیت رێکەک دێ چیتێ ژبەرکۆ د جڤاکێن خودان دەستهەڵاتێن هەرێمی و هێشتا ب مافێ سەرخۆبوونێ شاد نەبووی و هەوڵێ بۆ ددەن هێشتا ب قۆناغا شۆڕەشگێریێ دهێنە هژماردن ، ئەڤ مایتێکرنێن دڤان سێکتەران دا ژ ئەنجامێ ململانا سیاسی و دابەشبوونا جڤاکێ کوردستانێ یە لسەر چەند لایەنێن سیاسی ، ژلایەکێ دیتر باوەریا خەلکی ب دەسهەڵاتێ لاواز دکەت .
لسەر ڤێ چەندێ را دەسهەڵاتا دادوەریا کوردستانێ شیایە خۆ لڤان قەرقەشێن سیاسی و دووبەرەکیا نەساخلەما حزبایەتی ب پارێزیت و نەکەفتیە بن باندۆر و کاریگەریا وان ،
ئەڤە ژی دەسکەفتەکێ هەرە مەزنە و پێتیڤەکا فەرە ئەڤ سەربخۆبوونە یا بەردەوام بیت و هەمی حزب و ئالیێن سیاسی و سازیێن ڕاگەهاندنێ پشتەڤانێن ڤێ چەندێ بن داکۆ سەروەریا یاسایێ باشتر بهێتە چەسپاندن و دادوەریا جڤاکی ببیتە بەرهەمێ سەروەریا یاسایێ .
مخابن پشتی دادگەهکرنا هندەک کەسان یێن بناڤ رۆژنامەڤان و چالاکڤانێن بەهدینان، نەرازیبوونا هندەک ئالیێن سیاسی لسەر بریارا دادهەگێ بوویە مژارا گەرما هندەک سازیێن ڕاگەهاندنێ و سۆشیال میدیایێ ، ئەڤەژی مایتێکرنەکا راستەوخۆیە ل کارو بارێن دادگەهێ و بەرەڤ بسیاسیکرنا دەسهەڵاتا دادوەری دچن ،
ئەڤە ژی کۆپیتکا بێ ڕەوشتیا سیاسی یە و دێ بیتە فاکتەر و ئەگەرێ بێ باوەریکرنا خەلکی ل دەستهەڵاتێ و زێدەبوونا روودان و رەفتارێن نەیاسایی .
ئەگەر ئەو کەس و لایەن راست بێژن د خەما هەرێما کوردستانێ و خەلکێ کوردستانێ و دەستهەڵاتا دادوەریا کوردستانێ، بلا دۆر ل بەرژەوەند و هەڤڕکیێن سیاسی چاڤدێریا دەسهەڵاتێ بکەن ب هەمی سازی و ئۆرگانڤە لسەر بنەمایەکێ دادوەری و یاسایی ، دۆر ل دابەشبوونا سیاسی و جوگرافیا کوردستانێ ، چونکی ئەڤ هەوێن تاوانبارکرنا دەستەڵاتا دادوەری ل کوردستانێ بێنەکا سیاسی یا زاڵ یا لێ دهێت و روودان و بوویەرێن مەزنتر ل دادگەهکرنا وان کەسێن بناڤ رۆژنامەڤان و چالاکڤانێن بەهدینان چێبوونە وەکی کوشتن و بێ سەرۆشوونکرنا راگەهاندکار و چالاکڤانان ، هەمان لایەنێن سیاسی و سازیێن وان یێن ڕاگەهاندنێ کپ و بێ دەنگ بوونە ....! چونکی ل فلان دەڤەرێ بوونە ، ئەوا بن دەسهەڵاتا فلان حزبێ ..!
خێرە ئەڤرۆ بووینە بەردەفک و پارێزەرێن تاوانباران ، ئەگەر بۆ بەرژەواندێن سیاسی و رەشکرنا دەستهەڵاتا دادوەریا کوردستانێ لپێش چاڤێن خەلکی و بێ بهاکرنا دەستهەڵاتا کوردستانێ بۆ سازیێن نیڤ دەولەتی .