بو وان كه‌سێن لبه‌ر زورنایا دوژمنان خو دهلاڤێژن
ژیان طاهر زێوه‌ی
د دیروکا مروڤاتیێدا گه‌له‌ك گه‌لێن بنده‌ست و سته‌م لێكری هه‌بووینه و هەنە. دیروکێ سه‌لماندیه كو پرانیا جاران دناڤ گه‌لێن بەلەنگازدا رێبەرێن دلێر و ژیر و بیرتیژ شورەش و بزاڤێن رزگاریخواز رێکخستینە و شیاینه رووپەلێن زێرین د مێژوویا گەلێ خودا تومار بكه‌ن و ببنه ستێرێن گه‌ش دئەسمانێ دیروکا گه‌لێ خودا. ناڤ و خەبات و بیرهاتنێن وان پێشرەوان هه‌رده‌م ژ بو گه‌لێ وان د پیروز و نەمرن و د جه‌سته‌یێ جڤاكیدا وه‌ك گیانه‌كێ بهێزن و هه‌میان ساخ و زیندی و كارا دهێلن.
گه‌لێ كورد ژی پتری سەد سالانە لژێر زولم و سته‌ما چوار داگیركه‌ر و زورداران دژیت. حه‌تا ئیرو چه‌ندین رێبەرێن دلێر مینا شێخ سه‌عیدێ پیران، پێشەوا قازی محمد، شێخ مه‌حموودێ حه‌فید و بابێ روحیێ نه‌ته‌وا كورد بارزانیێ نه‌مر رێبه‌راتیا شورەش و به‌رخودانان ژ بو رزگاریا گه‌لێ مه کرینە. رێبازا بابێ مەزن بارزانی حه‌تا ئیرو ژی وه‌ك فێرگه‌هه‌كا پیروزە بو هه‌می ولاتپارێز و شورەشگێرێن كورد یێن كو دزانن فیداکاری و قوربانیدان تاكه دیاریه كو مروڤێ ئازا، نیشتمانپەروەر و خەباتکار پێشکەشی دوزا رەوایا گەلێ خو بكه‌ت. ولاتپارێزی و نەتەوەپەروەری ب هه‌ر بهایه‌كێ بیت ژ ره‌فتار و كلتوورێ قوتابیێن فێرگه‌ها كوردایه‌تیێ یا بابێ روحیێ نه‌ته‌وا كوردن. بێ گومان سه‌روك مەسعوود بارزانی وه‌ك میراتگرێ وێ قوتابخانێ باش دزانیت كو ده‌مێ پیروزی و سه‌روه‌ریا نیشتمانی دكەڤیته د مه‌ترسیێدا، به‌ره‌ڤانیكرن و پاراستنا وێ ب هه‌ر رێیه‌كا بیت ئه‌ركه‌كێ ئه‌خلاقی، دینی و نیشتمانیێ وی یه و خه‌مساریكرن د وی ئه‌ركێ پیروزدا نه ژ ره‌وشت و رەفتارێن دەرچوویێن فێرگەها کوردایەتیێ یە. لەوما ده‌مێ ولات كه‌فتیه به‌ر هێرشا داگیركرنا دڕنده‌ترین هێزا تیرورێ ل جیهانێ، سەروک بارزانی ل هه‌می دەرگه‌هان دا و داخوازا هاریكاریێ ژ دوست و نەیاران کر. ئەگەر ژی ژ ڤێ چەندێ بتنێ نه‌بوونا چه‌كێ پێتڤی بوو بو به‌ره‌ڤانیكرنێ ژ ولاتی. بێ گومان ئەف چەندە ب كه‌سانێن ئاسایی نەدهاتە کرن. كه‌ساتیه‌كێ كاریزماتیک و نیشتمانپه‌روه‌ر و دلسوز بو گه‌ل و ولاتی پێتڤی بوو دا کو بشێت دوست و نەیاران ل خو کوم بکەت و ئه‌فسانا داعشێ تێك بشكێنیت. ئه‌و كه‌ساتیه ژی بتنێ سه‌روك بارزانی بوو كو سه‌ركردایه‌تیا به‌رگریكرنێ و ژناڤبرنا دژوارترین و درنده‌ترین نەیار و ئازادکرنا ئاخا پیروزا کوردستانێ و زڤراندنا ئاشتیێ بۆ دەڤەرێ و جیهانێ کر. راسته دوست و دوژمنان ب هنارتنا چه‌كێن پێتڤی ل هەمبەر داعشێ هاریكاریا پێشمه‌رگه‌ی كرن، لێ وان باش دزانی كو داعش مه‌ترسیه لسه‌ر هه‌می مروڤایه‌تیێ؛ نەیارێن مه ژی هه‌ست ب وێ مه‌ترسیا مه‌زن لسەر بەرژەوەندیێن خو كربوو، لەوما ژ نەچاری بریار دا هاریكاریا پێشمه‌رگه‌ی بكه‌ن.
سه‌روك بارزانی ئیرو ب كاریزما و نیشتمانپه‌روه‌ری و ئیرادا بهێزا خو بوویە ستێره‌كا گه‌ش د ئه‌سمانێ روژهلاتا ناڤیندا. لەوما نەیا سەیرە كو هه‌می هه‌ول و بزاڤێن نەیارێن گه‌لێ كورد ژ بو بچویككرن یان نەهێلانا كه‌ساتیا وی بن. باب و باپیرێن مە ژی راست گوتیە، دەما گوتی: »بەحر ب دەڤێ سا پیس نابیت». لێ یا نه‌ئاسایی و جهێ شه‌رمێ ئه‌وه كو هنده‌ك لایه‌نێن ناڤخویی لبه‌ر زرنایا وان نەیاران خو بهلاڤێن؛ ئەو ژی د ده‌مه‌كیدا كو ئه‌و باش دزانن كو هه‌بوونا ناڤێ كورد و كوردستانێ و شەرەفا پاراستنا نامیس و كه‌رامه‌تا كوردستانیان ل پلا ئێكێ بو قارەمانی و قوربانیدانا وان شوڕشگێران دزڤریت ئەوێن ل فێرگه‌ها بارزانیێ نه‌مر فێری خوگوریکرن و گیانفیداییێ بووین. ئه‌و باش دزانن هه‌بوونا سه‌روك بارزانی رامانا به‌رده‌وامبوونا راسته‌قینه‌یا خه‌باتا رزگاریخوازا گه‌لێ مه‌یه. به‌لگه ژی بو ڤێ چه‌ندێ ئەوە ده‌مێ جه‌نابێ وی ته‌حه‌ددایا هه‌می جیهانێ كری و تاپویا ریفراندوما سەرخوبوونا کوردستانێ بو هەر و هەر كریه د به‌ریكا هه‌ر تاكه‌كێ كوردستانیدا. لەوما دبێژینه وان لایه‌نان ئه‌گه‌ر وان پێ چێنابیت پیاوچاك بن، هه‌ر چ نه‌بیت بلا لبه‌ر زرنایا دوژمنان خو نه‌هلاڤێژن، دا کو دیروك ره‌حمێ ب وان ببه‌ت.
