ژیانا سیاسی د دیموکراسیەکا راستەقینەدا ب ھەڤرکیەکا ئازادانە یا بەرنامەیێن سیاسی برێڤە دچیت و بەروڤاژی ئەگەر لسەر بنەمایێ حەزێن تاکەکەسی و لابلا بیت، بێ گومان ژ لایێ جڤاکێ ڤە ناھێتە قەبوول کرن. ھەبوونا دووریاتیێ دناڤ ئەندام پەرلەمانێن ھندەک حزباندا ئەنجامێ پەروەردا وێ قووتابخانێ یە یا کو تێدا فێری خیانەتێ و فرووتنا کەرامەتا مللەتی و مافیاگەریێ بووین. ئابراھام لینکلن دبێژیت: «ژ بو ھندێ کو دوژمنێ خو ژ ناڤ ببەم ب دووریاتیێ و برێکا ھەڤالینیێ نێزیکی وی بووم». سەرەکیترین دوژمن بو کەسێن ل قووتابخانا خیانەتێ و مافیاگەریێ پەروەردە بووین، ئەو لایەنێ نیشتمانپەروەر و خونەویستە یێ کو پتریا جاران بەرژەوەندیێن نیشتمانی ئێخستینە سەر بەرژەوەندیێن خو و حزبا خو. بێگومان ل ھەرێما کوردستانێ چ حزب ژبلی پارتی خودان ھەلویستێن نیشتمانی و خونەویست نەبووینە و نینن. ژ بەر ھندێ ئارمانجا خاکفروش و مافیاگەرا بتنێ لاواز کرنا پێگەھێ پارتیە نەک خوشتر کرنا ژیارا خەلکێ ھەرێمێ. ژ لایەکیڤە ژ بو باشتر کرنا رەوشا ھەرێمێ ھەڤپەیمانیێ دگەل پارتی گرێددەن و ژ لایەکێ دیڤە ل بەغدا بەزەبەزا وانە بدویف پارتێن سیاسیێن بەغداڤە ژ بو رازیکرنا وان بو برسیکرنا خەلکێ ھەرێمێ.
پرسا نەدانا مووچەی و خراب بوونا سەروبەرێ ژیارا خەلکێ ھەرێمێ پێدڤی ب ‌نێرین و ھویربینیەکا کویرە و مخابن ل شوونا ھندێ کو ھەمی لایەن پێکڤە ھزر د چارەسەرکرنا ڤێ گرفتا گشتیدا بکەن و ب ھویربینی و ھەڤدەنگی موخاتەبا بەغدا بکەن، تووڤێ تێکدانێ و دووبەرەکیێ د ناڤ خەلکیدا دچینن و مللەت و حەزێن مللەتی بو خو دکەنە ئامیرێ بدەستڤەئینانا ئارمانجێن خو یێن چەپەل. ئەوا دوھی ل پەرلەمانی رویدای رەفتارەکا نابەرپرسانە و دویری ھەمی ئەتیکێتێن سیاسی بوو. لێ خوشبەختانە خەلکێ ھەرێمێ خەلکەکێ ژیر و ھشیار و بیرتیژە و باش دزانیت کو ئەو رویدان تنێ سناریویەکا بەرنامەکری بوو ژ بو دسەردابرنا وان و ترانەکرن ب ھەست و سوزێن وان. ئەو کەسێن ئەڤرو ل پەرلەمانی ژ ئوپوزسیونێ پتر دەنگەدەنگ و قەرقەشە دکر، د گەل مللەتی د راستگو نینن. چونکی ھەر ئەو کەسە بوون یێن کو ھەڤالێن وان ل بەغدا ھەمی ھەولێن خۆ داینە و ددەن دا کو حکوومەتا فدرالی پارێ ھەرێمێ نەھنێریت. گەلێ کوردستانێ باش دزانیت ئەگەر ئەو حزبە د راستگو بان، ڤیابا بەری ھەر تشتەکی گازی پەرلەمانتارێن خو یێن بەغدا کربا و بتوندی سزا دابان و ژ بەر خوفروشی و خیانەتا نوینەرێن خو ل باوەریا خەلکی داخوازا لێبورینێ ژ خەلکێ ھەرێمێ کربا. ھەروەسا ئەگەر راست دبێژن و د خەما مللەتیدانە، دەمێ رێککەفتن دگەل پارتی ئیمزا کری کو پێکڤە بەرھنگاری گەندەلیێ ببن ڤیابا ھەر چ نەبیت بو سەلماندنا نیازپاکیا خو و راستگو بوونا خو دگەل مللەتی، بەری ھەر تشتەکی داھاتێ گومرکێن پەرویزخان و باشماغێ ژ دەستێن مافیایێن سلێمانیێ ئینابادەرێ و رادەستی حکوومەتێ کربا دا کو حکوومەت بشێت گرفتێن ھەرێمێ و پرسا مووچەی چارەسەر بکەت.