ب ھەلکەفتا سێ ساڵیا کارەساتا خیانەتکاریا مەزنا نشتیمانی یا ١٦ ێ ئکتۆبەرا سالا ٢٠١٧ مەکتەبا سیاسی یا ئێکەتیا نشتیمانی کوردستان راگەھاندنەک بەڵاڤکریە، بەری ھندەک خال و مژارێن وێ راگەھاندنێ بەرچاڤ بکەم من دڤێت بێژم ، بەری دەقا راگەھاندنێ بخوینم ئەز دلخۆش بووم چونکی من وە ھزر کر سەرکردە و داینەمۆیێن وێ خیانەتێ بڤێ ھەلکەفتێ داخازا لێبۆرینی ل خەلکێ کوردستانێ نەخاسمە کەرکووک و دەڤەرێن کوردستانی یێن دەرڤەی ئیدارا ھەرێما کوردستانێ و ماڵباتێن شەھید و بریندار و پێشمەرگەھی ئاوارە و زیان ڤێکەفتیێن ڤێ خیانەتا مەزن کریە ، من نەزانی کۆ بڤێ راگەھاندنێ یێن خیانەتەکا دیتر ل خەلکێ کوردستانێ دکەن ..!
نە من ئەو ماف ھەیە و نە وی مافی ددەمە خۆ بەرسڤا ڤێ راگەھاندنێ بدەم چونکی ئەز نە بەردەفکێ چ لایەنا مە ، لێ وەکی کوردەک ووژدانا من قەبۆل نەکر لسەر وان ھەمی درەو و بەرۆڤاژیکرنا روودان و بوویەرێن شازدێ ئکتۆبەرا سالا ٢٠١٧ بێ دەنگ بم .
دەربارەی دەرئەنجامێن ١٦ ئکتۆبەرێ گۆتیە : ژبەر زنجیرەکا پێشبینیێن خەلەت و بریارێن نەخەملاندی یێن سیاسی و ستراتیژی بوویە ، مەبەستا وان راپرسیە , کارەسات بسەر دۆزا گەلێ کورد ئینان و پاشڤەکێشان ل دەسکەفتێن گرنگێن ھەرێما کوردستانێ و .... ھتد کرینە .
ئەگەر راپرسی ئەگەر بیت ، بۆچی پارتیا وە ب رەنگەکێ ئاشکرا پشتەڤانیا راپرسیێ دکر و پرانیا ئەندام و لایەنگرێن وە دەنگ ب راپرسیێ دا ، ژوانا جێگرێن سکرتێری و ئەندامێن مەکتەبا سیاسی و ھەڤسەرۆکێن نھۆ ..! راپرسیی بریارا سەرکردایەتیا خەلکێ کوردستانێ بوو ھەمی پارتیێن کوردستانی پشتەڤانی لێکریە ، ئەز باوەرم ئەگەر بەرھەمێ راپرسیێ بدەست ھاتبا ( سەرخۆبونا کوردستانێ ) ھنگ بەری ھەر کەس و لایەنەکی دا شانازیێ پێ کەن و بۆ خۆ وەکی دەسکەفتەکێ مەزن ھژمار کەن .
لێ پێشینەیا وە یا خیانەتا نەشتیمانی زێدەتر ل ھەر جار ئازریا و چاڤ ب ئازادی و بەرختەوەریا کورد و کوردستانێ و بەرەڤ سەرخۆبوونێ رانەبوون لەوما وە پەنا برە بەر ڤێ خیانەتا مەزن و راکێشانا ھێزێن داگیرکار بۆ داگیرکرنا کوردستانێ ب مەبەستا ژناڤبرنا قەوارێ ھەرێما کوردستانێ و دەسکەفتێن گەلێ کورد نەک ئەنجامدانا راپرسیێ .
ھەر وەسا وێ خیانەتێ ئاژاوە و دووبەرکی ل کوردستانێ دروستکر نەک راپرسیێ ، بەرۆڤاژی راپرسی مەزنترین ئێکرێزی و ئێکگرتنا خەلکێ کوردستانێ و ھێز و ئالیێن سیاسی و جڤاکی یێن کوردستانێ بوون .
دەربارەی نەبوونا بەرچاڤڕوونیا راپرسیێ ژی ، ئەگەر ھنگ راست بێژن پێتڤی بۆ وەکی حزبەکا مەزنا کوردستانێ بەری راپرسیێ مەترسییان بۆ خەلکێ کوردستانێ و سەرکردایەتیا کوردستانی دیار کربان ، نەک پشتەڤانیێ لێ بکەن و پاشان ب تاوان ھژمار بکەن ..!
یا ئاشکرابوو کۆ حکومەتێن وی دەمی یێن ئیراقێ بەرھەڤیێن باش کربوون بۆ لاوازکرنا پێگەھێ ھەرێما کوردستانێ ژلایێ سیاسی و ئابووری ، چونکی لدەمێ ئینانا ھێزا بناڤێ دیجلە بۆ داگیرکرنا کەرکووکێ و بڕینا بۆدجە و مۆچێ کوردستانێ و شایستێن پێشمەرگەھی و فەرامۆشکرنا ماددێ ١٤٠ دەستووری چ راپرسیی نەھاتبوونەکرن ..!
لێ ھوون یێن ھەمان پڤ دکەنە ھەمان بۆقا وەلات و ھێزێن داگیرکار ، ئەو کەس و لایەنێن پێشی حەشدا شەعبی و میلیشیایێن وەلاتێن ھەرێمی کەفتی بۆ داگیرکرنا کوردستانێ بوونە ئەگەرێ لدەستدانا زێدەتر ل نیڤا ئاخا کوردستانێ و خەلکێ کوردستانێ شەپرزە کر ، نەک سیاسەتا ھەرێما کوردستانێ و حزبەک و کەسەکێ دیار کری .
دەربارەی فەرماندێن ھێزا ھەفتێ ژی ، چ شک تێدا نیە کۆ فەرماندە و پێشمەرگەھێن کورد پەروەر و قەھرەمانن ، لێ بریارێن سیاسیێن ھەرزەکارێن ئێکەتیێ ئەو پێشمەرگەە و قەھرەمان شەرمزار کرن و نەچار کرن ب چاڤێن پڕ رۆندک و ھەستەکا پڕی خەم و کۆڤان چەکی دانێن و کەرکووکێ ب بێ دەنگی رادەستی ھێزێن داگیرکار بکەن و رێکێ ڤالا بکەن بۆ داگیرکرنا پرانیا ھەرێما کوردستانێ ، نەک ھێزێن دیتر مەبەستا وە ھێزێن پارتی نە .
ئەگەر ھێزێن دیتر ل پردێ و سحێلا و مەحموودیێ و تلسقۆف بسەرپەرشتیا سەرۆک بارزانی و فەرماندێن دیتر نەبان ئەڤرۆ رەوشا ھەمی ھەرێما کوردستانێ مینا کەرکووکێ بیت .
ئەرێ پرانیا ھێزێن پێشمەرگەی ل کەرکووکێ و دوروبەر بن فەرمانا وەدا بوون یان پارتی کۆ ھێزێن وە لبەرامبەر ھێزێن ھێرشبەرا تنێ بھێلن ..!
ئەرێ قوربانیدانا ئێکەتیێ ل شازدێ ئکتۆبەری ژ بلی رادەستکرنا کەرکووکێ و دەڤەرێن دیتر و بێ رێزیکرن بەرامبەر پیرۆزیێن گەلێ کورد وەک شەھید و ئالا و رەمزێن کورد چ بوویە ...! ڤێجا گونەھە ھوون بەحسێ بەرگریێ بکەن ..!
لداویێ بەحسێ ژێک جوداکرنا سەرکردێن ریفراندۆمێ و بەرگریا پێشمەرگەھێن ئێکەتیێ کریە ل مێژوویێ ، ھەر ل وێ رۆژێ بەری بچیتە دناڤ لاپەرێن دیرۆکێ خەلکێ نشتیمان پەروەر و وەلات پارێز سەرکردێن خیانەتکار و ریفراندۆمچی ژێک ڤاڤارتنە و ھەردوو ھەلبژارتنێن ھەرێما کوردستانێ و عیراقێ دیدەڤانن .
برەنگەکێ گشتی ئەڤ راگەھاندنا مەکتەبا سیاسی یا ئێکەتیا نشتیمانی کوردستان سەد دەر سەر رووداو و بوویەرێن ١٦ ئکتۆبەری بەرۆڤاژ کرنە کۆ ھێشتا خۆینا شەھیدا ھشک نەبوویە و دیدەڤانێن وێ ژی ھەمی د زیندی نە ، دیارە ھوون یێن نزانن کۆ ھێشتا خەلکێ کوردستانێ گاڤێن وە یێن خیانەتکاریێن بەری دەھان سالا ژبیر نەکرنە ، دێ چەوا ھوون شێن روودانێن دوینێ لپێش چاڤێن خەلکی و لسەردەمێ ڤێ تەکنۆلۆژیایێ و سۆشیال میدیایێ کۆ ھەمی رووداو و بوویەر ددیکۆمێنت کری ڤەشێرن و بەرۆڤاژی کەن ..!
ئەرێ پشتی ب دەھان سالێن دیتر ھوون دێ چەوا ڤێ خیانەتا مەزن برۆڤاژی تۆمار کەن و بۆ خەلکی ڤەگێرن ..!
دگەل رێزێن تایبەت بۆ وان ھەمی خەباتکار و سەرکردە و پێشمەرگەھێن نشتیمان پەروەر یێن دناڤ ئێکەتیا نشتیمانیا کوردستانی و خەبات و قوربانیێن وان ، لێ مە بڤێت و نەڤێت ئەو باندێ خائین و خۆفرۆشێن شازدێ ئکتۆبەرێ ئەڤرۆ نوونرایەتیا وان دکەن ، چونکی بریار بدەستێن وانن و پرانیا ئۆرگانێن ئێکەتیێ داگیرکرنە .