ڕاپرسیا سەرخۆبوونا ھەرێما کوردستانێ ئەوا لرۆژا ٢٥ ێ ئیلوونا سالا ٢٠١٧ ب دەستپێشخەری و سەرپەرشتیا رێبەرێ گەلێ کورد سەرۆک مەسعوورد بارزانی ب سەرکەفتیانە ھاتیە ئەنجامدان ،
مینا ھەر پرۆسەیا ڕاپرسیێ بوو ، ژبووی دیارکرنا پاشەرۆژا سیاسیا خەلکێ کوردستانێ .
ھەرچەندە ڕاپرسی وەکی پرۆسە گاڤەکا نۆرماڵە بۆ وەرگرتنا دیتن و بۆچوونا پڕانیا خەلکێ وەلاتی لسەر پرسەکا دەستووری یان نشتیمانی یان شێوازەکێ دەسھەلاِتێ و ....ھتد
خەلکێ ھەرێما کوردستانێ ژی برەنگەکێ دیموکراسی و ئاشتیانە دڤێ رۆژدا بریارەکا دیرۆکی و چارەنڤیسساز دا ، دەمێ ب ڕێژەیەکا زۆر و ب پڕانی ، دەنگێ، بەلێ بۆ سەرخۆبوونا کوردستانێ دای .
ئەڤەژی ڕەوایەتیێ ددەتە پرۆسێ و نیشانێ سەرکەفتنا وێ یە .
ھەرچەندە بۆ گەلێ کورد و کوردستانیا ڕاپرسیی پرۆسەیەکا دیموکراسی بوو ژبووی پرسەکا سیاسی و چارەنڤیسێ خەلکێ کوردستانێ ، ھەر ل ئامادەکاریێن ڕاپرسیێ ھەتا ئەنجامدانا وێ و ھەتا نھۆ ژی زۆر گۆتار و بابەت و مژارێن تایبەت لدوور لایەنێ سیاسی و ئەگەر و مەبەستێن ڕاپرسیێ و چاوانیا ئەنجامدان و رێڤەچوونا وێ و کارڤەدانێن پشتی وێ ھاتینە نڤیسین و رێڤەبرن .
لێ ئەوا من دڤێت ئاماژێ پێ بدەم ئێک رێزیا کورد و کوردستیانە ل ڕاپرسیێ ، چونکی ب درێژاھیا دیرۆکێ گەلێ کورد و ھێز و ئالیێن سیاسی یێن کوردستانی ھەردەم د ناکۆک و نە ئێکگرتی بوویە لسەر پرسێن سیاسی و زۆر جاران ئەڤ دووبەرەکیە بووینە رێگر لھەمبە پێشڤەچوونا دووزا سیاسی یا کوردستانی و بدەستڤەئینانا دەسکەفتێن نەتەوی و نشتیمانی و مەترسی لسەر دەسکەفتێن ھەیی ،
گەھشتیە وی ئاستی ھندەک جاران لایەن و کەسایەتی ژبوو پاراستنا بەرژەوەندێن خۆ یێن تایبەت پەنایێ بۆ ھێز و وەڵاتێن داگیرکار ببەن دژی ماف و بەرژەوەندێن گەل و وەڵاتێ خوو ،
ھەرچەندە زۆر جاران ھەوڵێن ئێکرێزیا ھێز و ئالیێن سیاسی یێن کوردستانی ھەبووینە لێ یان سەرنەگرینە یان ژی د دۆمدار نەبووینە .
ئەز باوەرم کۆ ھەردەم دەستێن سێیێ دناڤ ھەولێن ئێکرێزیا کوردستانێ ھەبوویە ، چونکی دوژمن و نەیار کاریگەریا ئێکرێزیا ھێز و ئالیێن سیاسی دزانن ژبووی بەرڤ پێشڤەبرنا دووزا سیاسی یا کوردستانێ و بدەستڤەئینانا ئارمانجێن مەزنتر یێن نەتەوەیی و نشتیمانی ، لەوما ئەو ھەوڵ دایە .
لدەمێ ئامادەکاری و ئەنجامدانا راپرسیا سەرۆخۆبوونا کوردستانێ ژی ئەوا لرۆژا ٢٥ ێ ئیلوونا سالا ٢٠١٧ ھاتیە ئەنجامدان ، دوژمن و نەیاران ب ھەمی ڕەنگ و شێوازان ھەوڵێن درۆستکرنا دووبەرەکیێ دناڤ ھێز و ئالیێن سیاسی یێن باشوورێ کوردستانێ و ھەڵوەشاندنا بریارا ئەنجامدانا وێ دان ،
لێ ب ھەوڵً و خەمخۆری و دووربینا رێبەرێ گەلێ کورد و کوردستانیا ( سەرۆک مەسعوود بارزانی ) ئەو ھەمی ھەوڵ وپیلان ھاتنە ھەڵوەشاندن و کۆدەنگیا پڕانیا پارتیێن کوردستانی و رێکخراوێن جەماوەری و پیشەیی و نەحکومی .... ھتد لسەر بریارا ئەنجامدنا ڕاپرسیێ دابین کر .
پشکداریا بەرفرەھا خەلکێ ھەمی دەڤەرێن کوردستانێ یێن لسنوورێ ئیدارا ھەرێما کوردستانێ و دەرڤەی ئیدارێ وەکی کەرووک و شنگال و دەوروبەرێن موسل ب ھەمی تەخ و چین و ئۆل و ئەتنڤە ل راپرسیا سەرۆخۆبوونا کوردستانێ دیسان دەسکەفتەکێ مەزنێ نشتیمانی بوو و وەکی پرۆژەیەکێ سەرکەفتیێ نەتەوی و نشتیمانیێ ئێکرێزیا کوردستانیان دھێتە دیتن .
دڤێردا دیار دبیت کۆ خەلکێ کوردستانێ تێھنیێ ئێکرێزیا پارت و ئالیێن کوردستانی یە و سەرۆک مەسعوود بارزانی ژی ئەندازیار و داکۆکیکارێ ڤێ ئێکرێزیێ و ئەنجامدان و سەرپەرشتیا راپرسیێ بوو ، ئەو ناکۆکی و دووبەرەکیێن ھەی ژی دژی خواست و ھیڤیێن خەلکێ کوردستانە و ھندەک کەس و ئالیێن سیاسی ب پیلانێن دوژمن و داگیرکارا درۆست دکەن ژبۆ پاشڤەبرنا پرسیا سیاسی یا کوردستانێ و لاوازکرنا پێگەھێ ھەرێما کوردستانێ لسەر ئاستێ نیڤ دەولەتی و ھەرێمایەتی .
ھەروەکی پشتی راپرسیێ سەرکردێن پارتیەکا دیارکری ژبووی پاراستنا بەرژەوەندێن خۆ یێن حزبی و ئابووری پەنا بۆ وەلاتێن داگیرکار بری و بوونە پشکەک ل لەشکرێ دوژمنا بۆ داگیرکرنا ھەرێما کوردستانێ و لناڤبرنا دەسکەفت و قەوارێ ھەرێما کوردستانێ ل ١٦ ێ ئکتۆبەرا سالا ٢٠١٧ .
لێ ڕاپرسی و ئەنجامێن وێ کۆ بریارا پرانیا خەلکێ کوردستانێ بوو، دێ مینیت پرۆژەیەکێ بەرھەمدارێ نەتەوەیی و نشتیمانی و ئێکرێزیا خەلکێ کوردستانێ و سەرۆک بارزانی ژی داینەمۆ و ئەندازیارێ وێ .