لدەمەکی دا کۆ پارتی دیموکراتی کوردستان مژویلی ئەنجامدانا چالاکیێن یۆبیلا زێڕینا دامەزراندنا خۆ بوو ، و بڤێ ھەلکەفتێ دەستپێشخەریێن ئاشتەوایی بۆ بنبڕکرنا شەرێ ناڤخۆیی ئاراستە دکرن ، لایەنێ بەرامبەر لجھێ قەبوولکرنا وان دەسپێشخەریا بھەلکەفتا یۆبیلا زێرین یا پارتی و ئاراستەکرنا پیرۆزباھیان، دگۆت لجھێ پارتی بڤێ ھەلگەفتا چالاکی و ئاھەنگا ئەنجام بدەت، بلا قەبرێ خۆ بکۆلیت ..! چونکی ببونە پشکەک ل پیلانگێری و کۆدەتایەکا ھەرێمایەتی دژی پارتی و قەوارێ ھەرێما کوردستانێ ب سەرپەرشتیا ئیرانێ و خۆ پشتراست کربوو ، کۆ پیلانا وان دێ بسەرکەڤیت .
نەکەفتنا پارتی بۆ داخازی و ئەجندایێن ئیرانێ ژبووی لێدانا حزبێن رۆژھەلاتێ کوردستانێ ، کۆ ئێکەتیا نشتیمانی بشانازیڤە داخازیا ئیرانێ بجھـ ئینا و لرۆژێن ١٦ و ٢٧ /تەمۆزا ھەمان سال ب پاڵپشتیا ئیرانێ ب دژواری ھێرش برنەسەر برنەسەر بارەگایێن پارتیێن رۆژھەلاتێ کوردستانێ ، ژلایەکێ دیتر ئێکەتیێ تووڕەبوونا ئیرانێ ل پارتی ب دەلیڤە زانی بێخیتە د بەرژەوەندێن خۆ یێن تایبەت بۆ لێدانا پارتی و بەرنامەکێ تێر و تەسەل دژی پارتی ھاتبوو دارشتن دناڤبەرا ئێکەتیێ و پەکەکێ ب پاڵپشتیا ئیرانێ .
ئیرانێ پشکداریەکا راستەوەخۆ ل شەرێ دناڤبەرا پارتی و ئێکەتی ھەبوو و پاسدار و ئتیلاعاتێن ئیرانێ پرانیا دەڤەرێن کوردستانێ یێن بن دەسھەلاتا ئێکەتیێ کۆنترۆلکربوون و لبەرەیێن شەری ژی تۆپ و رەسەدێن وان دەست ب شەرەکێ دژوار کر و پەکەکێ ژی ژ ئالیێ خۆڤە دەست ب شەریکر .
ئەڤە پلانەکا دارشتیا ئیرانێ بوو، ژبۆ داگیرکرنا پرانیا ھەرێما کوردستانێ .
برەنگەکێ گشتی ئێکەتی و پەکەکە ببونە جێبجێکارێن پیلانا ئیرانێ بۆ داگیرکرنا ھەرێما کوردستانێ و ژناڤبرنا قەوارێ ھەرێما کوردستانێ و جڤاکێ نیڤدەولەتی ژی وی دەمی یێ بێ دەنگی بوو ..!
تنێ دوو رێک لھەمبەر پارتی مابوون ، یان رادەستبوون ب ئیرادەیا ئیرانێ ، یان ژی ھەلوەشاندنا وێ پیلانێ بھەر رەنکەکێ ھەربیت .
رادەستبوون ژی رەوشا پشتی خیانەتا ١٦ ئیکتۆبەرێ ل کەرکووک و دەڤەرێن کوردستانی دا لسەرانسەرێ ھەرێما کوردستانێ ھێت ، لەوما پارتی باشترین رێک ھەلبژارت بۆ ئینان پشکەکا لەشکرێ عیراقێ بۆ دەمەمەکێ دەستنیشانکری داکۆ دەستێ ئیرانێ ل ھەرێمێ دوور بکەت و قەوارێ ھەرێما کوردستانێ بیارێزیت ، ئەو قەوارێ چەندین سالە خەلکێ کوردستانێ خەون پێڤەددینیت و قوربانیا ژپێخەمەت بەلکێ سەرکەفتنەکا مەزن بوو کۆ پارتی شیا ھەرێما کوردستانێ ل پیلانەکا مەزنا ھەرێمایەتی رزگار بکەت ، ئەز دبینم کۆ ٣١ ێ ئاب ھەڵوەشاندنا کۆدەتایەکا مەزنا ھەرێمی و نافخۆیی بۆ دژی ھەرێما کوردستانێ کوردستانێ ، بسیاسەت و ئیرادەیەکا بھێزا نەتەوی و نشتیمانی و بکۆژا خیانەتا خووشکا خیانەتا شازدێ ئکتۆبەرا سالا ٢٠١٧ بۆ ل کەرکووک و دەڤەرێن کوردستانی یێن دەرڤەی ئیدارا ھەرێما کوردستانێ، چونکی بکێمترین زیان مەزنترین مەترسی ل ھەرێما کوردستانێ دوورکر .
٣١ ێ ئاب، نە خیانەت بوو نەژی جاشایەتی ، چونکی پاراستنا دەسکەفتێن نەتەوی بھەر رەنگەکی بیت ناچیتە دچارچۆڤێ خیانەتێ دا ، ھەرگرتنا چەکێ دۆژمنی دژی ماف و بەرژەوەندێن گەل و ەلاتی جاشایەتی یە ، نەک دۆژمن ب چەکێ خۆ بەرەڤانیێ ل دوژمنەکێ تە یێ مەزنتر بکەت ، ئەگەر ٣١ ئاب جاشایەتی بیت ، لەشکرێ عیراقێ ببو جاشێن پارتی .
ئەوێن پیلانا خیانەتکاریا ١٦ ئکتۆبەرێ دارشتی ، درێژەپێدەرێن خیانەتا لسالا ١٩٩٦ نە و ئەڤرۆ ژی ھەلگرێن ھەمان بۆچوون و پیلانن، بۆ لاوازکرنا قەوارە حکومەتا ھەرێما کوردستانێ، لبن ناڤ و ئەجدایێن دیتر .
ئەوێن وی دەمی دگۆت لجھێ چالاکیێن یۆبیلا زێرین ، بلا پارتی تربێ خۆ بکۆلیت، پلانێن وان بۆ وان بوونە ترب .
نە قەوارێ ھەرێمێ ب وان ژناڤچوو ، نەژی پارتی پێ لاواز بوو ، نە مەرامێن وان بوونە دارێن بەرگرتی .
چونکی پارتی داکۆکیکارا ماف و ئارمانجێن خەلکێ کوردستانێ یە و ژپێخەمەت بدەستڤەینان و پاراستنا وان ماف و ئارمانجان خەباتێ دکەت و قوربانیا ددەت ، لەوما چ جارا باوەریا خەلکی ژدەست نەدایە ، پشتی بوورینا ٢٤ سالا بسەر وێ روودانێ ، لسەر دەستێ پارتی ھەرێما کوردستانێ دھێتە پاراستن ل مەترسی و پیلانان .