رەگەزپەرستی، نەدادپەروەری، زولم و زورداری، یان ژی گەلەک جاران حەزا بدەستڤەئینانا دەستھەلاتێ ژ ئەگەرێن سەرکییێن پەیدابوون و درستبوونا پارتێن سیاسی و سەرھلدان و شورەشانن د ناڤ ھەر مللەتەکیدا. د دیروکا مروڤایەتیێدا دگەل پێشکەفتن و شارستانیەتێ بەردەوام بزاڤ و پێکول ژ بو بدەستڤەئینانا ئازادی ودادپەروەریێ ھاتینە کرن. ب سەدان شورەش و سەرھلدان ژ ئالیێ گرووپ یان پارتێن سیاسی ڤە ژ بو دەستەبەرکرنا مافێن سیاسی، جڤاکی، ئابووری و چاندی ھاتینە کرن.
ھەردەمێ ئارمانج ژ درستبوون و لڤینێن پارتێن سیاسی و شوڕشان درستکرنا کەنالەکێ پەیوەندیێ دناڤبەرا دەستھەلاتێ و مللەتیدا ژبو پڕکرنا ڤالاتیا دناڤبەرا جڤاکی و دەستھەلاتێدا بوویە، ھندی کو ئەو بزاڤ د دوومدرێژ و ب زەحمەت و ب قوربانیدانەکا زور ژی بووینە، ل دوماھیێ سەرکەفتن ھەر بەھرا وان بوویە. شوڕشا نێلسون ماندێلای دژی ئاپارتایتێ ئانکو رەگەزپەرستیێ ل ئەفریقیا باشور، و بزاڤا مھاتما گاندی دژی ئمپراتوریا بریتانی ژ نموونێن ھەری زیندی و سەرکەفتینە کو بووینە قووتابخانە و ھێمایێن ئازادیخوازان ل جیھانێ.
بەروڤاژی وێ چەندێ، دەمێ کو مەرەم ژ بزاڤ و چالاکیێن سیاسی و درستکرنا گرووپ و پارتان بدەستڤەئینانا دەستھەلاتێ و ھێزێ ژ بو بەرژەوەندیێن کەسوکی یان بەرتەنگ بیت، ھندی کو یا ب بەرھەم و ئەنجام ژی بیت، ل دوماھیێ رویێ راستیێ بۆ مللەتی دیار دبیت و شکەستنا سیاسی دبیتە دوماھیکا وێ. گەلەک پارت و لایەنێن سیاسی ب ڤی ئاوایی ل جیھانێ ب گشتی و ل ھەرێما کوردستانێ ب تایبەتی ھاتینە د گوڕەپانا سیاسیدا.
پارتا دیموکراتا کوردستانێ ب رێبەریا مستەفا بارزانیێ نەمر کو کەساتیەکێ ب کاریزما و نیشتمانپەروەر بوو ل ١٦ تەباخا ١٩٤٦ێ ھاتە دامەزراندن. بارزانی ھەمی خوشیێن ژیانا خو پێخمەت خوشی و سەربەستی و ئازادیێ ژ بو ھەمی تاکێن کوردستانی ‌دانە لایەکی. پارتی ھەر ژ دەستپێکا دامەزراندنا خو بڕیار دا خەباتێ ژ بو رزگاری و سەرفەرازیا گەلێ کوردستانێ، ژ بو دیموکراسیێ و دادپەروەری و یەکسانیا جڤاکی بکەت. پارتی ب درێژاھیا حەفتێ و چار سالێن بزاڤا رزگاریخوازا خو ژ بو ئاڤاکرنا جڤاکەکێ شارستانی و پاراستنا مافێ ھەر تاکەکێ کوردستانی بێی جیاوازیا ئولی، نەتەوی و رەگەزی ھەوڵ دایە. کرێکار، جوتیار، زانا، بسپور، نڤیسکار، ھزرڤان، ئافرەت، قوتابی، لاو، موسلمان، کریستیا‌ن، ئێزدی، شەبەک، کاکەیی، تورکمان و ھەمی پێکھاتێن ئۆلی و نەتەوی ژبۆ دەستەبەرکرن و پاراستنا مافێن خو یێن رەوا، خو د بازنەیا سیاسەت و ستراتیژیا پارتیدا دیتیە و دبینن. ئەڤ حزبە پشتی ھەر شکەستنەکێ ب ھێزەکا خورتتر و ب باوەریەکا موکومتر ڕابوویە سەر پێ و چرایێ خەباتێ ھێلایە ھەل و شوڕشەکا ئاگرینتر ڤەژاندیە. زیندان، ئەشکەنجە، توپباران، ئەنفال، کیمیاباران، دەربدەری، ئاوارەیی و تەعریب نەشیاینە ئیرادا وێ یا پیلایین بشکێنن یان لاواز بکەن یان باوەریا مللەتی ل ھەمبەر وێ ژ ناڤ ببەن. نھا ژی د سەر ھەبوونا گەلەک پیلانێن تێکدەرانەیێن ناڤخوویی و دەرەکیێن ھەڤرک و نەیارێن دۆزا رەوایا گەلێ کورد را ژ بۆ لاوازکرن و ژناڤبرنا ھێز و پێگەھێ پارتی، ئەڤێ حزبێ ب ئیمانەکا مەزنتر و ب ھێزەکا خورتتر ل بەر خو دایە و ژ بۆ پاراستنا ماف و دەستکەفتیێن کو ژ ئەنجامێ خەباتەکا مێژوویی بدەستڤە ھاتینە ھەول ددەت و بزاڤێ ژ بو نێڤنەتەوی کرنا پرسا سیاسیا گەلێ کوردستانێ و درستکرنا ئاشتی و ھەڤدەنگیا نیشتمانی دکەت.
بێ گومان شکەستنا ھەول و بزاڤێن نەیارێن پارتی ژ بۆ لاوازکرنا پێگەھێ وێ و ژناڤبرنا باوەریا مللەتی ب وێ ژ ئەنجامێ وی بناخێ سیاسی و ستراتیژیێ بھێزە کو ئەڤ پارتە لسەر ھاتیە ئاڤاکرن، کو ئەو ژی ئارمانجێن نەتەوی و نیشتمانیێن گەلێ کوردستانێنە. ژ بو ڤێ چەندێ ژی پارتی ھەمی کادر و ئەندام و لایەنگرێن خۆ ب ھەمان رێباز و ب ھەمان باوەرا خو گوریکرنێ پەروەردە کرینە و دکەت و چ جاران سازش لسەر مافێن گەلێ کورد نەکریە و ناکەت و ھەردەم ھەوڵ ددەت پێنگاڤان ژ بو پاشەروژەکا گەشتر بھاڤێژیت. لەوما ھەردەم گەل پشتەڤان و سەروکانیا ھێزا پارتی بوویە.
ب ڤێ ھەلکەفتا پیروز، رێز و سلاڤان بۆ گیانێ پاکێ تەڤایا شەھیدێن رێیا ئازادیێ و سەرکاروانێ وان بارزانی نەمر و ئدریسێ ھەردەم ساخ دھنێرین. سلاڤ و رێز بۆ ھەمی کادر و ئەندام و لایەنگرێن پارتی دیموکراتی کوردستان و پێشمەرگێن قارەمان کو ھەردەم سینگێ خۆ کریە قەلغانا پاراستن و بسەرئێخستنا ئەزموونا کوردستانێ.