هه‌می پارت و لایه‌ن و هه‌ر تاكه‌كێ تێگه‌هشتی و خودان وژدان دزانن ئه‌ڤ قه‌یران و گیروگرفتێن ل هه‌رێما كوردستانێ هه‌نه ژ كیڤه و چاوا سه‌رهلداینه. ژ لایه‌كیڤه په‌تایا كرونایێ به‌روكێن هه‌می ولاتێن جیهانێ گرتینه و تووشی قه‌یرانێن مه‌زنێن ئابووری كرینه. مخابن كوردستان ژی بێ باهر نه‌بوویه ژ وێ داكه‌تنا ئابووریا جیهانی و كێمبوونا بهایێن نه‌فتێ و راوه‌ستیانا كرین و فروتنا وێ و كێمبوونا ئالوگورا بازرگانی و راوه‌ستیانا هاتنوچوونێن گه‌شتیاری زیانه‌كا مه‌زن ل ئابوورا كوردستانێ دایه. ژ لایه‌كێ دی ژیڤه هنده‌ك لایه‌نێن بناڤ نوینه‌رێن گه‌لێ كورد ل به‌غدا هانده‌ر و پالده‌رێن سه‌ره‌كی بووینه بۆ نه هنارتنا پاره‌ی بۆ هه‌رێمێ ژ لایێ حكومه‌تا به‌غداڤه. دڤان سه‌روبه‌نداندا گه‌له‌ك یا بزه‌حمه‌ته حكومه‌ت بشێت وه‌كی به‌رێ موچێن فه‌رمانبه‌ران بمه‌زێخیت. به‌لێ پا د سه‌ر ڤان هه‌می ئاسته‌نگان را، حكومه‌تێ وه‌ك ئه‌ركه‌كێ مروڤایه‌تی و ئیداری و نیشتمانی هه‌می هه‌ولێن خۆ داینه و دده‌ت دا كو بارگرانیا دارایی لسه‌ر ملێت ملله‌تی كێم ببیت و ژیارا خه‌لكی به‌ره‌ڤ خرابتربوونێڤه نه‌چیت. هه‌ر ژ به‌ر ڤێ چه‌ندێ حكومه‌تـێ بڕیاره‌كا به‌روه‌خت ژ بو كێمكرنا رێژا 21% یا مووچێن فه‌رمانبه‌ران دا. ئه‌ڤه ژی بریاره‌كا سروشتی و ساخله‌مه و هه‌ر كه‌سه‌كێ هشیار و تێگه‌هشتی دزانیت كو ده‌ما داهات كێم بوو، دڤێت خه‌رجی ژی كێم ببن. حكومه‌ت بڤێ بڕیارێ یا بهیڤیه كو بشێت ئێدی به‌رده‌وام و بێی گیروبوون مووچه‌یان بمه‌زێخیت. ئه‌ڤ بڕیاره ژی ب ئێكده‌نگی و به‌شداریا هه‌می تیمێن ئه‌نجومه‌نێ وه‌زیران و ب پشته‌ڤانیا نوینه‌رێن هه‌می حزب و لایه‌نێن به‌شدار د كابینا نه‌هێدا هاتیه دان. لێ مخابن دیارده‌كا نه ته‌ندروست دناڤ پارت و لایه‌نێن سیاسیدا( كو هنده‌ك ژ وان بخو به‌شه‌كن ژ ئه‌گه‌رێن په‌یدابوونا قه‌یرانا ئابووری ل هه‌رێمێ) ئه‌وه كو ژ لایه‌كیڤه دكومبووناندا به‌شدار و پشته‌ڤانێن بڕیارێن حكومه‌تا هه‌رێما كوردستانێنه و ژ لایه‌كێ دیڤه وه‌ك ئوپوزسیونه‌كا نه‌ساخله‌م چاڤێن خۆ ل قه‌یرانان گرتینه و بێی به‌رچاڤگرتنا كاودانێن ئابووری یێن جیهانی و ناڤخویی ئاسته‌نگان بۆ ئیداره‌دانا هه‌رێما خو د خولقینن و بزاڤێ دكه‌ن ملله‌تی ل هه‌مبه‌ر حكومه‌تا وان یا دلسوز و خزمه‌تكار بئازرینن. ژ لایه‌كیڤه دگه‌ل گورگی خوشیێ ژ خوارنا كاركی دبه‌ن و ژ لایه‌كێ دی ڤه دگه‌ل شڤانی دكه‌نه گری.
یا فه‌ره گه‌لێ مه وه‌ك هه‌رجار هشیارانه و زیره‌كانه روودانا و كاودانێن جیهانی و ناڤخویی بهه‌لسه‌نگینیت و گورگی و شڤانی ژێك بڤاڤێریت.
ژیان طاهر زێوه‌ی
