ل چەرخێن ناڤەراست دا و بتایبەت ل سەردەمێ خیلافەتا عەباسی دەولەتداری پێشکەفت و بریار ھاتە دان کو وەزارەت وی دەمی کو ب (دیوان) د ھاتنە نیاسین ل بیاڤێن جودا بێنە ئاڤاکرن و کار گەھشتە وی ئاستی گەندەلیێ خوە ل ھەمی بابەتا دا و دیوانەک تایبەت ھاتە ئاڤاکرن بناڤێ (دیوان الازمە) بو ھندێ چاڤدێریا دیوانێن دیتر بکەن کو چ سەختە و گەندەلی و واستە و واستەکاریا نەکەن و کار و کریارێن دەولەتێ ب عەدالەت و دیر ژ ھەمی شاشی و غەشەکێ ب رێڤە ببەن , لێ گەندەلی ئێشە زور زووی بلاڤ دبیت و خەلیفە مەھدی کورێ ھارون رەشیدێ عەباسی نەچار بو دیوانەکا دیتر بو چاڤدێری کرنا دیوانا الازمە ئاڤا بکەت بناڤێ (زمام الازمە) داکو سنورەکێ بو ڤێ گەندەلیێ دانیت کو ئێشا سەرەکیە بو بو ژناڤبرنا ئەزمون و خەبات و دەلەتان و وی دەمی ھەتا رادەکێ شیا بازنا چاڤدێریکرنا گەندەلیێ و حاشیا خوە کورت بکەت .
د نھا دا ھەرێما کوردستانی توشی ئێشا گەندەلیێ بویە چاوا ئیبولا ل روژئاڤا ئەفریقیا بلاڤ دبو و ئەنفلوەنزا ل سەرانسەرێ جیھانی و دبو مەترسی ل سەر مروڤاتیێ . ب وی ئاستی گەندەلی کاریگەریەکا خراب ل سەر کوردستانیان و ئەزموزن و خەبات و قوربانیدانا وان دکەت .
ئەگەر بپرسین چارە چیە ؟
پشتی بیست و حەفت سالێن حوکمرانیا کوردی خەلک ب وێ چەندێ نەگەھشتن کو خەبات و بەرخودان بوکری و روژبو روژ قەیران و ئاریشە دزێدەبونێ دانە و مەترسی کەفیتە ل سەر پێکھاتێن جڤاکی ھەمی ژ وێ گوشێ دئێن کو دادی د ڤی وەلاتی دا نینە و خەلک ھەتا رادەکێ زور بێ ھیڤیە بویە و گەندەلکار ژی بێ ئێک و دوو چەپ و راست لێددەت ! فەرە سەروکێ ھەرێما کوردستانێ ل ئەولەویاتێن خوە دانیت دژاتیا گەندەلیێ و کار بکەت ئەوێن کو سامانێن ڤی وەلاتی د خون بێ کو ھیچ حیسابەکێ بو قوربانی دانا ڤی گەلی بکەن بێنە سزادان و رەزیلکرن و زیندانکرن , ھەروەسا دێ د جھێ خوەدا بیت سەروک و سەرکردێن کوردان ژ خوە و دەوروبەرێ خوە ژی دەست پێ بکەن و گەندەلیێ ئادە و بژارە بکەن و نەھێلن کەس بناڤێ وان و ھەبونا پەیوەندی دگەل وان گەندەلیێ بکەن و پیروزیێن وەلاتی ئیدی بلا نەبن پەردە بو گەندەلا , لەوما قوربان فەرە دەست پێکێ ژ دەوروبەرێ خوە بپرسی و نەھێلە ڤی وەلاتی ب وەلاتی ڤە گەندەل و وێران بکەن , زورگرنگە وەکی خەلیفە مەھدی لێژنەک بو چاڤدێریا وان بێتە ئاڤاکرن کو ئەوێن چاڤدێریا خەلکی دکەن و نەھێلن دەسەلاتا وان یا رەھا ببیتە رێکەک بو گەندەلیێ . ھەروەسا ئەرکێ راگەھاندێ و روشنبیر و چالاکڤان و نڤیسەر و سیاسی و زانایێن ئاینی و رێکخراوێن جڤاکێ سڤیلە ئەو ژی گەندەلیێ ب ھەتکرن و خیانەتا بدەنە نیاسین و وەلاتیان ژ مەترسیی و کاریگەریێن وێن خراب ھایدار بکەن و حزبێن سیاسی ژی خەباتا خوە گوری گەندەلەکێ نەکەن تنێ ژ بەر وێ چەندێ کو کادرێ وانە .
گەندەلی ب شێوازەک مەزن ل کوردستانێ بلاڤ بویە و روژ بو روژێ د زێدەبونێ دایە و شیانێن وەلاتی بێ بەرھەم دکەت و خەلک و حکومەتێ ژێک دوور دکەت وباوەریێ دەف وەلاتیان نا ھێلیت و کێمینە دبیتە مفادار و زورینە ژبن پێیا دچیت . لەوما زور گرنگە دیروکێ بکەینە پەند و شیرەت و مفایێ ژێ وەربگرین و نەھێلین کو ئەزمونێ ھەرێما کوردستانێ بو حەزا چەند گەندەلا بەرەف لاوازیێ بچیت و داویێ ب ئارمانجا سەرەکی نەگەھین کو سەرێ چەندین سالانە خەباتێ بو دکەین , ناڤبرنا گەندەلیێ و ئادەکرنا وێ دەستپێکێ ئەرکێ سەرەکی یێ سەروکێ ھەرێمێ یە و دیڤدا حکومەت و پەرلەمان و ھەمی سازیێن وەلاتی و فەرە ژ سەروکانیێ دەست پێ بێتە کرن و دەست ژ ناڤ دەست بین بو ژ ناڤبرنا ئێشا کوژەک و دژە دەستکەفت و ھێزا میللەتان و گەھشتن ب دادگەریێ کو خەونا ھەر میللەتەکێ یە . و ب ھیچ ئاوایەکێ نابیت حاشیە و دەردورێن بەرپرسێن وەلاتی رێگر بن کو دەنگو باس و نەخوشیێن وەلاتیان بگەھنە جھێن بلند ئەگەر نە وەکی کوردەواری دئێـتە گوتن تەر و ھشک دێ ھێنە سوتن و سەرکردەێن پلە ئێک دێ بەرپرس بن ژ ڤێ گەندەلیا بلاڤ بوی ب رەنگەکێ زور.