پول برێمه‌ر حاكمێ مه‌ده‌نیێ عیراقێ ژ ده‌سپێكا كه‌فتنا رژێما دكتاتور سه‌دام حسێنى بیرهاتن و هه‌مى كار و كریارێن خوه ل په‌رتوكه‌كێ بناڤێ (سالا من مه بوراندى ل عیراقێ), دارێشتینه و پرسێن جودا جودا و به‌حس ژ سه‌ركردێن عیراقێ دكه‌ت پشتى سه‌دامى ب سیاسیێن كورد ژى ڤه . لێ یا من دڤێت د ڤێ گوتارێ دا به‌حس ژێ بكه‌م ئه‌وه كو برێمه‌ر د لاپه‌ره ( 330) ل سه‌ر وێ سه‌ره‌دانا خوه د گه‌ل چار ژ به‌رپرسێن مجلس الحكم ئه‌و ژى عدنان پاچه‌چى و ئه‌حمه‌د چلبى و عادل عبدالمهدى و موفق روبێعى بون , بو ده‌ف سه‌روكێ رژێما به‌رێ ل زیندانه‌كێ دا كو وه‌سف دكه‌ت و ئه‌و وه‌لاتێ پان و به‌رین هه‌مى ژێ بویه ئێك ژوورا ته‌سك و تارى و بێ خودان بابه‌ت ئه‌و نینه كو سه‌دامى و سه‌ركردێن وه‌كى وى ده‌مێ گرنگیا ده‌سه‌لاتێ و نیعمه‌تا خوه‌شیا نه‌زانى و ده‌سه‌لات ب مولكێ خوه و بنه‌مالا خوه زانى و هه‌مى ژێ بویه نیقمه‌ت و ده‌ردو به‌لا . بابه‌ت ئه‌و پرسیار بون كو هه‌ر چار عیراقیان ژ سه‌دامى كرى و هه‌مى قوربانیێن ده‌ستێ رژێما فاشى و شوڤینیا سه‌دامى بون . بوچى ته كورد ئه‌نفال كرن ؟ یێ دى دگوت ته بوچى كیمیا باران باژێرێ هه‌له‌بجه دكر ؟ ئه‌وێ دى ب توره‌ى ڤه دگوت ته بوچى ئایه‌تو الله و زانا و كه‌ساتیێن شیعه كوشتن ؟ ئه‌وێ دی دگوت ته بوچى هێرشى كوێتێ كر ؟ سه‌ركردێ دى دگوت ته بوچى ب ڤى شێوازى سه‌ره‌ده‌رى دگه‌ل وه‌لاتێ خوه كر.....؟ ده‌هان پرسێن دیتر ژى هه‌بون كو ل دكتاتورێ عیراقێ بكه‌ن و ئه‌و بو ل دادگه‌هێ هه‌مى پرسێن ژێ كرن و ل داویێ ل روژه‌كێ دا سێداره‌دا كو هه‌مى بسلمان ل خوه‌شى و جه‌ژنێ دابون. لێره‌دا ئه‌گه‌ر ب پرسین ئه‌گه‌ر سه‌دام و دكتاتورێن جیهانێ ب درێژاهیا دیروكێ رێك دابا گه‌لێ خوه و ئه‌و كه‌سێن ل ده‌وروبه‌ر,ئه‌رێ وه‌لات دا ب ڤێ ره‌وشێ گه‌هن و چاره‌نڤیسێن وان زیندان و سێداره بیت ؟!! بێگومان چاره‌نڤیس ئه‌ڤه نابیت و دێ گه‌ل و وه‌لات ب ئازادى و دیموكراسى و خوشگوزه‌رانیێ گه‌هن, ئه‌گه‌ر سه‌ركرده ب ویژدان كار بكه‌ت و رێكێ ل گوتنا باش نه‌گریت .
پشتى بیست و حه‌فت سالێن ده‌سه‌لاتداریا كوردى فه‌ره ئه‌م ژ خوه بپرسین ئه‌م دێ نها ل سه‌ركرده و سه‌روك و رایه‌دار و حكومه‌ت و حزبێن خوه پرسین و ره‌خنێن ئاڤاكه‌ر و ب به‌دیل و جدى و ب ویژدان ژێ گرین ؟ یان وى ده‌مى كو وه‌لات دبیته پارچه‌ك ژ وێرانى و گه‌نده‌لى و نه‌دادى و بێ ره‌حمى و دزى و تالانیى و بنده‌ستى و بێ یاسایى و بێ خودانیێ؟جیهانا پێشكه‌فتى ئه‌وه كو وه‌لاتى خوه‌دى بریار بن و حكومه‌ت خزمه‌تێ بكه‌ت په‌یمانه‌ك د ناڤبه‌را وان دا هه‌یه خزمه‌ت ل حكومه‌تێ و ده‌نگ و پشته‌ڤانى ژ خه‌لكى . د هه‌رێمێ دا خه‌لك هێشتا ب وێ پلا رازیبونێ نه‌گه‌هشتیه كو بێژیت من ده‌نگ و پشته‌ڤانى هه‌بوینه و خزمه‌ت ژى گه‌هشتیه ! نه‌خێر د نها دا نه‌دادى و گه‌نده‌لى و واسته و واسته‌كارى و ده‌سه‌لاتا كورێن جاش و مسته‌شارا و ئاغا و به‌گان ل سه‌ر كورێن فه‌قیر و ژارو و شه‌هید و پێشمه‌رگه‌یان هه‌یه .هه‌روه‌سا ئاستێ خزمه‌تگوزاریانه ب شێوازى یه كو دئێته گوتن و وه‌لاتى كه‌فتینه د ناڤ كومه‌ك ژ كێشه‌یان دا كو ئه‌گه‌ر نیه‌ته‌ك سافى و ویژدانا پێشمه‌رگه‌یانه هه‌بیت وى ده‌مى دێ ب حوكمه‌كێ ره‌شید و نه‌زیه و دادوه‌رگه‌هین .دیروك بو هندێ یه كو په‌ند و شیره‌تان ژێ وه‌ربگرین نه‌ك بو هندێ بیت تنێ بخوینین و ژ ل سه‌ر لاپه‌ریان تومار بكه‌ین . ئه‌ڤرو ئه‌م پرسێن خوه ل سه‌ركردێن كوردستانى بكه‌ین و ئه‌و ژى دیف شیان و ب پلان و ئارمانجه‌ك روون و خزمه‌ته‌ك به‌رفره‌ه ل ناڤ وه‌لاتیان دا بن , وى ده‌مى دێ ب كوردستانه‌ك ئارام و دیر ژ ده‌ست وه‌ردان و هه‌ژاریێ گه‌هین , كو بدیتنا من ده‌رفه‌ت هه‌یه و خه‌باتا كوردستانیان هه‌ژى زێده‌ترێ یه .
ساڵح زاهێر زێباری
