پشتی نیزیکی سێ سەد روژان ژ گیروبونا پێک ئینانا کابینا نوی و رێککەفتنا داویێ یا ئالیێن سەرەکی یێن ھەرێما کوردستانێ ل سەر پرسێن گرنگ و چارەنڤیس ساز , کوردستانیان خوە ژ بەرامبەر قویناغەک نوی دیت د ھەمی بیاڤەکێ حوکمرانی و سیاسی و ئابوری ڤە و بریارە کو کوردستان یا بھێز بیت , و ئەگەر ھەمی کریارێن شاش ژی نەئێنە ژ ناڤبرن ژی دڤێ قویناغێ دا ھندەک نەمینن و رێک ژ ھندەکان بێتە گرتن و پشکەک ژ وان ژی برێژەیی بێنە کێم کرن. لێ فەرە دەمێ ئەو ھزرە بو پاشەروژێ ب ھەر وەیی و ساناھی نەئێتە کرن و بریارێن جدی و ب ویژدان و ب کریار بێنە دان و مەترسیی ژی بێنە بەرچاڤکرن .
د قویناغا چویی دا حکومەتا ھەرێما کوردستانێ دیف شیان بریارێن چاکسازیێ دان و نێچیرڤان بارزانی دەھان جاران دووپاتی ل سەر بەردەوامی دان ب کاروانێ چاکسازیی دا و کارەک باش ژی ھاتە کرن , ل داویی گوتارا خوە دا ژی ل سەر ئاریشا مەزن کو ریبریێ سێکتەرێ ئابوری و وەبەرھێنان و خوەشگوزەرانیا وەلاتیان بو دیار کر ئەو ژی شەرێ داعش و قەیرانا ئابوری ب ئەگەرێ داکەفتنا بھایێ نەفتێ و ھاتنا نیزیکی سێ ملیون ئاوارە و پەنابەران و قوتکرنا بەھرا کوردستانێ ژ بودجەی بو. د نھا رەوشا کوردستانێ باشتربویە و ئەو تونێلا تاری کو د ھاتە گوتن رووناھیا وێ نیزیک بویە. پێشھاتێن نوی یێن ھەرێمێ ھەتا رادەکێ دلێ وەلاتیان خوەشکریە ئەو ژی ژبەر وێ ل ھەڤھاتنا دناڤبەرا پارتی و ئێکەتی دا ل سەر سێ پاکێجێن جودا و دەست برن بو پرسا چاکسازیێ و کارابونا سەروکاتیا ھەرێمێ و باشتربونا رەوشا نافخوی د ھەمی بیاڤەکێ دا . لێرەدا ئەڤ قویناغە بێ مەترسی نەبویە و نابیت ژی و فەرە بەردەوام کار بێتە کرن بو ھندێ ئەو قەیرانێن کوردستانی تێدا دەربازبوی دووبارە نەبن , ژ وان مەترسیان :
تێکچونا ناڤ مالا کوردی
ژ دەردێن ئەزەلی و بەردەوامێن کوردان ب درێژاھیا دیروکێ ھەتا نھا نەبونا ئێکگرتنەکا موکم بویە ل ناڤ ھێزێن سیاسی و بریار بدەستێن کورد ئەڤ مەترسیی ل چەرخێ میرگەھان ھەتا نھا ئەو بەردەوامە ل سەر بونا گەلێ کورد , لێرەدا ئەرکێ سەرەکی یێ نێچرڤان بارزانی یە وەک سەروکێ ھەرێما کوردستانێ ب رولێ خوە رابیت و کار بکەت بەردەوام بو رێکخستنا ناڤ مالا کوردی ل ھەرێمێ و ھەتا ل پارچێن دیتر ژی یێن کوردستانێ بو ھندێ ھێزا کوردان چ جاران بو ئالوزیێن نافخوی نەچیت , ڤێ مەترسیێ ل سەر پاشەروژا کوردان نە ھێلیت و ئەرکێ ھەمی ئالیەکێ سیاسی یە ژی کو بەرژەوەندیا بلند یا کوردستانێ ل بەرچاڤ وەربگریت .

ئابورێ تاک داھات و پشتبەستن ب بەغدا
د کوردەواریێ دا زور بەحس ژ ھندێ ھاتیە کرن کو ھەم تاک و مال و خێزان و جڤاک سەربەخو بن ژ ئالیێ ئابوری ڤە دا کو سەر یێ سلامەت بیت و زک یێ تێر بیت و بریارا یا وێرەک و سەربەخو و زیرەکانە بیت و دیر بیت ژ بێ کەسایەتی و لاوازیێ ,دنھا سیستەمێ ئابورێ کوردستانێ ژی وەک پشکەک ژ عیراقا فیدرال داھاتێ سەرەکی ژ نەفتێ د ئێتە و ئابورێ تاک داھات ژی ژ ئابورێن لاواز و نە ئارام و بەردەوام مەترسیا قەیرانان ژێ دئێتەکرن. لەوما فەرە حکومەتا ھەرێمێ ب پلانەکا ستراتیجی کار بکەت بو ھندێ گرنگیێ ب چاندن و گەشت و گوزار و پیشەسازیێ و دەستێ کار و شیانێن مروڤی بدەت و داھاتێ نەفتێ بکار بینت بو ھندێ سێکتەرێن دیترێن زیندیێن وەلاتی پێ بھێزبکەت .
مەترسیا وەلاتێن دەوروبەر
دەھان جاران رایەدارێن ھەرێمێ ئەو چەندە دووپات کریە کو ھەرێما کوردستانێ کارەکتەرێ ئێمناھیا دەڤەرێ یە و چ جاران نابینە جھێ ئالوزی و تێکدانا رەوشا دەوروبەران و ئەف دەستکەفتا نەتەوەی یا کوردی نابیت ببیتە پالدەر کو ھێزێن کوردی ب مالا خوە بزانن و رێزێ لێ نەگرن و فەرە رێزێ ژ سەروەریا حکومەتا ھەرێما کوردستانێ بگرن و ب کوردی و کورتی ھیجەتێ نەدەنە دەستێ دوژمنێن کوردان کو چاڤێ وان ب ھەرێمێ نارابن , د نھا دا شەرێ تورکیا و پەکەکێ گەھشتیە قویناغەک مەترسی دار و چەند شەرێ وان گەرم دبیت ھندی دیتر ھەرێما کوردستانێ دبیتە قوربانی و بسەدان گوندێن کوردستانێ ھاتینە چولکرن و ھاڤینگەھێن کوردستانێ ھاتینە بەتالکرن و چاندن ھاتیە بەردانەڤە و مفا ژ وان گوندان نائێتە وەرگرتن و مەترسی نیزیک بویە ژ ئاکرێ و ئامێدی و زاخو و باژێران ب گشتی , لێرەدا حکومەتا عیراقێ فەرە رولێ خوە ببینت و پەکەکە ھیجەتێ نەدەتە دەستێ تورکیا کو کوردستانێ ب ڤی ئاوایی ریبریێ مەترسیێ بکەت و تورکیا ژی ب توپ و فروکان نەشێت شورەش و بزاڤ و ئیرادا نەتەوەیەکێ خوەدی دوزەک رەوا ژ ناڤببەت و فەرە سەدامی بکەنە نموونە بو ھندێ دەستی بو چارەسەریا ئاشتیانە ببەت ژ جھێ شەری.
سەد گوتن گوری کریارەکێ بن
دەمێ دئێتە گوتن کو دێ رەوش باش بیت و گاڤێن ستراتیجی دێ ئێنە ھاڤێتن بو ھندێ ب حوکمەک رەشید و دەسەلاتەک دادپەروەر بگەھین و گەندەلی نەمینیت و چاکسازیی رولێ خوە ببینت و ئیدی دێ ب کوردستانەک بھێز بگەھین , پرسیارا وەلاتیان ئەوە ھەتا کەنگی دێ ئەم ب وان دەرئەنجامان گەھین ؟ لێرەدا زور یا گرنگ سەروکێ ھەرێمێ و پەرلەمانێ کوردستانێ و حکومەتا ھەرێما کوردستانێ وەک ئێک تیم کار بکەن دیر ژ دەستێ حزبی و بەرژەوەندیێن کەسی بو ھندێ ئەو بریارێن د ئێنە دان ل سەر ئەردی دەنگڤەدانا خوە ھەبیت و ژین و ژیارا وەلاتیان خوەش بیت , ل داویێ قویناغەک پری مەترسیی ل پێشە تنێ ب رێکخستنا ناڤ مالا کوردی و کارکرن بو بھێزکرنا کوردستانێ ژ ئالیێ ئابوری و نەھێلانا مەترسیا حزبێ ل سەر ھێزێن چەکدار و حکومەتا مەدەنی و دیرکرنا مەترسیا گەفێن وەلاتێن دەوروبەر و کارکرن ب ویژدان و چاخێ گوتنا ب داوی ھات و دەم دەمێ کریارایە و خەلک ل گوتنان تێر بویە.