ل داوی گوتارا خوە دا نێچیرڤان بارزانی سەروکێ ھەرێما کوردستانێ دووپاتی ل سەر کار کرن و گرنگی دان ب شیانێن گەنجان کرن و ھەروەسا باس ژ ھەفکاریا د ناڤبەرا کەرتێ گشتی و تایبەت و پلانێن گرنگی دان و بەردەستە کرنا کاری و ژیانەکا خوەش و سەربلند بو کرێکار و دەرچویێن زانکویا ژی کر و داخاز ژ گەنجان کر (ھزربکەن و داھێنانێ بکەن ) , زور گرنگە بزانین کو ئەرکێ حکومەتێ یە کەشەکێ ئارام بەرھەم بینیت بو ھندێ کو وەلاتی تێدا ھەست ب ئێمناھیا و بوونا خوە بکەن و دیڤدا گاڤێن گرنگتر بێنە ھاڤێتن .
د جیھانا پێشکەفتی دا ھزکرن و داھێنانبەردەوامن و زورەک ژ وان داھێنان و پێشکەفنا ژی بەرھەمێ ئەقلێ روژھەلاتێ یە بگشتی تێدا ژی کورد , ئەرێ بوچی د ھەرێمێ دا ئەم ب بەرھەمێ قویناغا ھزرکرن و داھێنانێ نەگەھشتینە؟ سروشتێ مروڤی ھەر ژ کەڤندا ھزرکرن بویە و چ جاران ل ڤێ پروسێ دیرنەکەفتی و دیر ژی ناکەڤیت لێ گەھشتن ب بەرھەم و پێشکەفتن و دەستکەفتیێن ماددی و مەعنەوی ئەو چەندەیە یا جھێ پرسیارێ و ل سەر راوەستیانێ و ئەوا کو رەخنێ دروست دکەت و وەلاتەکێ بێ سامانێن خوەزایی دکەتە پێشکەفتی ترین وەلات و خوەشترین وەلات و ئێکێ ژی خوەدیی ھەمی سامانەکێ خودێ دایێ و ل سەر ئەردی برسی و پێخاسە ! کەتوارێ ھەرێمێ ھەتا نھا حکومەت و خەلک و دەسەلاتداری وەکی کوردەواری دئێتە گوتن (نان و زکبویە ) و دەربازکرنا روژان بویەو پلانێن ب وی ئاستی نەبوینە کو ئیرو ل قەیرانان دا نەبین یان مەترسیا کێشەێن بەردەوام نەبیت . لەوما فەرە دەستپێکی د پەیروپراگرامێن پەروەردێ و خاندنا بلند دا گرنگیی ب ھزرکرن و داھێنان و بەرھەم ئینانا خواستەکێن وەلاتی بێتە دان و ئەڤ سیستەمێ خاندن و پەروەردە و فێرکرنێ د ھەرێمێ دا ھەتا رادەیەکێ ئاستەنگە ژ بەرکو پرانی ل سەر ژبەرکرنێ یە بەروڤاژی سیستەمێن جیھانی کو گرنگیێ ب چالاکی و داھێنان و زیرەکیا تاک و خواستا فێرخوازی ددەن , لێرەدا گرنگە رولێ دەولەتێ ل بەرەف پێش برنا خواستا فێرخواز و تاکێ کوردی ل پرسا ھزرکرن و داھێنانێ دا دگەل بەردەستەکرنا ئێمناھیا تاک و جڤاک و بەرھەڤکرنا بوجەیەکێ تایبەت بو داھێنان و گەنجێن بەرھەمدار و زیرەک و خوەدی شیان و دروستکرنا سەنتەر و پروژێن زانستی و مروڤایەتی و دروستکرنا کونتاکێ ل گەل جیھانا دەرڤە و ھنارتنا گەنجان بو جیھانا پێشکەفتی و ئینانا راھێنەر و داھێنەرێن جیھانی و رێزگرتن ل قەلەمێ رەخنەگر و داھێنەر بو ھندێ برینا وەلاتی و ژەھرا ھەمی ئاریشەیان دیار بیت و چارەسەر بو بێتە دیتن و بگەھین ب کنارێن پێشکەفتن و ئێمناھیێ . ھەروەسا ئەرکێ تاک و جڤاکی ئێک ب ئێک ھەفکار بن ل گرنگی دان ب شیان و زیرەکیا د کەسەکێ دا ھەیە و ئەو چەندە بێتە ژ ناڤبرن دەمێ کو شیانێن گەنج و داھێنەرا دئێنە ژناڤبرن ب گوتن و ھزرێن نەرینی و نەریتێن جڤاکیێن پاشڤەمایی . داھینان و ھزرکرن و گەھشتن ب ئەنجامێن وێ واتا خوشیا ژین و ژیارێ و دەرباز بون ل قویناغا بێ ھیڤی بون و بێ بەرھەم بونێ و ئیدی تاک د ڤێ قویناغێ دا دبیتە سەنتەرێ بریارێ و حکومەتەک باش و بەرھەمدار و بھێز بەرھەم دئێتە شیانێن مروڤی و ئابوری و سیاسی و سەربازی و ماددی و مەعنەوی ل وەلاتی دا دمینن . کارێ سەنتەرێن ڤەکولینێ و رێکخراوێن جڤاکێ سڤیل و راگەھاندن و روشنبیر و نڤیسەر و ماموستایێن ئاینی یە کو بەردەوام کار بکەن بو ھندێ تاکێ کورد ب تایبەتی فێرخواز قویناغا ھزرکرنێ و داھینانێ بەرەف پێش ببەت و گرنگی ب وان شیانا بێتە دان و ئەو سەرمایێ گرنگێ مروڤایەتیێ کو بنگەھێ پێشکەفتنا ھەر ھەمی وەلاتان بویە ب درێژاھیا دیروکێ و نھا خزمەتا وەلاتێن جور ب جورێن جیھانێ دکەن دووبارە ب ھەفکاریا حکومەت و کومپانیا و سەرمایەدار و زانکو و سەنتەرێن ڤەکولینێ بێنەف کوردستانێ و خزمەتا کوردستانیان بکەن . ئەگەر ب پرسین چین و یابان و کوریا و ئەوروپا بگشتی و ئوسترالیا و ئەمریکا و ھەتا ھندەنک ژ وەلاتێن ئەفریقی وەکی رواندا چاوا پێش کەفتن ؟ چەند ھوکارێن ھەفپشک ژ وانا و ئەڤ چەند خالە ژی بێنە بەرچاڤ وەرگرتن:
- ئێمناھیا سیاسی و ئەو وەلات و کیشوەرێن سەری ناڤێن وان ھاتین ھەر ھەمیا قویناغا شەر و ئالوز و تیرور و شەرێ نافخویی دیتیە و گەھشتینە وێ تێگەھشتنێ کو ئیدی شەر و ئالوزی مفادار نینە و تنێ ئێمناھیا سیاسی چەترە بو ھەمی پێشکەفتنەکێ و نمونە وەکی رواندا ل داویا سەد سالا بیستان دا ب سەدان ھزار کەس ھاتنە کوشتن ل شەرێ نافخوی د نھادا کەفتەی سەر سککەیێ پێشکەفتنێ ژبەرکو ئێمناھیی سیاسی ھەیە و تاک ھەست ب ھەبونا خوە دکەت.
- تاک ببیتە سەنتەرێ گرنگی پێدانی ژ ئالیێ حکومەتێ ڤە و بەرژەوندیێن حزبی و کەسی کاریگەریێ ل سەر گرنگی دان ب داھێنەرا نەکەن .
- گرنگی دان ب وان فێرخوازێن خوەدی پروژەیێن گرنگن و داھێنانێ دکەن .
- کومپانیایێن نافخوی و بیانی بێنە نەچارکرن کو گرنگی ب شیانێن گەنجێن بەرھەمدار بکەن .
- ھەبونا پلانێن ستراتیجی دەم کورت و ناڤەند و درێژ و بجە ئینانا وان بێ ھزرکرن ل بەرژەوەندیێن سیاسی و حزبی و کەسی و بنەمالەیی .
- گرنگی دان ب شیانێن نافخوی و ڤەکرنا ڤیستەڤال و ئەنجامدانا چالاکیان بو بەرھەمدارێن وەلاتی .
- ھزرکرن و داھێنان و گەھشتن ب پێشکەفتنێ و بەرھەمەک باش و ژینەک پری سەرفەرازی بو جیھانێ فەرز و کیفایە بیت بو کوردستانیان ژ بەر وێ دیروکا پری نەخوشی دبیتە فەرز و عەین .