ھەر ژ روژا دروستکرنا دەولەتەتێن نەتەوەی و نەخشێن سیاسی و وەلاتێن بێ ھەبونا ھەفپشکێن کونکرێتی ل روژھەلاتا ناڤین دا , و بێ بەھر کرنا کوردان و پارڤەکرنا وان ل سەر دەولەتێن دەردور لدیف بەرژەوەندیا سەردەستێن جیھانێ و وەلاتێن ئیقلیمی . ئەگەر ب زولم و ستەم و ئاگر و ئاسن و شەر و سوتن و جینوسایدنەبیت ئێمناھیا دەسەلاتدارێن داگیرکەر دڤیاییخوە ژ ڤێ دەڤەرێ نەکریە مێڤان.لەوما یا چاڤەرێ کریە نەتەوەیەکێ خوەدی ھەمی بنگەھێن نەتەوە بونێ و خوەدی دیروک و شارستانی و سنور و زمان و کلتور ...تد. بێ دەنگ نەبیت و بەردەوامیێ ب خەباتا خوەیا سەربلندیێ بدەت ھەتا بگەھیتە مافێن رەوا و سادە وەک ھەر گەل و نەتەوەیەکێ دەڤەرێ دا .
تورکیا و ئیران و عیراق و سوریا خوەدی کێشەیەک ھەفپشکن ئەو ژی ھەبونا کوردانە ل وان وەلاتان دا و بێ بەھرکرن و رەتکرنا مافێن وانە یێن سیاسی و نەتەوەی و دیروکی . سەد سالێن بوری بەس بون بو وێ چەندێ کو گەلێن دەڤەرێ ب ھەمی پێکھاتێن خوەڤە بەری دەسەلاتێ کو دانپێدانێ ب مافێن کوردان بکەن و پێکولا چارەسەرکرنا وێ کێشێ بکەن ل جھێ رەتکرنا رەھا و پیروزدانانا سنور و دەسەلاتێن خوە . ئەرێ نھا رەوشا گەلێ کورد چاوایە ؟ گەلو کورد کارەکتەرێ شەری یە ل دەڤەرێ ؟ چ دکەڤیتە سەر ملێن کوردان ل ھەر چوار پارچێن کوردستانێ ؟
ل دەستپێکا سەدێ بیست و ئێکێ پتر شەر و ئالوز و کێشێن مەزن و دەستێن دەرەکی و ھەڤرکیێن توند و پێکدادانا بەرژەوەندیا کەفتە د روژھەلاتا ناڤین دا و رەوشا سیاسی ئالوز و خراب یویە و دەڤەر بویە گورەپانەک ژ تاریاتی و تێکدان و پاشڤە زڤرین و لێدانێ, کورد ل ڤێ ھەفکێشێ دا بێگومان ھەردەم پتر دکەڤیتە بەر گەف و شەر و مەترسیێ ئەو ژی ژ بەر ھەبونا دوژمنێن مەزن و زور و بەردەوام و نەبونا چ کیانەکێ سیاسی تایبەت ب کوردان ڤە . پشتی بەھارا عەرەبی کو زویی ژێ بوی پایز ل سوریا رەوشا کوردان بەرەف باشتر چو و لێ ھەتا نھا مەترسیێن نافخوی و دەرڤە ھەنە و پێتڤی ب چاکسازی و رێکخستن و پلانێن موکم و بھێز ھەیە , ھەروەسا باکور و روژھەلات ژی ب رەوشێن گران و مەترسیی دار دەرباز دبن و بەردەوام کار ل سەر بێ بەھرکرن و ناڤبرنا وان دئێتە کرن و رەوشا سیاسی زور خرابە و خەباتا چەکداری و سیاسی و کلتوری بەرەف پێش دچیت ل بن دەنگێ چەکی. ھەرێما کوردستانێ د نھا دا بەرەف باشترە لێ ئێک رێزێ ژ ھەمی ئالیەکێ د ئێتە خاستن و بەردەوام کار دڤێت بو گەھشتن بو حوکمەکێ رەشید کو د نھا دا ئەڤ گاڤە نیە ل ھەرێمێ دا .
زور جاران سەرکرداتیا سیاسی کوردی ئەو چەندە دووپات کریە کو بەردەوام کورد کارەکتەرێ ئێمناھیێ و ھەفسەنگیێ بوینە ل روژھەلاتا ناڤین و چو جاران گەف نەبوینە بو وەلاتێن دەڤەرێ و ھەرێما کوردستانێ دیف سیاسەتا رەسمی ئەوە کو ھەر پارچەیەک ل کوردستانا مەزن خەباتا خوە دیف رەوشا خوە بکەت و رەوشا ھەرێمێ ل بەرچاڤ وەربگرن و داوی گوتار ژی دا ل پاریس کاک نێچیرڤان بارزانی ئەو چەندە دووپات کریە کو فەرە ھەر پارچەیەک ل کوردستانێ خەباتێ دیف رەوش و تێگەھشتن و وی وەلاتی بکەت و رێزێ ژ پارچا دیتر بگریت و ھەروەسا ئەو ژی گوت کو (فەرە کێشا کوردی ب رێکێن سیاسی چارە ببیت دیر ژ چەک و شەر ...) . ھەتا نھا کورد نەبوینە فاکتەرێ پەیدابون و زێدەبونا شەر و ئالوزیێن دەڤەرێ ھەروەسا کورد کارەکتەرێ سەرەکی بوینە ل ڤەگەراندنا ئێمناھیێ بو روژھەلاتێ ل شەرێ دژی داعشێ و تیرورێ ب گشتی و ب درێژاھیا سەد سالێن چوی کورد بەردەوام ستەم ژێ کری بو بەروڤاژی دەولەت و دەسەلاتدارێن دەڤەرێ کو کورد جینوساید کریە سەرەرایێ بێ ماف کرنا وان د ھەمی بیاڤەکێ دا ..
گرنگە د نھا دا کو ئەگەر راست ژی نەبیت لێ وەکی ئیماژێن ھەیی ئالوزیێن زێدەتر ژ پێشیا روژھەلاتیا دا شەرێن وێرانکەر ھەنە و کورد فەرە یێ بەرھەڤ بیت و دەست بەردارێ سیاسەتا ئێک دیتر شکاندنێ بیت و کار بکەتە رێزێن خوە ئێک پێخیت و دەست ب بھێزکرنا خوە بکەن و ھەر پارچەیەک ژ کوردستانێ تایبەتمەندیێن خوە ل بەرچاڤ وەربگریت و ھیجەتێ ب دەستێ دوژمنی نەدەن و کو ھێرشی سنورێن ھەرێما کوردستانێ و ھەر پارچەکا دی بکەت و ھەروەسا فەرە کورد ل ھەر چار پارچەیان خوە ژ (شەرکەریا لێھاتی ) ب پارێزن کو د ئێتە گوتن ل سەر کوردان و ل داویا شەری ژی دا بێ مفا دەرکەڤن . کورد وەک نەتەوەیەک داگیرکری فەرە کار بکەت و ل دەرفەتەکێ بگەرێت بو بەرەف پێش برنا دوزا خوەیا رەوا و لێ دبیت ب ھوشیاری و بێ لایەنی و نەکەڤیتە پیلانێن چو دوژمنان دا ژ بەرکو ئەو ھێزێن نھا شەری ل سەر دەسەلاتا روژھەلاتا ناڤین دکەن ژێ دئێتە چاڤەرێکرن کو د پاشەروژێ دا کێکا روژھەلاتێ د ناڤبەرا خوە دا پشک بکەن و کورد ژی سەد سالێن دیتر ب داگیرکەری ب مینیت؟؟!! .