کورد ب درێژاھیا دیروکێ خوەدیی وەسفەک ئازا و شەرکەر و زیرەک بویە و ھەتا زور جاران ژ ئالیێ سەرکردێن جیھانی ب شەرکرێن وێرەک ھاتینە نیاسین وەکی ترامپی راگەھاندی کو (کورد شەرکەرێن ئازا و لێھاتینە !!) ھەر ھەمی روپەلێن دیروکا کوردان ھەلبدەین نابینین کو بێ جورئەتیی ب پەیڤەکێ ژی خوە ژ دێرەکێ دا دیت بیت , ئەڤە جھێ شانازیێ یە و شەرێن دژی تیرورێ ئەو چەندە دووپات کر کو ئەوێ گرتی ب شیری بەرنادەت ب پیری و ھەر ئەو رێبازا باب و باپیرا ل گەنجا ژی بویە کەتوار ...ئەڤ چەندە ھەمی نەبویە جھێ باوەریا جیھانا خوەدی نیزیکی دوو سەد دەولەت کو وەک پێـتڤی دانپێدانێ ب مافێن سادەیێن کوردان بکەن و ئەگەر ھاریکار ژی نەبن تنێ دوژمنێن سەربەخویا گەلێ کورد نەبن .
د ڤێ گوشێ دا فەرە بەرسڤا وێ پرسێ بدەین ئەرێ گەلو گرنگیا دبلوماسیەتێ چیە بو ھەرێمێ و تایبەت دبلوماسیەت دگەل ئەوروپا ؟ ھەر چەندە کورد ھێشتا نەچوینە سەر نەخشێ سیاسی یێ جیھانی و ب گوپیتکا ھەبونا خوە نەگەھشتینە و چو کیانەک تایبەت ب خوە نینە د ڤان ١٩٣ دەولەتێن جیھانێ دا , بەلێ ئەڤ چەندە چو جاران وێ ناگەھینیت کو د بازنەکا گرتی بین و نەگەھین ب گورەپانا سیاسی و دبلوماسی و ئابوری یا جیھانێ و تنێ ببین ب شەرکەر و ل داویێ ب نیڤ دەمژمێرەکێ ھەر ھەمیی خەباتا خوەیا چەکداری ل سەر مێزا دانوستاندنێ گوری سالوخەتێن مەردینی و کوردینی و مێرینی و خوەشباوەریێ بکەین و ب دەستەک خالی و ئێک بەتال دەربچین. ئیدی دەم دەمێ دبلوماسیەتێ ژ تاک ھەتا جڤاک و ھەرێم و دەولەتێ و نابیت ڤێ پرسا ھوسایا گرنگ بەرچاڤ وەرنەگرین و خوە نەگەھینن ب سەرکەفتنێن جیھانێ دا . و ئەگەر ھەتا نھا ئەم خوە ب سەرکەفتی ببینن ل بیاڤێ دبلوماسی ب دیتنا من ھیچ بەس نینە کو ل سەر وی ئاستی بچین و فەرە پەیوەندیێن دەرڤە ل سەر چەند سالوخەتێن باش بێنە بەرھەم ئینان ئەو ژی بەرژەوەندیا گشتی و دیرکرنا دەستێ حزب و کەساتیان ل پەیوەندیێن دەرڤە و دانانا ستراتیجیەکا روون و ئاشکرا و دیفچونا کار و چالاکیێن نونەرێن دەرڤە و دانانا نونەران ل سەر ئاستێ ژێھاتیێ و پسپوریێ .
سیستەمآ جیھانێ وەک دیار دادگەریەک رەھا نینە و ھەتا نھا ماف یێ خوەدی ھێزا سیاسی و سەربازی و ئابوری و تەکنەلوجی یە و ئەوروپا ل سەرێلیستا ئێکەتی و وەلاتێن جیھانێ یە و بەدەوام ل بھێز کەفتنێ دایە و کاریگەریەک مەزن ل سەر ئاراستێ ریدانێن جیھانێ ھەیە و ل سەد سالێن چوی ئەوروپا بویە , ئەگەر ب پیلان بیت یان نەنیاسین بیت یان تولڤەکرن بیت یان بو دروستکرنا کێشەکا ئەزەلی د دەڤەرێ دا یان نە زانینا کوردان بیت شیایە دیف رێککەفتناما سالا ١٩١٦ (سایکس - بیکو ) دا کوردان ل سەر ڤان وەلاتێن دەڤەرێ پارڤە بکەت و پشتی قەدەرا خودێ ھەر ئەوروپایە ژی وەلاتان دروست دکەن و ھەلدوەشینن ! لەوما زور یا گرنگە پەیوەندیێن کوردستانی ل گەل ئەوروپا بەرەف پێش بچن و ئەڤ سەرەدانا بەرێز نێچیرڤان بارزانی سەروکێ ھەرێمێ بو کوشکا ئەلیزێ ل فەرەنسا و ئەو پێشوازیا گەرما سەروکێ فەرەنسا ئیمانویل ماکرون ل شاندێ کوردستانی کری جھێ ل سەر راوەستیانێ یە و فەرە ئەڤ سەرەدانە بێنە وەبەرھێنان ل ئەوروپا و جیھانێ ھەمیێ دا ژبەرکو فەرەنسا ئێکە ژ پێنج وەلاتێن خودانا ڤیتویێ ل جڤاتا ئێمناھیێ و ژ دامەزرێنەر و سەرکردێن ئەوروپایە و د شیان دا ھەیە کاریگەریێ د ئاراستێ ریدانێن جیھانێ ھەمیێ بکەت , فەرەنسایەک رەنگە شاش نەبین ئەگەر بێژین ب دل دوستێ کوردانە نە یا دجھێ خوەدایە ئاستێ بازرگانیا کوردستانێ و فەرەنسا تنێ دگەھیتە (٨٠ملیون دولاران) ؟ لەوما دبیت پتر گرنگی ب ھاتنا کومپانیێن فەرەنسی و ئەوروپی بێتە دان و ب رێکا پاریس کار بێتە کرن برێتانیا ژی ھەر ب ھەمان شێواز و ئاراستە کار ل گەل ھەرێما کوردستانێ بکەت , ئەڤ چەندە پێتڤی ب کارکرنێ بو بەرژەوەندیا بلندا وەلاتی و فەرە حکومەتا نوی دگەل سەروکێ ھەرێمێ و ھەمی ئالیێن سیاسی و کەساتیی و کوردێن ل دەرڤە گروپێن لوبی دروست بکەن و بازرگان و وەبەرھێنەرێن کورد ب رێکێن یاسایی و رەسمی کونتاکێ ل گەل ئەوروپیا بکەن و ب ھاتنا سەرمایێ وان د شیان دا ھەیە سیاسیی و دبلوماسی ژی ھاریکار بن دگەل کوردستانێ بو گەھشتن ب ھیڤیێن خوە و دەرباز بون ل سیفەتێ شەرکەرێ زیرەک و لێھاتی...