رەوشا دەڤەرا روژھەلاتا ناڤین بەرەف ئاقارەک ئالوز و دیر ژ ھەمی شروڤە و پێشبینیا دچیت و گەھشتیە وی ئاستی باوەری د ناڤبەرا کارەکتەرێن سەرەکی نەمایە و زمانێ رەسمی بویە پیلان و چەک و ئێک دی شکاندن . دڤێ ھەفکێشێ دا عیراق و کوردستان ھەر ل گورەپانەکێ دچن بو یاریکەرێن سەرەکی و ب شەر و ئالوزبونا پەیوەندیێن وان پریشکێن ئاگری دێ ھەمی ئالیەکێ ڤەگرن و گورەپان ژی دێ وێران بیت. د نافخویێ عیراقا سەردەمێ عادل عبدالمھدی کو ھەتا رادەکێ ھیڤیەک ژێ ھەوب ئێمناھیێ ڤەگەرینیت و وێ گوما سیاسی و ئەمنی یا شلوقی بو سەر ئاراستێ راست بزڤرینیت , بەلێ وەک دیار ھەبونا رایێن جودا و دەھان میلیشیایێن چەکدار و کاریگەریا ئیرانێ ل سەر بریارا وان ئەو ئاسویا گەش کو دھاتە چاڤەرێکرن ب ڤی ئاوایی بچیت رەنگە وەکی جوتکرنا د ناڤ ئاڤێ دا بیت بێ بەرھەم بیت . رەوشا خرابا سیاسی و ئەمنی و ئابوریا عیراقێ کاریگەریەکا مەزن و راستەوخو ل سەر کوردستانێ ھەیە و بێ ئێک و دوو ئەو رەوشا ژ بەغدا ھەی کوردستان پێ کاریگەر دبیت و ئاراستێ پرانیا پرسان دگوھریت .
پشتی نیزیک بونا ئالیێن سیاسی تایبەتی پارتی و ئێکەتی و پشکداریا بەرفرەھا ھەمی ئالیەکێ ل رێورەسمێن سویندخارنا سەروکێ ھەرێمێ بەرێز نێچیرڤان بارزانی و دەست پێکرنا گاڤێن پێکئینانا حکومەتا ھەرێما کوردستانێ و پێشھاتەک باش بو, ھەمی ھیڤیێن وەلاتیان ئەون کو ئەڤ گاڤە ب سلامەتی بگەھنە ئەنجام و حکومەتەک بھێز ئاڤا ببیت و چارەسەریا رەوشا دارایی بکەت دگەل چاکسازی و نەھێلانا گەندەلیێ ھەر چەندە ب رێژەیی ببیت ژی و ھەروەسا پەیوەندیێن ھەولێر و بەغدا بەرەف باشی ببەت و بچنە قالبەکێ دبلوماسی و پاراستنا بەرژەوەندیێن ھەردوو لایان و گرنگە رەوشا دەڤەرێ ژی بێتە بەرچاڤکرن و ب ھیچ ئاوای نابیت کوردستان ببیتە ئالیگر دژی لایێ دیتر .
رەوشەک ب ڤی ئاوای ئالوز و ھەستیار بیت و دەڤەرێن کوردستانی تایبەتی کەرکوکێ تەعریب دەستپێکریەڤە و کورد ب ھەمی ئاوایەکێ دئێنە بێ بەھرکرن ژ مافێن خوەیێن سادە . کەنگی یا د جھێ خوەدایە کو سیاسیێن کورد ب زمانەکێ زڤر و دیر ژ کەتوار و داب و نەریتێن کوردەواری دەست ب تەشھیر و شکاندنا ھەڤدوو بکەن و شەرەک راگەھاندنێ ب وی شێوازی دەست پێبکەن کو د شەرێن نافخوە دا راگەھاند ب وی رادەی توند دبیت .
ئەڤ گوتارێن سیاسی یێن توند بوچی ؟
- ھەردەمێ سیاسی و سەرکردێن وەلاتی خوەدی ھەستەک نەتەوەی بلند بن و بو ڤێ مەرەمێ خەباتێ بکەن ھیچ ناگەھنە وی ئاستی (گەفێن دوو ئیدارەیێ بکەن) وەکی زورجاران مە گوە ژێ دبیت , ئەڤ شێوازێ ھزرکرن و دەربرینێ واتایا نەبونا ھەستێ نەتەوەی و خەباتا نەتەوەی ددەت و بگرە ھەمی کار و خەبات بو حزب و بنەمالە و بەرژەوەندیا کەسیە....
- سیاسێن زیرەکی و ژێ ھاتی پێگەھێ خوەیێ گرنگ و کاریگەر ل سەر وەلاتی بو بەرەف پێش برن و ئارامکرنا رەوشێ بکار دئینن نەخاسمە نەتەوەکێمینا کوردان کو پێتڤی ب خەباتا بچیک و مەزنانە بو گەھشتن ب کنارێن ئێمناھیێ . لەوما ھەردەمێ سیاسی بو بەرژەوەندیا خوە رەوشێ ب وی ئاقاری دشلوقی نن کو کەسێ نەڤێت پێ بگەھیت وی دەمی ئەو سیاسی یە ل چ پلە و پوستەکێ بیت تێکدەرێ ئێمناھیا وەلاتیە.
- کوردان د کەڤندا گوتیە (شەر ل بەتالیێ باشترە) رەنگە ئەڤ گوتنە وان جورە سیاسیێن بەتال بوی بگریتە ڤە یان یێ دڤێت خوە بکەنە قەھرەمان ل گورەپانا سیاسی یا کوردستانێ دا کو زورجارانب گوتارێن دیر ژ ھەمی ئادابەکێ ھێرشی ھەڤدو دکەن . ب ڤێ تێکدانێ ھەیە مفایی ژ رەوشا ئالوز وەردگریت ( نەوتی خومان ھەیە و غازی خومان ھەیە....!!!!! ) واتا ب تێکچونا سەروبەرێ ھەی ئەو جورە سیاسیە مفادارن.
- دەستێ دەرەکی ل پشت ڤان ریدانان ھەیە , ئەگەر نە رەوشا نھا ھیچ ئالوزیەکا دیتر وەرناگریت . ھەر چەندە ئەڤ گوتنە پتر ل وەلاتێن روژھەلاتا ناڤین دئێتە گوتن دژی ئوپوزسیونێن حکومەتان. بەلێ ب راستی ئەگەر خاندنەکا ھویر بدەینە ڤان جورە گوتارێن توند ل رەوشەکا ئالوز دا چ شروڤەیێن دیتر وەرناگریت تایبەت ل دەڤەرەکێ کو ئیران ب دەڤەرا نفوز و (العمق الاستراتجی ) د ھژمێریت .
وەک د ئێتە گوتن ھەر کارەکێ کارڤەدانەک ھەیە , فەرە دەمێ کارەکتەرێ سیاسی گوتارەکا توند بدەت ھزر ژ کارڤەدانێن بەرامبەر ژی بکەت . لێ بدیتنا من دبیت ھەر ھەمی ئالیەکێ کار بکەن بو ھندێ رەوش ئارام ببیت و دیر بیت ژ زێدەتر ئالوزکرنێ و فەرە دەست ل ناڤ دەست بین بو ھندێ کوردستان ببیتە خوەدی حکومەتەک بھێز و د ڤان ئاستەنگێن کەفتیە تێدا دەرباز ببیت . ئەوێن ب ڤی شێوازی گوتاران ددەن ھەر فەرە بێنە ژبیرکرن و ئیدی دەست ب ئێکگرتن و برایەتی و چاکسازی و بھێزکرنا کوردستانێ ب ئێتە کرن ل جھێ زڤرین د بازنەکا دائێخستی دا ...