پشتی ب رێڤەچونا رێورەسمێن سویندخارنا نێچیرڤان بارزانی وەک سەروکێ ھەرێما کوردستانا قویناغەکا نوی یا حوکمرانیێ ل ھەرێمێ دەست پێکر و وەک کەسایەتی ژی بارزانی کەفتە قویناغەکا سیاسی و ئیداری و حوکمرانیا جودا و گرنگ و مەزن و بەرپرسیاریەک دیروکی دا . ئەڤ چەندە ژی ھەر ژ سویندخارنا سەروکی دیار بو دەمێ بویە ھوکارێ ژێک نیزیک بونا ھەمی ئالیێن کوردستانی و عیراقێ و ھەروەسا پشکداریا وەلاتێن ھەفسی و جیھانی ب ئاستەک بلند وێ چەندێ دگەھینیت کو کوردستان بەرەف قویناغەکا نوی یە ژ بەرکو دەڤەر و جیھان ل گوھرینێن مەزن دایە و راستان ل ناڤا ڤان پێشھاتان واتا نەمانا ھەمی دەستکەفتان .
یا دڤێ گوتارێ دا من مەرەمە روون بکەم ئەو نیە کی پشکدار بو ل رێورەسمان ب چ شێواز بارزانی ئەڤ پوستە وەرگرت . لێ یا گرنگ ئەوە داخازیێن خەلکی چ نە دڤێ قویناغا پشتی سالێن کریزان کو ھێشتا تایا شەر و تیرور و ئالوزی و بێ موچەیی و بێ بازاریێ خەلک بەرنەدایە . ئەگەر پرسێ ل ھەر تاکەکێ کوردستانی بکەن ل زاخو بو خانەقین بگرە ب ھەر چار پارچێن کوردستانی ڤە ژی دێ چەند داخازیێن رەوا ھەبن ژ وانا کو دیروکێ دا ئەم بێ بەرھەم کرینە ھەتا نھا ژی ئەم ب دەردێ وێ نەخوشی و کابوسێ دنالین ئەوژی نەبونا ئێکرێزیا ناف مالا کوردیە , زور یا گرنگ سەروک وێ چەندێ باش ل بەرچاڤ وەربگریت و مەترسیا رەوشا عیراقێ و دەڤەرێ ل پێش چاڤ بیت و بزانیت کو تاگریا وی بو پارتا وی یان ھەلبژاردنا بەرژەوەندیا حزبی و کەسی سەر یا کوردستانێ واتا بەردەوامی دان ب ئالوزی و نەتفاقیا نافخوی , سەروکی ل ئێکەم گوتارا خوە دا زور دووپاتی ل وێ چەندێ کر کو (سەروکایەتی ھەرێم چەتری ھەموو کوردستانیێکە). زور گرنگە ئەڤ گوتارە د ڤێ قویناغا مەترسیدار دا کو ھەمی دەڤەر ل بەرامبەر تەحدیێن جدی دا یە و دووبارە داعش یا رێزێن خوە نویدکەت و ھەروەسا ئالوزیێن ئیقلیمی و نێڤدەولەتی ل زێدەبونێ دانە و مەترسیا شەرێن وێرانکەر دئێتە کرن , لەوما فەرە ئەو چەندە روون بیت کو دەمێ گوتنان ب داوی ھات و ئیدی دەم دەمێ بریار و کریارانە و خەلک زێدەتر ژی نەشێت خوە ل بەر ئالوزی و نەتفاقیا ئالیێن سیاسی بگریت . ئەوا مە ل گوتار و دیتن و شروڤیێن چەند روژێن چویی دیتی ھەمیان دووپاتی ل سەر وێ دکر کو دشیانێن نێچیرڤان بارزنی دانە ناڤ مالا کوردی رێکپێخیت , ئەرێ سەروک دێ ڤێ شانازیێ کەتە بەھرا خوە ل چوار سالێن داھاتی ؟ بەرسڤ بو وی دەمی کو ھەلسەنگاندن بو کار و کریارێن سەروکی دئێنە کرن . ھەروەسا زور یا گرنگە سەروکێ نوی گرنگیێ ب موکم کرنا سێکتەرێ ئابوری بدەت و نەھێلیت ب ھەمان ئاراستە ئابورێ وەلاتی ب رێڤەبچیت , د ڤان بیست و ھەشت سالان دان سەرەرایێ ب ھزاران پروژێن گرنگ ل قوتابخانە و نەخوشخانە و زانکو و پەیمانگا و ...تد. بەلێ ب دەھان کێشە دڤی وەلاتی داھانە و خەلک ھێشتا نیڤیا وێ نەگەھشتیە کو خەبات بو کری ژ داخازیێن ھەری سەرەکی یێن وەلاتیێن سادە ئەوە سنورەک بو بێ دادی و گەندەلیێ بێتەدانان و ئێدی بلا ئەو روژ ئاڤا ببیت کو چەند کەسان وەکی مافیا خوە ب قویتێ خەلکی دکرە ملیونێر , خەلک ماندیە ژ کریزان و ئابور ژی راستە راستە پەیوەندی ب ژین و ژیارا خەلکی ڤە ھەیە و ئەڤ ئابورە ھەتا نھا ب یەکسانی خوشگوزەرانی نەگەھاندیە ھەمی مالان ..لەوما فەرە سەروک پێکولێ بکەت دیروکا وان کەساتیان بخوینیت کو ب شیانێن کێمتر ل کوردستانێ شیان وەلاتێ خوە بگەھینن رێزا بھێزترین وەلاتێن جیھانێ یێن ئابوری .
خەلکێ کوردستانێ ھەر دەمێ دبینن ئالیێن کوردستانێ کومدبن ب جەژن و خوشی و ئاھنگان پێشوازیێ ژێ دکەن و بازار گەرم دبیت و بەردەوام دوعایێن براتیێ دکەن , ئەو ل رێورەسمێن سویندخارنا بارزانی ھاتیە دیتن جھێ دلخوشیا کوردستانیان بو ھیڤیدارین سەروک ژی کار بو برایەتی و ئێکرێزی و تفاقیا وەلاتی بکەت و ئیدی موزایدێن حزبی ئێمناھیا وەلاتیان تێکنەدەن , ھەروەسا ل بیاڤێ ئابوری دا خەلکی بێھنەکا زور درێژ ھەبو ل بێ موچەی و بێ پروژەییێ دا نھا دەمێ کارکرن و خزمەتکرن و دانەڤا وی قەریە کو خەلکێ کورستانێ گەل سەرکردایەتی و حکومەتا خوە کریە .