کوردان د دیروکێ دا ھند دربێن کوژەکێن مەزن و مالوێرانکەر یێن دیتی کو ناھێن ھژمارتنێ و بەردەوام ھاتینە پاشڤەبرن و دەستکەفت کرینە قوربانی و خوینا شەھید و خەبات ژی بێ بەرھەم کریە ! ناچین روپەلێن دیروکێ ھەلبدەین لێ دێ بەری دوو سالان و پشتی ریفراندوما سەربەخویێ باس کەین , کو ب چ ئاوایەکێ خراب شازدێ ئوکتوبەرێ دیف دا ھات و کوردستان ب پێنجی ژ سەدێ ژ ئاخا و دەسەلات و داھاتێن خوە ھاتە بێ بەھرکرن و ھەتا نھا ژی بەردەوام دەڤەرێن کوردستانی دئێنە تەعریب کرن و ئەرد و دەخل و دانێ وەلاتیێن کورد ژی دئێنە سوتن. ھەر چ فاکتەرێ سیاسی و جوگرافی و مەترسی ل سەر دەوروبەر و دەست وەردانێن وەلاتێن ھەفسی و ھەبونا ھزرا شوڤینی ل عیراقێ و ...تد. ئەز فاکتەرێ ھەمیان کوژەکتر و کاریگەر تر ل سەر ئاراستێ کێشەیێ دیار دکەم کو چارەنڤیسێ کوردان کریە ئەو کو ئەم تێدا دەرباز دبین ئەو ژی نەبونا ئێک رێزیێ یە !
ئەوا مە بچاڤێن خوە دیتی جھێ شەرمزاریێ بو نەدبو ئەو تشتە ریدابا و دیروک دێ نەفرەتا کەتن و نفشێن داھاتی ژی دەستدانا ڤێ دەستکەفتێ ل سەرکرداتیا سیاسی یا کوردستانی خوش نابن . نھا پشتی ھەلبژاردنا سەروکێ ھەرێما کوردستانێ بەرێز نێچیرڤان بارزانی ب دەنگێ پرانیا پەرلەمانتاران جھێ دلخوشیێ یە و فەرە گاڤێن پێکئینانا کابینا نوی بێنە ھاڤێتن و کار بێتە کرن و ئەو کێشەیێن ھەی ژی بێن چارەسەر کرن . ئێکەتی نیشتیمانی کوردستان وەک ھێزا دوویێ ل گورەپانا سیاسی ل کوردستانێ دا رولێ وێ بەرچاڤە ل ریدانان دا و کاریگەریەک مەزن ژی ھەیە , دەنگ نەدانا وان بو ھەلبژاردنا سەروکێ ھەرێمێ کوردستانێ ھەر چەندە چ کاریگەری ل سەر ئالیێ قانونی نەبو و سەروک ھاتە ھەلبژاردن , بەلێ رولێ ئێکەتی نابیت بێتە بیرکرن و فەرە کار بێتە کرن کو ب ھەمی شێوازەکێ و شیانین دبلوماسی بێنە بکار ئینان و ئێکەتی ژی بەرژەوەندیا حزبی و کەسی دانیتە لایەکێ و مەترسی و ناسکیا رەوشا کوردستان و عیراق و دەڤەرێ بەرچاڤ وەربگریت و ئیدی بەرژەوەندیا بلندا کوردستانیان ببیتە خەما وێ و ل رێزا نەتەوەی و نیشتیمانی دەرنەکەڤیت و کو بدیتنا من ژی ئیکەتی دێ ئەرکێ خوەیێ نەتەوەی ل ڤی بیاڤی دا بینیت و کاریگەریا خوە ژی دێ ھەبیت ل دەربازکرنا ڤێ قوناغێ.
کی دێ دەستپێشخەریێ کەت ؟
سەروک ھاتە ھەلبژاردن و دیڤدا رێکاریێن دیتر ژی مانە ھەتا دگەھیتە پێکئینانا کابینەیەکا ھاوپەیمانی و ئێکگرتی و بھێز . ب ھیچ ئاوایەکێ نابیت رەوشا کوردستانێ ل عیراقەکا وێران دا بەرەف خرابتر بچیت و دبیت زیترین دەم ئەڤ رەوشا چارەسەر بیت و ئەگەر نامێن پیروزباھی یێن ب مەرەما ھەلبژاردنا نێچیرڤان بارزانی وەک سەروکێ ھەرێمێ ھاتی ھەمی دووپاتیێ ل سەر پێشکەفتن و سەرکەفتن و ئێک رێزی و پاراستنا دەستکەفتی و نەھێلانا کێشەیان دکەن . ل خالا ھەری گرنگ دا ھەمی باس ژ شیانێن سەروکی دکەن کو د شیان دا ھەیە ب ھزر و نەرین و تێگەھشتن و دیتنا خو بو دیروک و پاشەروژێ ڤی وەلاتی بەرەف کنارێن ئێمناھیێ ببەت . ھەلبژاردنا سەروکی بو وێ ئێکێ بویە کو ناڤ مالا کوردی بێتە رێکخستن و خزمەت بێتە کرن , نەیا مەنتقی یە کو ھەلبژاردنا سەروکی ببیتە فاکتەرێ تێکچونا ناڤ مالا کوردی , لێرەدا سەروک دێ رولێ خوە بینیت و ھەمی ئالییان کومکەت و ڤێ رەوشێ چارەسەرکەت و ناھێلیت رولێ ئێکەتی و ئالیێن کاریگەر ل گورەپانا سیاسی یا کوردستانێ بێتە ژ بیرکرن و دێ رولێ خوە ب زێدەتر ژی بینن و ھەر ئێک دیف دەستکەفتیێن خوەیێن ھەلبژاردنێ مافێن خوە وەرگریت. د ئێکەم گوتارا خوە دا سەروکی راگەھاند کو دێ سەروکایەتیا ھەرێمێ مالا ھەمیان بیت و چەترەک بیت بو ھەمی ئالیێن سیاسی و پێکھاتێن ئولی و مەزھەبی و نەتەوێن جودا جودا ل کوردستانێ دا. ل داویێ ژی دا ھەر ھەمی لایەک دێ گرنگیا ئێک رێزیێ باش زانیت و مەترسیا ژێک دیرکەفتنێ ژی بو دیار بیت .