د ھەر وەلاتەکێ دیموکراسی و فەرە ئالی دا ھەر چەند کەسەکان دیف ئایدولوژیا و بەرژەوەندیا بلندا وەلاتی مافێ دامەزراندنا گروپ و پارت و کومەلە و سەنتەران ھەیە و ھەمی یاسا و دەستورێن ئازاد ڤێ چەندێ ب رەوا دبینن بو خەلکێ خوە , ب مەرجەکێ کو ئاسایشا وەلاتی بپارێزن و بەرژەوەندیا بلندا وەلاتی و وەلاتیان ل پێش بەرژەوەندیا حزبێ بیت و ھەمی رێکارێن حزب ئەنجامددەت بو ھندێ بن وەلات ب کنارێن ئێمناھیێ و سەرکەفتن و پێشکەفتنێ بگەھیت و داویێ رێز بو وەلاتیان ڤەگەرێت ل چارچوڤێ وەلاتی دا . بێگومان فەرە حزب ژی دیف پەیرەو پروگرامەک تایبەت بیت کو دوو مەرجێن سەرەکی تێدا بن ئێک ل دژی بەرژەوەندیا بلندا وەلاتی و ئاسایشا نیشتیمانی نەبیت و ھەڤدژ نەبیت ل گەل یاسا و دەستورێن وەلاتی , ھەروەسا ئارماجەک روون و ئاشکرا بیت و ھزرا وێ مەترسی نەبیت بو وەلاتی و مروڤاتیێ و جیھانێ بگشتی .
دیروکا پارت و رێکخراوێن سیاسی ل کوردستانێ زور دیر و درێژە و ھەر ژ (قولپا پیروز ) یا بدرخان بەگێ بوتان بگرە ھەتا (ئێکەتیا کوردان) یا شێخ عوبەیدوللایێ نەھری و دەرباز بون ب پارت و رێکخراوێن سیاسی و روشنبیری و جڤاکیێن مەزنە مالباتێن کورد ل ئیستەنبولێ ل دەستپێکا سەد سالا بیستێ و پارتا ھیوا ل سالێن سیھان دا و داویێ دامەزراندنا پارتی دیموکراتی کوردستان ل سالا ١٩٤٦ و بەرفرەھبونا رولێ وێ د سالێن دیڤدا و پشتی ڤێ بەرفرەھبونا رولی ئەو ئینشیقاقێن دیڤدا ھاتی ل تەیارێ عیلمانی و شیوعی و ئیسلامی ھەتا گەھشتیە ئینشیقاقێن ٢٠١٨ و ب ڤی ئاوای بچیت زورەک ژ پارتێن کوردستانی پرت پرت بون لێتێتە چاڤەرێ کرن.
د نھادا زور جاران تاکێ کورد ئەو پارتا کو لایەنگری بو ھەی زور ب گرنگتر و مەزنتر و باشتر دبینیت ل وی وەلاتی کو پارت فەرە بو ھاتبیتە دامەزراند! لێرەدا فەرە ئەڤ چەندە بێتە روون کرن کی ئالیگر و ئەندامێ خوە پەروەردە کریە کو ئەگەر حزبا من بێژیت ماست رەشە دێ بێژم رەشە و وەکی تێتە گوتن ئەگەر بفریت ژی ھەر بزنە ؟! ئەرێ کی مفادارە ل ڤێ سیاسەتا کادر پێ بێتە پەروەردەکرن ؟ ئەرێ ئەڤ جورە پەروەردەیە د بەرژەوەندیا وەلاتی دایە؟
ل دەستپێکی دبیت پەیرەو پروگرام دیف بەرژەوەندیا وەلاتی و پاراستنا ئاسایشا نیشتیمانی بێتە دارشتن و دیر بیت ژ تەسکرنا بەرژەوەندیا ل بەریکا چەند کەسان دا و داویێ دا ھەمی کارێ حزبێ ببیتە پاراستنا بەرژەوەندیێن بلندێن حزبێ و کەسێن سەرکردە د حزبێ دا.ئەگەر کار و خەبات و بەرژەوەندیێن حزبی ژ یێن وەلاتی گرنگتر ھاتنە دیار کرن و شەر ل سەر ھاتە کرن وی دەمی کار و لایەنگر و ئالیگر ژی دێ ب رەنگەکێ ھەرەمی ھەمان سیاسەتێ وەرگرن , ھەتا وی رادەی بەرژەوەندیا حزبێ ب پیروز دزانن و لادان ژێ ب گونەە و کوفر و خیانەت و جاشاتی و بێ ئاقلی دزانن ! ئەگەر چاڤ خشاندنەکێ ب گورەپانا سیاسی ل کوردستانێ بکەین دێ بینی کو پارتاتی زور پیروزتر بویە ل وەلاتی ب کریار نەک ب دروشمێن جودا جودا ھەر کەسەک ب دروشمان وەلاتپارێزە.لەوا زور جارا تاکێ کورد بەرەڤانیێ ژ خیانەت و ئاخ فروشیا خوە دکەت و بگرە شانازیێ ژی پێدکەت ! ئەرێ ئەگەر کوردستان ھندە پێتڤی ب ئێکگرتن و ئێکرێزی و ھێزە و شیانێن ھەمی ئالیەکێ بیت و بوچی ھەتا نھا ئەڤ چەندە ب دەست نەھاتیە و چ نەمایە ب ئەکادیمی مروڤ باوەریێ ب گوتنا خورافی بکەت کو دبێژن کورد ببنە دەولەت دێ دونیا خراب بیت !! راستە چو ئەسل و ئەساس بو ڤێ چەندێ نینە لێ ئەگەر ب ڤی ئاوایی بیت , وەکی ئەم دبینین ناڤ مالا کوردی زور خرابە و بەردەوام دوژمنێن کوردان مفا ژ ڤێ درزێ وەرگرتیە و کورد ژ ناڤبرنە.لێرەدا دیار دبیت ئەوێ ئەڤ وەلاتە ب ھەمی قوربانیان ڤە ل بەر چاڤ نەبیت ھەلبەت ئەو دێ سیاسەتەکێ کەت کو ھەمی رێک بچنە بەریکا وی و بەرژەوەندیا وی بپارێزن و گروپەکێ مافیایی تنێ مفادارە و خەلکێ گشتی بەر پێیا دچیت . لێ ھەر ئەو کەسەیە ھەمی ئەو ھزر و ھێزە دروستکری و ھەتا مرنێ بەردەوامە ل سەر وان ھزر و نەرینێن شاش و حزباتیێ دئێخنە پێش وەلاتپارێزیێ.وەکی زورەک ژ نیڤ دینداران کو سوننەتێ دئێخنە پێش وەجباتا.
ل داویێ فەرە ھەمی ئالێن کوردستانی وێ چەندێ باش بزانن کو کوردستان پێتڤی ب گوتار و کریارەکا ئێکگرتی ھەیە تایبەتی ل ڤان کاودانێن عیراق و دەڤەر تێدا دەرباز دبیت ل زێدەبونا مەترسیا شەری دناڤبەرا ئەمریکا و ئیرانێ دا . ھەروەسا ل سەر حکومەتا ھەرێمێ و پەرلەمانی یە ب ئەرکێ خوە رابن و سێبەرەک بن بو ھەمی ئالیان ب جوداھیێن ھزری و ئایدولوژی و ئولی و نەتەوەی , دا کو پاشەروژەک گەش ب دەست بێت و ئەو قویناغا نەخوش و گران و مەترسیدارا پێنج سالێن چوی دووبارە نەکەینە ڤە کو رایەدارێن حکومەتێ تایبەتی سەروکێ حکومەتێ زور دوپاتیێ ل سەر وێ چەندێ دکەت کو ئەو روژە دەرباز بون و ئیدی جارەک دیتر مەترسیێ بو کوردستانێ نازڤرینن وەکی مەدیتی . گرنگە ئەوێ پرسیارێ ژی بکەین کو سەروک وەزیران و بەربژێرێ سەروکاتیا ھەرێمێ نێچیرڤان بارزانی چەند بەرھەڤی کرنە بو ھندێ ئەو درزێن مەترسیدار ل سالێن چوی دووبارە نەبن کو ب کوردستانێ کەفتی ل شەری و خیانەت و مەترسیا دووئیدارەی و ئێک دوو رەتکرن و شەرکرن بو پلە و پوستان و ھەمی تشت بو من یان بو کەسێ نە , ئەوا پەیوندی ب گوتارا مە ڤە گرێدای ئەو ژی پێش خستنا بەرژەوەندیا حزبی ل سەر بەرژەوەندیا بلندا وەلاتی , ئەرێ دێ ھەمان رەوش دوبارە بیت یان دێ ئیدی کوردستان سەر ھەمی تشتەکێ را ؟