نێزیک بونا پێک ئینان کابینا نوی یا حکومەتا ھەرێما کوردستانێ پشتی ھەشت ھەیڤان ل چاڤەرێبونا خەلکی , ھەتا رادەکێ زور جھێ دلخوشیێ یە تایبەت وی دەمێ کو دبینن ئیدی ئالیێن کوردی تایبەت یێن خوەدیێ چەکی (پارتی و ئێکەتی ) وەختی ب دانوستاندنێ دکوژن ل جھێ شەر و ئالوزی و دەست برن بو چەک و دوو ئیدارەیێ یە !!گاڤەکا گرنگ بو ھندی کار بێتە کرن بو ب موئەسەساتی کرنا ھەمی سازیێن وەلاتی و ل مەترسیا ھەیمەنا حزبی دەرباز بکەن و نفشێن داھاتی ل کێشێن سالێن ھەشتێیان و نوتان دەرباز بکەن.
رێککەفتنا پارتی و ئێکەتی و گوران بو پێکئینانا کابینا نوی یا حکومەتێ جھێ دلخوشیێ یە و خەلک چاڤەرێیا چەند گاڤێن گرنگ دکەت ل سەکرداتیا سیاسی یا کوردستانی و حکومەتا ھەرێمێ کو وەلات بکەڤیتە سەر رێکا ئێمناھی و ئاڤەدانی و خوشگوزەرانیێ , ژ وان کارێن کو فەرە حکومەتا ھەرێمێ و ئالێن سیاسی ب جە بگەھینن و خەلک چاڤەرێ یە :
(ئێک رێزی )
نەبونا ئێک رێزیێ دناڤ کوردان دا گەلێ کورد ب وێ گەھاندیە کو ئیرو تێدا و بەردەوام ل بازنەیەکا دائێخستی ل سەرکەفتن و داکەفتنێ دابویە ئەو ژی ب ئەگەرێ بەرچاڤ وەرگرتنا بەرژەوەندیێن حزبی و بنەمالەیی و کەسی و ژ بیرکرنا بەرژەوەندیا گشتی , ڤێ چەندێ زیانەک مەزن ب تەڤایا گەلێ کورد گەھاندیە . پشتی ئەو ریدانێن کوژەکێن کو کورد بو چەندین سالان پاژڤە بری بەردەوام مەترسی ل تێکچونا ناڤ مالا کوردی دئێتە کرن! د ڤێ قوناغێ دا کو دەڤەر بەرەف قوناغەکا مەترسیدار دچیت تایبەت پشتی گەفێن ئەمریکا و ئیرانێ و زێدەبونا مەترسیا داعشێ و ھەڤرکیا وەلاتێن دەڤەرێ ل سەر زێدەبونا دەسەلاتێ ل عیراقێ و کوردستانێ ...تد. کورد تنێ ب ئێک رێزیێ ل ڤێ گێژەلوکا سیاسی دەرباز دبیت و ھەبونا ھەر درز و ناکوکی و ئالوزی و پارڤەبونەکا سەر ڤی ئالی و یێ دیتر ئێکسەر مەترسیێ ل سەر چارەنڤیسێ خەلکی دکەت . لەوما خەلک داخازێ ژ سەرکرداتیا سیاسی یا کوردستانی دکەت دەست ل ناڤ دەست دا بن و چارەنڤیسێ وان بو بەرژەوەندیێن حزبی و کەسی و بنەمالەیی ریبریێ مەترسیێ نەکەن و خوینا شەھیدان بو وەزارەت و برێکارێ وەزیر و رێڤەبەرەکێ گشتی ژبیرنەکەن و ب ھەروەیی ژ دەست نەدەن .
(خزمەتگوزاری)
کوردستانی خوەدیێ سەبرەکێ مەزنن و ئەڤ چەندە زور جاران ل سەر زمانێ سەرکردێن وەلاتی ھاتیە دووپات کرن تایبەت سەروکێ حکومەتێ دەمێ سوپاسیا خەلکی دکر کو خوە ژ بەر قەیرانا دارایی گرتی و دەرفەت ب حکومەتا خوە دای ھەتا ھاتیەف سەر پێین خوە, نھا دەمێ ھندێ یە کو قەرەبویا وی خەلکی بێتە کرن کو بو دەمێ پتر ژ چوار سالان توندترین قەیران دیتی و چ نەما کو پێشکێشی ڤی وەلاتی نەکەت. ئیدی دەمێ ھندێ یە کو کار بێتە کرن و پێتڤیێن سەرەکی یێن وەلاتیان ژ ئاڤ و کارەبا و رێک و بان و پەروەردە و ساخلەمی و ئەمن و دابینکرنا کاری ھەبیت و خەلک نەھێـتە سەر جادەییان بو ھندێ تنێ ئاڤا ڤەخارنێ بو بێتە دابینکرن!! ب راستێ سەدێ بیست و ئێکێ ل وێ چەندێ پێشکەفتی ترە کو خەلک خرڤەبونا بکەت بو ئاڤ و کارەبێ..!لەوما فەرە حکومەتا داھاتی ل گەل سەروکێ ھەرێمێ و ھەمی ئالی کار بکەن زورترین خزمەتگوزاری بێنە ئەنجامدان ..
(نەھێلانا گەندەلیێ)
دەردێ ژ ناڤبرنا ھەر دەسەلات و حکومەت و مەملەکەت و وەلاتەکێ گەندەلی و نەبونا شەفافی و بار بارانێ (محاێێە) یە , ئەگەر چاڤخشاندنەکێ ل رەوشا کوردستانێ بکەین دێ بینین کو گەندەلی ل گوپیتکێ یە و نەشەفافی و دزی و خارنا مالێ گشتی و ب کارئینانا دەسەلاتا گشتی بو بەرژەوەندیا کەسی ل زێدەترین ئاست دایە و بەردەوام گەندەلی ل پێش ڤە چونێ دایە و حزب و بەرپرسێن مەزن پارێزەریێ ل گەندەلێ دکەن و دەستێن مەزن ژی لێددەن. ئەڤێ چەندێ وەکریە کو زورجاران ئەو سوزێن دئێنە دان ب جە نەئێن و بەردەوام خەلک نەرازیبیت و ناڤبەرا خەلکی و حکومەتێ رووبەرەک دیر و درێژ ھەبیت و خزمەتگوزاری وەک پێتڤی نەئێنەکرن و وارێ پێشکەفتنێ ل وەلاتی راوەستێت و تنێ ل وەلاتەکێ پری قوربانی چەند کەسێن گەندەل و مالباتێن خوە مفادار بن . زورگرنگە سەرکرداتیا داھاتی ل حکومەت و سەروکاتیا ھەرێمێ زور ب جدی کار بکەت بو نەھێلانا گەندەلیێ و دارێ نەھێلانا گەندەلیێ ھەمی کەس و بنەمال و حزب و باژێرا بگریت و ئیدی خزمەت و شەفافیەت و شەرێ گەندەلیێ ببیتە گوتن و کریارا وان یا سەرەکی .