دەمێ سەروکێ حکومەتا ھەرێما کوردستانێ ل کونفرانسا ساخلەمیێ ل ھەولێرێ باس ژ ھەبونا کێم و کورتیان دکەت ل کەرتێ ساخلەمیێ و داخازا پێداچونێ ب ھەمی بیاڤێن ڤی کەرتی بکەت واتایا وێ چەندێ ددەت کو سەرەرایێ ھەر ھەمی کارێ ھاتیە کرن د ڤی سێکتەری دا دەھان کێم و کورتی و دەرزێن خراب ژی ھەنە.لێرە دا سێ پرسێن سەرەکی دئێنە کرن , رەوشا ساخلەمیێ ل چ ئاست دایە ؟ رەخنە و تێبینێن وەلاتیان چنە؟ ب چ شێواز دێ رەوشا ساخلەمیێ بەرەف پێش چیت و بیتە ھوکارەک خزمەتەک ھەژی پێشکێشی وەلاتیا بێتە کرن ؟
ل سەردەمێ حوکمرانیا کوردی ل بیاڤێن جودا جودا بو دەمێ بیست و ھەشت سالان کار ھاتیە کرن و سەروکێ حکومەتێ رێژەیێن ھەتا رادەکێ باش و دلخوشکەر دیارکرن سەبارەت ب کەرتێ ساخلەمیێ ل نەخوشخانە و بنگەھێن ساخلەمیێ و ھژمارا نوژدار و دەرمانخانە و ...تد.بەلێ ئەگەر چاڤپێخشاندنەک ب وی دەمی بێتە کرن کو رژێمێن عیراقێ دەسەلات ل کوردستانێ دکر دێ بینین سیاسەتەک ھەبویە کو بەردەوامی دا ب مانەڤا کوردستانێ ل بازنەک خراب و بێ خزمەتگوزاری دا . ئەڤە سەردەمێ دوژمنی لێ یا ئەڤرو تاکێ کورد دبینیت ل کەرتێ ساخلەمیێ رەوشەک نەباشە و فەرە پێداچون و چاکسازی و پاکسازی بێتەکرن. رەخنێن وەلاتیان ل کەرتێ ساخلەمیێ جورا و جورن , ھەر ژ نەبونا دەرمانێن پێتڤی ل نەخوشخانە و بنگەھێن ساخلەمیێ و کێمیا ھژمارا نوژداران و خزمەتگوزاریێن ساخلەمیێ ل بنگەھێن ساخلەمیێ و نەخوشخانێن ھەوارھاتنێ و جھێن دیرە دەست.ھەروەسا نەبونا پشکنینێن جورا و جور و پێتڤی و کێمیا ئامیرێن گرێدا ب بیاڤێ ساخلەمیێ ڤە , زێدەبونا شاشیێن دکتوران و باوەری نە ئینانا بەرپرسێن کوردستانێ ب کەرتێ ساخلەمیێ و بەرەف دەرڤە چون ھەردەمێ رەوشا وان یا ساخلەمیێ تێکدچیت, ھەبونا واستە و وواستەکاری ل کەرتێ ساخلەمیێ دا و ب روونی دیارە ئەڤ چەندە و کێم بونا باوەریا خەلکی ب نەخوشخانێن گشتی و کارنەکرنا جدی یا نوژداران ل کەرتێ گشتی و فەرزکرنا کەرتێ تایبەت ب سەر کەرتێ گشتی و دەست وەردانا پشکەک ل کادرێ ساخلەمیێ د گەل بازرگانێن بیاڤێ ساخلەمیێ ل سەر حیسابا نەخوشی....تد.
نھا فەرە ل سەر وێ چەندێ رابوەستین ئەرێ ب چ ئاوا دێ پێداچون ب کەرتێ ساخلەمیێ بێتە کرن و زورترین خزمەتگوزاری ب وەلاتیان ئێـەکرن و باوەریێ بو کەرتێ گشتی ل ساخلەمیا ھەرێمێ زڤرینن؟ د نھا دا و سەردەمێ شورەشا تەکنەلوجیایێ و گوھرینێن بەردەوام و زور ل بیاڤێن زانستی و ساخلەمی دا فەرە حکومەتا ھەرێما کوردستانێ بەردەوام ھەولا بەرەف پێش برنا پروگرامێن کولێژێن تایبەت ب بیاڤێ ساخلەمیێ ڤە بدەت و ھاریکاریا وان بکەت و ژ پێشکەفتنا زانستی و ئەکادیمی و تەکنەلوجی یا جیھانێ بێ بەھر نەکەت . ھەروەسا بەردەوام کونتاک ل گەل زانکو و ناڤەندێن ئەکادیمی وزانستی یێن جیھانی ھەبیت و کادرێ کورد بێنە ھنارتن بو دەرڤە و تیمێن ساخلەمیێ ژ دەرڤە بینن. ژ ئالیەک دیتر ڤە وەزارەتا ساخلەمیێ ھەتا نھا کێم تەرخەمە کو نەشیایە وان دکتورێن کورد ل دەرڤە ب خوەڤە گرێبدەت و ھەر ھیچ نەبیت سالێ جارەکێ بەرەف وەلاتێ خوە بێن و خزمەتا نەخوشن بکەن و زانستەک نوی بگەھینە کوردستانێ. گرنگی دان ب کەرتێ گشتی و چاککرنا رەوشا کادرێ ساخلەمیێ ژی دبیتە فاکتەرەک کو رەوشا ساخلەمیێ بەرەف پێش بچیت, ھەروەسا ھاندانا کەرتێ تایبەت کو پتر گرنگیێ ب شیانێن کادرێ نافخوی بدەن و بو خاندنێ و خولێن تایبەت بنێرنە دەرڤە, و کار بێتە کرن کو نەخوش تایبەت خوەدی داھاتێن تایبەت ب باشترین شێواز ل کەرتێ گشتی دا مفادار بن .. زێدەبارێ ھەبونا دەھان کێشێن بەردەوام لێ ھەتا نھا کارەک ھاتیە کرن کو ھەژیە مروڤ باس ژێ بکەت , لێ نە د وی ئاستی دایە کو وەلاتیێن کوردستانێ ژێ رازیبن.