ھەر ژ روژا ئاڤاکرنا عیراقا نوی و پێکڤەگرێدانا باشورێ کوردستانێ (ویلایەتا موسل) ب ڤی وەلاتی ڤە ل سالا ١٩٢٥ز ھەتا ئیرو بەردەوام ئالوزی ھەبوینە و چ نەمایە ھەمبەری ڤێ پارچا ئەردی و پێکھاتا گرنگ و رەسەنا دەڤەرێ نەئێتە کرن کو کورد و کوردستانە . بەغدا تنێ شارەزایێ زمانێ شەر و ئەنفال و جینوساید و راگواستن و تەعریب و تەبعیس و نفیکرنێ و ...تد, بویە . ل سەردەمێ شاھاتیێ (١٩٢١ – ١٩٥٨ز) ھەتا سەردەمێ کوماریا قەومی و شیوعی و بەعسیا ژی (١٩٥٨ - ٢٠٠٣) ھەر ھەمان نەرین ھەمبەری کوردستانێ ھەبویە و زمانێ شەری و دەنگێ چەکی و بێنا باریتێ ل سەر ئەسمانێ ڤی وەلاتی دا بویە. پشتی کەفتنا رژێما سەدامێ دکتاتور ھەمی ھیڤیەک بو ھندێ دچون کو عیراقا نوی یا ئازاد و سەربەخو و دیموکراسی و مەدەنی و یەکسانی بیت , لێ مخابن ھەر ھەمان ئەقلیەت بەردەوام بو و ھەتا رادێ ب کارئینانا چەکی !!
پشتی ژ نافچونا داعشێ و گوھرینا ھەفسەنگیا ھێزێ ل عیراقێ و گوھرینێن د دەڤەر و جیھانێ دا ریددەن ژ ئالیەکێ و وەرگرتنا پوستێ سەروک وەزیران ژ ئالیێ عادل عبدالمھدی ڤە ئەڤ چەندە ھەمی رێکخوشکەرن کو ئاراستێ پەیوەندیێن ھەولێر و بەغدا بەرەف باشتر بچن .کومبونا بەرفرەھا ناڤبەرا سەروکێ حکومەتا ھەرێما کوردستانێ و شاندا بەغدا و بریارا رێکخستنا پێناسا گومرکی و بەردەوامی دان ب شاندنا پشکا ھەرێمێ ژ بودجەی ژ بال بەغدا ڤە و کارکرن بو چارەسەرکرنا ھەمی کێشەیێن ناڤبەرا بەغدا و ھەولێر دیف دەستورێ عیراقێ ھەمی گروڤەیێ ھندێ نە کو پەیوەندیێن ناڤبەرا ھەردوو ئالیان بەرەف باشتر و سەردەمەک زێرین ھاتیە پێش بو چارەسەریا بنەرەتی یا کێشێن ناڤبەرا ھەردوو ئالیان ژ وانا کێشان ,ئەو کێشمەکێشا ل سەر دەڤەرێن کوردستانی کو ھەتا نھا بوینە فاکتەرێ سەرەکی بو ژێکدیرکەفتنا ھەردوو ئالیان ماددێ (١٤٠) دەستورێ عیراقێ زور ب روونی باس ژ چاوانیا چارەسەرکرنا ڤێ پرسێ کریە و پێگیربون ب دەستوری پێگیربونە ب ئاشتیێ . ھەروەسا کێشا نەفت و غازێ کو ھەتا نھا ھەر سال ئەڤ کێشە دووبارە دبیت و کاریگەریەک زور خراب ل رەوشا گشتی و وەلاتیان کریە , نھا کو سەرکرداتیا سیاسی ل ھەولێر و بەغدا دشیان داھەیە دانوستاندنێ بکەن و رێکبکەڤن و ئاریشان چارەسەر بکەن , فەرە بابەتێ سامانێن سروشتی دیف یاسا و دەستوری بێنە چارەسەرکرن کو گەلێ کوردستان و عیراقێ مفای ل ڤان داھاتن وەربگریت و ب ئێکجاری چارەسەری بو بێتە دیارکرن . دارێشتنا سیاسەتێن گشتی و تەحریما بکارئینانا شەری ھەمبەری ئێک و قەدەغەیا دەست برنا بو برسیکرنا وەلاتیان و ب پلە دوو ھژمارتن ھەمی پرسێن گرنگن فەرە نێچیرڤان بارزانی و عادل عبدالمھدی ل ڤێ قوناغا گرنگ یا سیاسی چارەسەر بکەن ژ بەرکو رەوشا نافخوی و ئیقلیمی و نێڤدەولەتی ژی ھاریکارە بو چارەسەریا ھەمی کێشەیان ب شێوازەکێ بنەرەتی .
بەغدا بو دەمێ پتر ژ ھەشتێ سالان زمانێ گەف و شەر و کوشتن و جینوساید و ئەنفالان بکار ئینا دژی گەلێ کوردستانێ , چ ژێ بەرھەم نەھات ژ بلی مالوێرانی و خوسارەتا ھەردوو ئالی و ژ دەست دانا شیانێن نافخوی و ئینانا دەستێن بیانی . نھا پشتی رەوشەک نوی ل کوردستانێ و عیراقێ ھاتیە روژەڤێ کو ھەمی بیر و بوچون و دیتن بو وێ ئێکێ دچن پەیوەندیێن سیاسی و سەربازی و ئابوری و کلتوری ..ناڤبەرا ھەولێر و بەغدا باشتر ببن و چارەسەریا بنەرەتی بو کێشەیێن خوەدی ژییەک نیزیکی ئێک سەدەیی ببینن. لێ پرسیارە گرنگ ئەوە ئەرێ ھەتا چ رادە عادل عبدالمھدی و نێچیرڤان بارزانی دێ ل سەر ئاراستێ نەرم و دبلوماسی و گەشبین و نیەت سافی بەردەوام بن بو دەربازکرنا کوردستان و عیراقێ ل ڤێ قوناغا نەئارام ؟