پشتی وێ کریزا مەزن ئەوا ریبریێ ھەرێما کوردستانێ بوی ب ئەگەرێن جودا جودا کو پشکەک ژ وان ئەگەران ب ھەرێمێ ڤە گرێدای بون و چارەسەریا وان تایبەتە ب حکومەتا ھەرێما کوردستانێ ڤە. ئابورێ بھێز ھیڤیا ھەمی تاک و جڤاک و کیانەکێ سیاسی یە ل سەرانسەرێ جیھانێ و نھا ھژمارێن ئابوری دەسەلاتێ ل سیاسەت و جڤاک و روشنبیری و سەربازی و ھەمی ھەفکێشێن نێڤدەولەتی دکەت لەوما گەھشتن ب ئابورەک بھێز فەرە ل کارێن ھەری پێشین بیت یێن حکومەتا ھەرێمێ ئەو ژی ژبەر کو ئەڤی میللەتی ب دەھان سالان دەردەسەری دیتینە و نەخوشی تنێ ل ئاخا ب پیتا کوردستانێ بو وی بوینە , ھەروەسا د نھا دا ئابور دشێت ھەلویستێن سیاسی ژی دگوھریت و زور یا گرنگە بشێت ب پلانەکا موکم کار بکەت بشێت وەلاتێن بھێز و مەزنێن جیھانێ ب خوە ڤە گرێبدەت و بەرژەوەندیا ھەفپشک دروستبکەت دگەل دا .
نھا ئەگەر باس ژ رەوشا دەڤەرێ بکەین دێ کاریگەریا ئولی و سیاسی و سەربازی و دیروکی کەڤیتە ئالیەکێ و ئابور دێ کەڤیتە ئالیەکێ و نموونە ژی ھەفکێشا سیاسی و سەربازی ل بیست و دوو وەلاتێن عەرەبی دناڤبەرا بلوکێ قەتەری - ئیخوانی , ئیماراتی - نەتەوەی و عیلمانی پارڤە بویە ! دوو وەلاتێن کو ژ مینا قەتەر و ئیمارات و تنێ سیە چل سالە ل داگیرکەریێ خلاس بوی و دشیان داھەیە ئاراستێ ریدانێن سیاسی و سەربازی و دەسەلاتداریێن بگوھرن , ھەمی ژی بو ھەبونا ئابورەک بھێز دزڤریت و ئەو (مال السیاسی ) ئەوێ د ڤان وەلاتان دا دمەزێخن ..ئەڤ نموونە رامانا وێ چەندێ ددەت کو ئابورێ بھێز دشیان دا ھەیە ل بیاڤێن سیاسی و سەربازی مفای ژێ ببینی. فەرە حکومەتا ھەرێما کوردستانێ گاڤێن ب ڤی ئاوای بھاڤێژیت کو بشیت بەرێ کومپانی و مەزنە وەلاتێن جیھانێ بدەتە وەبەرھێنانی بو ھندێ ئابورێ ب داھاتێ نەفتێ ڤە گرێدای ببیتە ئابورەک بھێز و موکم و داھاتێن جودا جودا پەیدا ببن . ھەتا نھا حکومەتا ھەرێمێ گاڤێن باش د ڤی بیاڤی دا ھاڤێتینە لێ یا پێتڤیە چەند خالێن گرنگ بێنە بەرچاڤ کرن ل دەمێ ھاتنا وەبەرھێنانا بیانی ژ وانا شەفافیەت ل ڤان گرێبەستان دا کو ببیتە فاکتەرێ خوشگوزەرانی و بھێزکەفتنا کوردستانێ نەک جھێ گازندێن وەلاتیان . ھەروەسا فەرە ئەڤ کومپانی و وەلاتێن کو دھێنە کوردستانێ وەبەرھێنانی دکەن بێنە نەچارکرن کو وەبەرھێنانێ ل بیاڤێن جودا جودا بکەن وەکی کەرتێ گەشتیاری و چاندن و پیشەسازی .و پاراستنا بەرژەوەندیێن نفشێن داھاتی ژی بێتە بەرچاڤ وەرگرتن و چ گرێبەستەک نەبیت کوردستانێ ریبریێ کریزان بکەت .
سەبارەت ب چاکسازیێن نافخوی ژی خالا ھەری گرنگ بو بھێز کەفتنا ئابورێ کوردستانێ دانانا یاسایەکێ ل پەرلەمانی بو رێکخستنا داھاتان و زێدەکرن و ھەمە جورکرنا وان و کێم کرنا خەرجیێن گشتی و کەرتێ تایبەت ژی بەس نەبیتە تەفشیێ بەرێ خو و ھندی مفا ل حکومەتێ ھەیە د گەل بیت و پشتی ھنگی ژی ببیتە بار سەر ملێن حکومەتێ !
پێش چاڤێن خەلک و حکومەتا ھەرێما کوردستانێ روون و ئاشکرایە کو ئابورێ کوردستانێ ھەتا نھا ل ئابورێن لاواز و تاک داھاتە و ھەر دەم جھێ مەترسیێ یە , ھندی ب ڤی ئاوایی بمینیت! لێ نھا پشتی باشتر بونا رەوشا دارایی فەرە پێنگاڤێن جدی ژ بال حکومەتا ھەرێمێ بێنە ھاڤێتن و سنورەک بو گەندەلێ بێتە دانان و خەرجی بێنە رێکخستن و داھات بێنە زورکرن و ھەمە جورکرن , ب بھێزکەفتنا ئابورێ کوردستانێ ھەلویستێ وەلاتێن جیھانێ ژی دیتنا خوە ھەمبەری بزاڤێن سیاسی یێن کوردستانێ دگوھریت .و وەک ژ بال رایەدارێن وەلاتی دئێتە گوتن قویناغێن گەش ل پێشیا مەنە و کریز ب داوی ھاتن , لێ بدیتنا من ئەو قویناغ ب پلانەک ستراتیجی و دووم درێژ و ب ویژدان بەرھەم دئێت ھەتا د گەھیتە وی رادەی ئابورەک بەرھەم بھێت بشێت کار ل بریارا سیاسی بکەت ل وەلاتێن ئیقلیمی و نێڤدەولەتی.