ئێك ژ نیعمه‌تێن ئه‌سمانی ئه‌وه‌ كارێزماتیا سه‌ركێشێن ملله‌تانه‌، یا مه‌ كوردستانیان ژی نه‌ ب تنێ‌ هه‌ما ب ناڤ سه‌ركێش یێ‌ عه‌زیز و هند، به‌لێ‌ ئه‌و كارێزماتی نه‌ ب ساناهی هاتیه‌ دی، ب ره‌نج و خه‌بات و گیان پیشكێشكرن، هه‌روه‌كو بابێ‌ نه‌مر مسته‌فا بارزانی فه‌رمۆتی: خه‌باتا مه‌ یا هه‌رده‌م ل كوردستانێ‌ نه‌ ژ نشكه‌كێ‌ ڤه‌ په‌یدابوویه‌، به‌لێ‌ ژ ئه‌نجامێ‌ تێكۆشان و بزاڤا رۆژانه‌ بوویه‌.. ئه‌ڤجا ئه‌ڤ نهێنیا باوه‌ریا ل ده‌ف سه‌ركێشێن كوردستانێ‌ هه‌یی و ئه‌و ئیراده‌ و باوه‌ریا هه‌یی و ژ حزبا پارتی دیمۆكراتی كوردستان، به‌رێ‌ بنیاتێ‌ كوردستانا سه‌ربخوه‌ یه‌، ئه‌ڤ ململانێن دژوار و خویناوی یێن ساله‌ها سالان ب سه‌ر كوردستانێ‌ دا هاتی، كێم ده‌سهه‌لات دكارن ل به‌ر راوه‌ستن، ئه‌و هێزا هه‌نێ‌ ژ ئیراده‌یا مله‌تی یه‌، ماده‌م مله‌تێ‌ كورد كلیلا دلۆڤانی و گیانفیدایا خوه‌ به‌خشی ڤێ‌ حزبێ‌ و سه‌میانێن نه‌ته‌وه‌بوونا خوه‌ كری، ب زه‌حمه‌ت لایه‌نه‌كێ‌ دیتر دكاریت وی جهی بگریت، خۆشیا هه‌بوونێ‌ ئه‌وه‌ ناڤوه‌ده‌نگیا ملله‌تان ب سه‌ركردێن وانه‌ و خه‌باتا وان و ئه‌و قوربانیدانێن پێشكێشكرین ب هه‌روه‌ نه‌چن، به‌لكو دیرۆكه‌كا زێرین دخه‌ملینیت، هه‌ڤوه‌لاتیێن هه‌رێمێ‌ ژی سه‌لماند كو ب هه‌می هیمه‌ت و خۆراگریا خوه‌ ل گه‌ل سه‌ركرداتیا خوه‌نه‌ و تشتێن دونیایی كارتێكرنێ‌ ناكه‌نه‌ سه‌ر، به‌لكو ئه‌وان ب هه‌می هێزا و ئیرادا خوه‌ په‌یاما خوه‌ گه‌هانده‌ هه‌می جیهانێ‌ و وه‌رزه‌كێ‌ گرنگ و بێ وێنه‌ د دیرۆكا خوه‌ دا تۆماركر، به‌لێ‌ بهایێ‌ وی ژی نه‌ه‌خۆشیا سێ‌ سالێن قه‌یرانێ‌ بوون، ژ بلی ئه‌و خوین و گیانێن شه‌هیدان دای و ل پردێ‌ و سحێلا شه‌ره‌فا گه‌لێ‌ كورد ژ وان درندان قورتال كری، خودی بۆ ڤی گه‌لی ئه‌و فریشتێ‌ زانا و گرنگ فرێكر ك ولێ‌ ببیته‌ خودان و ژ هه‌می نه‌خۆشیا و سه‌خیتا رۆژێن به‌رته‌نگ ده‌ستێ‌ خوه‌ ل سینگێ‌ خوه‌ بده‌ت و سۆزێ‌ بده‌ت وان ژ وان قه‌یرانێن مادی قورتال بكه‌ت، ئه‌ڤرۆ ژی ئه‌و رۆژ هات و مه‌ هه‌میان ب چاڤێن خوه‌ دیت كو ئه‌م ژ ئیناینه‌ ده‌ر ژ وێ‌ دۆرپێچا كو كه‌سێ‌ و چو ده‌وله‌تان ملێ‌ خوه‌ نه‌دایه‌ به‌ر، دوور ژ وان پێشوازیێن سیاسی یێن چه‌ند وه‌لاتێن ئه‌ورۆپی و و یێن جیهانی، راسته‌ ئه‌و ژی په‌سه‌نده‌كا گرنگ بوو و دانپێدانه‌كا فه‌رمی بوو ب هه‌رێما كوردستانێ‌ و حوكمه‌تا وێ‌ و سه‌رۆكاتیا وێ‌ و جه‌نابێ‌ نێچیرڤان بارزانی كو ئه‌و ب گه‌لێ‌ خوه‌ ڤه‌ د سته‌ملێكرینه‌ ژ بال گه‌له‌ك زلهێزان ڤه‌، زێده‌باری ڤێ‌ سۆزا نێچیرڤان بارزانی، ته‌مامكه‌را سۆزا مه‌زنا مه‌رجه‌عێ‌ كوردستانێ‌ مسعود بارزانی بوو ده‌مێ‌ كه‌رمكری كو ئه‌ز ئه‌و كه‌سه‌ نیم خوه‌ی شه‌رمزارێ‌ مله‌تێ‌ خوه‌ بكه‌م،!!. ئه‌ڤجا ئه‌و رۆژ گیرۆنه‌بوو یا مه‌ سۆزێن كارێزمایان دیتین و خۆشی پێ‌ بری و جاره‌كا هه‌ر تشته‌ك زڤری سروستێ‌ خوه‌ وه‌كو به‌رێ‌ و به‌لكو دێ‌ باشتر بیت به‌ره‌ف ئاڤه‌دانیێ‌ و پێشڤه‌چوونێ‌ و كوردستانه‌كا ئازا و سه‌قامگیر.