تیرور دیاردەکا جیھانی یە و ھەتا نھا ب دەھان پێناس بو ھاتنە دانان و زورجاران ئەڤ پێناسە ب بەرژەوەندیێن بلندێن دەولەتێ ڤە گرێداینە و ھندەک جاران ژی سەرکردێن دکتاتورێن چەند وەلاتەکێن جیھانێ ھەڤرکێن خویێن سیاسی وەکی تورکیا و سوریا و ئیران و مسر .. تد. ب یاسایێ کرینە بن بەندێن تیرورێ !.تیرور ئایدولوژیایەک شەرانخاز و کوژەک و توندوتیژ و بێ ویژدان و خرابکەر و رەشبین و دژە مروڤ و نەتەوە و مەزھەبە و سەربەخویی و ئازادی و ژینگەە و ئول و وەلات و پێشکەفتن و زانست و ئارامیە. لەوما زور شاشە ئەگەر تیرورێ ب ئولەک یان مەزھەبەک یان نەتەوەک جوداڤە گرێبدەین. ترساندن و کوشتن و رەڤاندن و دەربەدرکرن و جینوسایدکرن و ب یاسا دژاتیی کرن و بێ بەھرکرن ژ ژیانەک ئارام تیرورە چ بەغدادی یان جولانی یان حوسی و سیسی و ئوردوگان یان بشیر و حەفتەر و مادوور و روحانی بن . تیرور ھەر تیرورە و فەرە کار بو نەھێلانا وێ ب ھزرێ بێتەکرن و شەرێ چەکداری ئاریشا تیرورێ ب گشتی بنبرناکەت.وەک زور جاران ئەڤ چەند ژ ئالیێ سەروکێ حکومەتا ھەرێمێ و رایەدارێن سەربازی و سیاسی ل ھەرێما کوردستانێ دووپاتی ل سەر ھاتیە کرن.
(١)
ھوکارێن سەرھلدانا تیرورێ
سەرھلدانا تیرورێ گرێدای ب چەندین فاکتەرێن جوداڤە ھەیە ھەر ژ ھوکارێن جڤاکی و پەروەردا سەقەت و دەرونێ شەرانی و ژینگەھا ب پیت بو ڤی بابەتی و کریزێن ئابوری و سیاسی و ھەست کرن ب زولم و ستەم و بەرەڤانی کرن ژ ئولی ب رەنگەک شاش و ھەروەسا کارڤەدان بەرامبەر سیاسەتێن دەسەلات و دەولەتێن بیانی و کاریگەریا خرابا زورەک ژ داعشێن رینشتی ئەوێن سەر تیڤی و سوشیال میدیایێ بەرێ گەنجێن بسلمانا ددەنە تیرورێ و ناھێلن کورێن وان ڤی کاری بکەن .تیرورێ چەندین ھوکار ھەنە و فەرە چارەسەری ژی چەند ئالی بیت.
(٢)
تیرور دناڤبەرا شیعە و سوننەیان
سەرھلدانا تیرورستێن داعش ل سالا ٢٠١٤ و گرتنا سێیەکا ئاخا عیراق و ئەردەک مەزن ژ سوریایێ و ئاڤاکرنا خیلافەتێ ل خەزیرانا ھەمان سالدا و چالاک بونا وێ و ھێرشکرنە سەر کوردان ل باشور و روژئاڤا پتر دەنگ ڤەدا و بەرەڤانیکرن و ھێرشێن بەروڤاژی بو سەرداعشێ دەستپێکرن. نھا دا دەولەتا داعشێ ل سەر نەخشێ سیاسی نەمایە و ب ھزاران چەکدارێن وێ خو رادەستی شەرڤانانێن ھەسەدێ کریە و ب ھزاران چەکدار ژی ل بیابانێن عیراقێ د ڤالاتیێن ئێمناھیێ و ژینگەھەکا خوش دگەرێن کو بدیتنا من دەڤەرێن سوننی ل عیراقێ دووبارە دێ پشتەڤانیا تیرورێ کەنەڤە ژ بەرکو دەولەتا عیراقێ وەک پێتڤی نەشیا سەرەدەریێ بکەت بەلکو ب چاڤێ تولڤەکرنێ کار کر نەبتنێ تولڤەکرن ل زولم و ستەما سەردەمێ سەدامێ دکتاتورو داعشێ بگرە تولا ئیمام علی و ئیمام حوسێنی ژی ل خەلکێ سڤیلێ دەڤەرێن سوننی کرەڤە و پتر کەرب و کین دناڤبەرا ھەردوو لایا دا دروست بویە و ھەردەمێ جارەک دن بو سوننەیان دەرفەت بێتە پێش بێ دوو دلی دێ جینوسایدێ ب سەر شیعەیان ئینن . ئەڤە ئاقلیەتا تاک و جڤاک و سەرکردێن عیراقێ یە!
(٣)
کورد د ھەفکێشا مان و نەمانا داعشێ دا
کورد بەردەوام بویە قوربانی زولم و ستەما تیرورێ و حکومەتێن دەڤەرێ ئێک ژ بەر کو کورد نەتەوەیەک جودایە و ئەوان بەردەوام ھەبونا حەزا سەربەخویێ دەف کوردان ب رێگری و ئاریشە دانایە بو ئارامیا دەولەت و سنورێن خوەیێن دەستکرد! ھەروەسا بزاڤێن تیروری ژی بێ کو پێزانین ل سەر کوردان ھەبن وەک نەتەوەک بسلمان و چ جاران ئول بو کوردان نەبویە ئاریشە و ھەردەم پێگیر بوینە و پرانیا سەرکردێن کوردان ل دیروکێ و ھەتا نھا ژی شێخ و سەید و مەلا و بنەمالێن وان بوینە و ئەو ژی بو رولێ ئولێ پیروزێ ئیسلامێ ڤەدگەریت د جڤاکی کوردەواری دا ب ئەڤرو ڤە ژی پەیڤا ئولی ل سەر ھەمی پەیڤەکێ یە. کوردبوینە قوربانیێن تیرورێ و خوشبەختانە چ جاران ب درێژاھیا دیروکا خەباتگێری و چەکداری دەست نەبریە بو چالاکیێن تیروری . د ڤان سالێن داویێ دا ئەنتی کوردی ل ناڤ گروپێن تیروری ب رادەیەکێ زورزێدەببو ھەتا چەکدارێن کوردێن دناڤ داعشێ ژی دا نەببونە جھێ باوەریا خیلافەتا بەغدادی !! سوپاس بو خودایێ مەزن کو ھەتا نھا کوردستان ل پیلانێن تیرورێ پاراستیە و خەلک تێگەھشتیە کو تیرور دەستکردە و دەمکیە و چەند نەزانەک پێ رادبن. فەرە ل سنورێن باشورێ کوردستانێ پێشمەرگە ل بەرھەڤیێن باش دابیت ژ بەرکو ئەو کەرب و کین بەردەوام ل دلێ وان تیرورستان دامایە و ھەتا ھێرشێ شڤان و گاڤانێن بێ گونەھێن کورد شەھید دکەن! لەوما زور گرنگە ل کوردستانێ راگەھاندن ب شێوازەک ئەکادیمی و دیر ژ دروستکرنا کارڤەدانێ ژ ئالیێ جڤاکی ڤە و باس ژ تیرورێ بێتە کرن و تیروری بەرھەمێ ھزر و ژینگەە و پەروەردەو دەرونێ کەساتی و پالدەرێن جودایە لەومانابیت ب ھیچ ئاوایەکێ ئولێ ئیسلامێ ب تیرورێ تاوانبار بکەن ل دەمەکێ دا ٩٠% خەلکێ کوردستانێ بسلمان و ھەر دھەمان دەمدا بەرامبەر داعشێ دجەنگن و پتر ١٧٠٠ژێ شەھید بوینە .