بەری دوو سالە ئێک ژ سەرکردێن ھەری دیارێن ئێکەتیا نیشتیمانی راگەھاند ئەگەر کورسیەکێ و سەد کورسیان بینین ئەم ھەر ئێکەتی نە ! ب راستی فەرە د وی دەمی دا ھەڤرک و دوستێن ئێکەتیی ھزر ژ ھندێ کربا کو د پروسا دیموکراسی و پێشبرکێا ھەلبژاردنان ھژمارە دئێتە گوھرین و دبیت ھەر ھەمی ئالیەک ژی ب سینگەک بەرفرەە وەربگریت و کار بکەت بو بەرەف پێش چونا ڤێ پروسێ . ئەڤرو پشتی دوو سالا ل گوتنێ و ھاتنە گوھرینا ھەفکێشێ و ب دەست ڤە ئینانا (٤٥) کورسیان ژ ئالیێ پارتی دیموکراتی کوردستان ڤە کو دشیان دا ھەیە ئەگەر بابەت دیموکراسی و زورینە و کێمینەیە ھەمی پرسەکێ ئێک لایی بکەت .
ئەرێ پێنگاڤا پارتی تولڤەکرن بو ؟
دیتنا من پێنگاڤا پارتی بو پێکئینانا دەستەیا سەروکاتیا پەرلەمانێ کوردستانێ کارکرنە بو دووبارە ئاڤاکرنا کوردستانەک بھێز و رێکخستنەڤە و دووبارە ئەکتیفکرنا سازیێن گرنگێن وەلاتی ئەوێن ژ ئەگەرێ ئالوزیێن نافخوی و پرسێن یاسایی دەمێ وان تمام ببو. ھەروەسا وەک تێتە گوتن پارتی ناحەقی نیە ژبەرکو خودانا زورترین کوسیکێن پەرلەمانی یە و ب وان پارت و پێکھاتێن دناڤ پەرلەمانی دا ئەوێن نیزیکی خو دشێت ھەمی کارەکێ بکەت.ئەگەر تولڤەکرن ژی بیت دئێتە بەرامبەر وێ چەندێ کو ئێکەتیێ ل دانانا سەروک کوماری ل بەغدا کری و نەریتەکێ یاسایی (عورف قانونی) دا دەستێ ئالێن عیراقێ ھەردەمێ ڤیا بەھرا کوردان ل ناڤ خودا و ب کوردەکێ وەکی خوە بدەن .لەوما ئەڤ پێنگاڤا پارتی ل دروستکرنا نەریتەکێ یاسایی ل پەرلەمانی پشتی پتر ل بیست و حەفت سالێن ژیانا پەرلەمانی بو ئێکەم جار بو ل پرسەک گرنگ دا بێ ئێکەتی نیشتیمانی بریارەک ب ڤی ئاوای بێتە دان و ئەڤ چەندە ژی ئیدی بو نەریت ل کوردستانێ ئەڤرو ئێکەتی و سوبەھی پارتی و روژەک دیتر ب نەھاتنا ئالیەکێ دی بو ھولا پەرلەمانی کار ب ئاسای و یاسایی ب رێڤەبچیت .
کارڤەدانێن ئێکەتی چەند دجھێ خو دا بین ؟
رێزگرتن ل خەباتا کوردینیێ ئەرکێ ھەر وەلاتیەکێ کوردستانیە و فەرە رێز ل خەبات و قوربانی دانا ھەر تاک و حزب و گروپەکێ بێتەگرتن , بەلێ پشتی سازیێن مەدەنی و دیموکراسی ھاتینە گورەپانێ و سیاسەت نەما ب چەکی و نفشەک ھاتە پێش کو نفشێ پێشکەفتن و تەکنەلوجیا و ئەنتەرنێت و سوشیال میدیایێ یە ... ئەڤ گەنجێ ئەڤرو دژیت زور گرنگ نیە دەف وی کی خەبات کریە و بوچی کریە و کەنگی کریە و چەند کریە و کی قوربانی دایە و چەند قوربانی دایە ..؟ ئەڤرو خەلک ھەمی تایبەت گەنج و نفشێ نوی ل ژیانەک ئارام و بێ کێشە و ب ھەبونا خزمەتگوزاریان دگەرێت ..ژیوارێ ئەڤرو ڤێ ئێکێ دبێژیتە مە , پارتی و ئێکەتی وەکی دوو پارتێن خوەدی خەبات و شورەش و قوربانی دان و ب حوکمێ وێ خەبات و قوناغێن دیروکی کو دیفاکتویەک دروست ببو و چەکداری وی دەمی ببیتە خەباتا ھەری پێشینە بو رزگاریا گەلێ کورد بونە خوەدی چەک و پشتی سەرھلدانێ وەرە بوینە خوەدی پارە و سازیێن ئەمنیاھیێ و سەربازی و دارایی ..پشتی بیست و ھەشت سالان ل دەسەلاتا کوردی فەرە ھەر دوو پارت رازیببن و دەست ژ وێ ئێکێ بەردەن کو خوەدیێ چەک و پارە و جوگرافیایەکا تایبەت بخوەنە!! ئەرێ ئەگەر ھەر پارتەکێ پارە و دارایی و چەک و ھێزێن ئێمناھی و سەربازی و جوگرافیەک تایبەت بخو ھەبیت ! چ دبێژنە وی وەلاتی؟ ئەرێ کا ئێمناھی ل وی وەلاتی ؟ ئەرێ کا ھەلبژاردن و دیموکراسی ؟...؟ ئانکو ب ھیچ ئاوایەکێ نابیت و نەیا د جھێ خودایە سەرکردێن ئێکەتیێ گەفێن دووئیدارەیی و پلانێن ھەتا (….xyz) بکەن یان ئەڤ چەندە دبیتە مەترسی یان شاشیەکا مەزن بو یان بێ دەنگ نابین ..پێتڤی ب ڤێ چەندێ ھەمیێ نائێتەکرن و یا گرنگ ئەوە دانوستاندن دناڤبەرا ھەردوو ئالیان دا ببیتە دادڤان و ھەر ئێک دیف سەنگا خو دەست ژ ئەقلیەتا شورەشگێری و چیا بەردەن و ئەگەر راستە پروسەک سیاسی و دیموکراسی ل کوردستانێ ھەیە فەرە ئەو چەندن بێتە قەبولکرن کو پەرلەمانێ کوردستانێ (١١١) کورسینە و ژ وانا ھەڤرکیا پارتێن کوردستانی ل سەر (١٠٠) کورسیانە و ئێکەتی خوەدیێ (٢١) کورسیایە و ناگەھیت نیڤەک ژ کورسیێن پارتی . ژ بەرڤێ چەندێ دەمێ گوھداریا ئێکەتیێ دئێتەکرن ب گیانێ سالێن نوتان دئاخڤن و ھەمان مەترسیا بەری شازدێ ئوکتوبەرێ دەف خەلکی دروست کریە.