ھەرچەندە پەکەکە ( پارتیا کارکەرێن کوردستانێ) ھەل ل دامەزراندنا خۆ لسالا ١٩٧٨ خۆ ب پارتیەکا نەتەوی یا کوردستانی لسەر ھزرێن مارکسی دیار دکر و درۆشمێن نەتەوی یێن مەزن بلند دکرن ، مینا داخازیا کوردستانەکا مەزن و سەربخۆ . پشتی لسالا ١٩٨٤ شەرێ چەکداری ژی لسەر ڤی درۆشمێ زۆر لخۆ مەزنتر شەرێ چەکداری دژی رژێما تورکیا راگەھاندن .
لێ ئەزمۆنا وان یا ڤان ھندە سالا دیار کر کۆ ئەڤ پارتیە نە لسەر پرنسیپێن نەتەوی و نشتیمانی یێن کوردستانە یە ، چونکی نە تنێ نەشیا بەرەڤانی ل بەرژەوەندێن خەلکێ کوردستانێ بکەن ، بەلکی بەرژەوەندێن نەتەوی و نشتیمانیێن خەلکێ کوردستانێ ژناڤ برن و نەشیان ئێک گۆند رزگار بکەن ..!
ل باکۆرێ کوردستانێ سیاسەتا ئێک ڕەھندی بکار دئینن و بووینە ئەگەرێ گرتن و کوشتنا ب ھزاران خەلکێ کورد و وێرانکرنا چەندین گوندان ، ب ھزاران گەنج و سنێلە ب مەرەما کوردایەتیێ و نەتەوایەتیێ بسەردا برنە و جەرگێن دایک و بابێن وان سۆتینە و دناڤ شکەفت و دۆڵ و نھالێن باشۆرێ کوردستانێ ب دژوارترین شێواز دژین و نەشێن پەیوەندیێ ژی دگەل ماڵباتێن خۆ بکەن .
رۆژئاڤایێ کوردستانێ لسەر ئاستێ نافخۆیی رێگری ل ئازادیا ھزر و بیران گرتیە و ھەما سیاسەتا خۆ سەپاندنێ بکار دئینن و ب ھزاران گەنجێن کورد ژ پێخەمەت بەرژەوەندێن تایبەت لدوور جوگرافیا کوردستانێ داینە کوشتن ، ژبەر تۆند رەویا وان بسەدا ھزار کوردێن رۆژ ئاڤا ئاوارە و دەربدەر بوونە و کورد ل دەڤەرێن کوردستانی کرینە کێمینە .لسەر ئاستێ دبلۆماسی نەشیانە چ کەنالێن دبلۆماسی بۆ بەرژەوەندێن نەتەوا کورد درۆست بکەت و ھەتا نھو ژلایێ زۆروەلاتان ب رێکخراوەکا تیرۆرستی دھێتە ھژمارکرن .
ل ھەرێما کوردستانێ ژی ھەر ل دامەزراندنا حکومەتێ ، چەکدارێن پەکەکێ مەزنترین ئاستەنگ بوونە بەرامبەر ئاڤەدانیێ و ئێمناھیێ ، ب سەردان گوندێن کوردستانێ ھاتینە ڤالاکرن و لدەمێ چەند سالا لجھێ شەرێ دوژمنێ خۆ بکەت شەرێ خەلکێ ھەرێما کوردستانێ کریە و دناڤ مزگەفتان ژی مامۆستایێن ئایینی تیرۆرکرنە ، ژبلی کورشتنا خەلکەکێ سڤیل ژلایێ وان ب بەھانەیا وان بسەدا کەس بووینە قوربانی بۆمبە بارانکرنا فرۆکێن تورکیا . ئەڤرۆ پەکەکە مەزنترین گەفە لسەر ئاکنجیێن گوندێن سنووری یێن ھەرێمێ ، چ ژلایێ ئێمناھیێ ، یان ژلایێ ئاڤەدانی و چاندنێ و گەشتیارێ .
ئەگەر ژبەر گەفێن وان نەبیت سالانە داھاتێ ڤان گوندان دێ ئابوورێ ھەرێما کوردستانێ ڤەژینن . برەنگەکێ گشتی پەکەکێ و رێکخستنێن بن شاپەرێن وان ، ل پرنسیپێن نەتەوایەتیێ و کوردایەتیێ لادایە و ژ بلی زیانێن مەزن چ مفا نەگەھاندیە کوردستانێ .
حکومەتا ھەرێما کوردستانێ ب سەرۆکاتیا نێچیرڤان بارزانی چەندین ساڵە ژبۆ پاراستنا ئێکرێزیێ و دووبارە نەبوونەڤا شەرێ نافخۆیی ھەتا راددیییکێ لسەر ڤێ دژایەتیا وان بەرامبەر ھەرێما کوردستانێ بێ دەنگ بوویە ، ئەگە نەر دشیا سنوورەکی بۆ دابنێت . پێتڤی بۆ پەکەکێ مفا ل ئەزمۆن و سەربۆرا حکومەتا ھەرێما کوردستانێ یا بسەرۆکاتیا نێچیرڤان بارزانی وەرگرتبا ، ب تایبەت ژلایێ دبلۆماسیەتێ و ئێمناھیێ و ئێکرێزیێ و ئاشتەوایا جڤاکی و پاراستنا دەسکەفتێن نەتەوی و نشتیمانی ، نەک دژایەتی لێکربا و ببا ئاستەنگ لھەمبەر ئاڤەدانیێ و ئێمناھیێ و ئاشتەوایا جڤاکی .
ئەگەر پەکەکێ کێمترین ھەستا نەتەوی ھەبا نەدبوو رێگر لھەمبەر بەستنا کۆنگرێ نەتەوی و ل ھەمی پارچێن کوردستانێ رێکخستنێن بھەمان ئایدیولۆژی دروست نەدکرن .
ئەگەر ئەڤ سیاسەتا نە سیاسیا پەکەکێ نەبا ،لجھێ بۆمبەبارانکرنێ ژلایێ فرۆکێن تورکیا ، دەستێن ئاڤەدانیا حکومەتا ھەرێما کوردستانێ بسەرۆکاتیا نێچیرڤان بارزانی دا گەھنە ھەمی گوند و دەڤەرێن سنووری یێن ھەرێما کوردستانێ و زۆربەیا وان دا بنە خۆشترین جھێن گەشتیاری ، ژبلی کێمکرنا قەیرانا ئاکنجیکرنێ ل باژاران .
پێتڤی یە پەکەکە ب سیاسەت و سەرەدەریێن خۆ دگەل ھەرێما کوردستانێ بچیتەڤە و بەردەوامیا وان لسەر ڤێ رێبازا دژی بەرژەوەندێن ھەرێما کوردستانێ نە خزمەتا کوردایەتیێ دکەت نەژی رێکخستنێن وان پێ گەشە دبن ، پاشەرۆژا وان ژی دێ بەرەڤە ئاییندەکێ ڕەش و تاری بەت .