سس زورجاران ئەڤ گوتنە ھاتیە د گوھێن مە دا دەمێ دبێژن دوژمنێن کوردان ئێک ھەلویست بەرامبەر کوردان ھەبویە ل وی دەمی کو بەرژەوەندیێن وان کەفت بونە مەترسیێ , لێ کورد ھەتا رادەکێ ل ڤێ پرسێ نەگەھشتیە و بەردەوامی دایە کریزێن نافخوی و ئێک دوو رەتکرن کریە ھزر و بیر و باوەرێن خو و ل ئێک بازنێ دا زڤریە و دیروک بێ بەرھەم ل زور دەمان دا دووبارە کریە.
دەمێ سەروکێ رژێما بەرێ سەدامێ دکتاتور ئێک ژ سەروک ھوزێن کوردان ل سێدارە دای بەرامبەر سەروک جاشێن کوردا دووپاتی ل سەر ھندێ کر ل گوتنا خو دا کو ھەبونا وان سەروک جاشا وەکی سەیێت نەھیلانا گورگانە ! د ئێک دەم دا کەسەک ژێ دکوشتن و ئەو تەماشەکەر بون و ب سەیێن راڤێ د دانە نیاسین! بو مە جھێ سەرسورمانێ یە کو کەسەک ھەتا ڤی رادەی دژی کوردان بیت و ل ھەمان دەم ژی دا کورد ژی دژی ھەڤدو بن ! وەکی دبێژن (ھەمی دونیا دوژمنێ کەوێ یە و کەو ژی دوژمنێ خویە ) و ئەڤ گوتنە ب درێژاھیا دیروکا کوردان سەد ل سەد ل سەر بجە ھاتیە . ل سوریێ حکومەتا بەعس دانا ناسنامێ ب کوردان ب رەوا نەدیت , ل دەمەکێ دا رێژەیەکا زور ژ دلسوزێن حکومەتێ ل ناڤ کوردان ھەبون ب ئەگەرێن جودا جودا . ل دەمێ ریدانێن شازدێ ئوکتوبەرێ حەشدا شەعبی چ نەمای ب کوردستانیان نەکەن ل دەمەکێ دا کو ھاریکار ژی ل ناڤ کوردان دا ھەبون .ھەتا رێکخراوا تیرورستی یا داعش باوەریا تەمام ب وان چەتێن خوەیێن کورد نەبو ئەوێن ل گەل دا ! دیروکا کوردستانێ ھەتا نھا ژی یا پرە ل نموونێن جوداھی نەکرنا دوژمنان بەرامبەر کوردا جاش بیت یان کوردپەروەر بیت . د ساخکرنا بیرەوەریا پازدە سالیا کارەساتا ئێکێ شوباتێ ل ھەولێرێ سەروکێ حکومەتا ھەرێما کوردستانێ نێچیرڤان بارزانی گوت(ئەو راستی دەرکەفت کو دوژمنێن مە چ جوداھیا ناڤبەرا مە ناکەن , دڤێت ئەم ژی بیرا خو بینن کو فەرە ئێکگرتی بین و ئێک رێزیا خو بپارێزین ) , ب راستی فەرە ئەڤ گوتنە بێتە پراکتیزەکرن و ھەمی پارتێن سیاسی ل کوردستانێ وێ چەندێ باش بزانن کو دوژمن ب ئێک چاڤ سەحدکەنە کوردان ھەردەمێ ب چاڤەک جودا سەحکرە ئالیەکێ و سەرەدەریەک جودا ل گەل کر وی دەمی بیرەکێ بو دکولن و وەختیە و دێ بو پروژێن خوەیێن دووم درێژ کار ئینن .
ئەرکێ کی یە ئێک رێزیا ناڤ مالا کوردی بپارێزیت ؟
زور یا گرنگە ھەمی ئالیێن کوردستانێ وێ چەندێ باش بزانن کو ئەڤ وەلاتە وەکی گەمیەکێ یە و چارەنڤیسێ مە ھەمیا یێ تێدا و ب کون و کوژی دروست کرنێ واتا بن ئاڤکەفتنا ھەمی ئالیەکێ . لێ گونەھە ئەگەر ئەم بێژین سوسیالست و شیوعی ھەمان بەرپرسیاری دکەڤیتە ستویێ وان ھەر وەکی پارتی و ئێکەتی بو باش کرنا ڤێ رەوشێ ؟ نەخێر د نھا دا پارتی و ئێکەتی وەکی دوو ھێزێن مەزنێن سیاسی ل کوردستانێ و خوەدی خەباتەک مەزن و دیرو درێژ و ھوکارێن سەرەکی بون بو بەرەف پێش برن و پاراستنا کیانێ سیاسی و دەستوری ل کوردستانێ زێدەباری ھەبونا دەھان کێشەیێن سیاسی و ئابوری و جڤاکی ل وەلاتی کو بەرپەرسیاریا وان یا رەھا دکەڤیتە ستویێ ھەردوو پارتێن ناڤ ھاتی. نھا ژی چارەسەرکرنا قەیرانێن دگەل بەغدا و باش کرنا رەوشا کەرکوکێ و پێکئینانا کابینا نوی ھەر دیسان پارتی و ئێکەتی لێ بەرپرسن و ب رێککەفتنا ھەردوو ئالیان ئێمناھیەک دکەڤیتە ناڤ وەلاتی دا و ئەڤ ھەردوو ئالیە فەرە وێ چەندێ بینە بەر چاڤ ل (١/ شوباتا / ٢٠٠٤) ب چ ئاوا خوینا سەرکردە و کادرێن پارتی و ئێکەتی تێکەل بی و زور یا گرنگە ھەر دوو لایەن پتر ھەمی دەمەکێ ھاریکار بن بو چارەسەرکرنا ڤێ رەوشا کو ل وەلاتی دروست بوی و خەلک ریبریێ بێ ھیڤی بونێ کری ل زور پرسان دا .
گەلێ کورد ب درێژاھیا دیروکێ ل خەباتەکا بەردەوام دا بویە بو رزگاری و سەربەخویێ و ئاڤاکرنەکا دەسەلاتەک تایبەت ب خو وەکی نەتەوێن دەڤەرێ , بەلێ ئەڤ داخازیە ب توپ و فروکە و شەر و کوشتنێ ھاتیە بەرسڤ دان و ب چەندین ھوکارێن جودا پشکەک ژ کوردان ڤیایە بەرژەوەندیا خو ل گەل دوژمنی بگونجینن بەلێ دوژمنی ب ئێک چاڤ سەحکریە دوست و دوژمنێن کورد . ب ھزاران نموونە ژی ل سەر ڤی بابەتی ھەنە . لێرەدا فەرە کورد ل خو بزڤریت و ئێکگرتی و ئێکرێز بیت و دەست ل ناڤ دەست بیت. ئەڤ ئەرکە ژی دکەڤیتە سەر ملێ پارتێن سیاسی تایبەتی پارتی و ئێکەتی وەک دوو پارتێن حوکمران ل کوردستانێ بو دەمێ بیست و ھەشت سالان , ب رێککەفتنا وان رەوشا کوردستانێ و ب کەرکوکێ ژی ڤە دێ بەرەف باشتر بیت ھەروەسا دێ کورد ل بەغدا بھێزتر بیت .