پێکول کرن بو چارەسەریا کریزێن ناڤبەرا ھەولێر و بەغدا کارەک باش و گرنگە و کاریگەریەک راستەوخو ل سەر ھەموو عیراقێ ھەیە , زورەک ژ وان کێشێن ل نافخویێ عیراقێ و کوردستانێ ھەی گرێداینە ب چارەسەرنەکرنا پرسا کوردی ب گشتی . پشتی ئاڤاکرنا دەوەتا عیراقا نوی ل سالا ١٩٢١ و گرێدانا کوردستانێ کو وی دەمی سەر ب ویلایەتا موسلا دەولەتا ئوسمانی ڤەبو , کریزا کوردی ژی دەست پێکریە ل عیراقێ دا وەک دووەم مەزنترین نەتەوێ وەلاتی و نەتەوەک خوەدی دیروک و جوگرافیا و ھەمی بنگەھێن ئاڤاکرنا دەولەتێ . ئەوا پتر کریز ئالوز کری ھەبونا نەفتێ بو ل دەڤەرێن کوردی ڤێ چەندێ ئێنگلێز پالدا کو دژی رێکەفتناما (سایکس - بیکو ) یا سالا ١٩١٦ و ئاگربەستا مودروس ١٩١٨ دەست ب سەر کەرکوک و کوردستانێ ھەمیێ دا بگرت و ھەتا نھا ژی بەردەوام دوژمنێن کوردان پێکولا داگیرکرنا کەرکوکێ و کوردستانێ ددەن بو ھندێ سەروەت و سامانێن وان بخون و ب چەکی بدەن و دژی بزاڤا رزگاری خوازا کوردی بکار بینن.
پشتی ریدانێن شازدێ ئوکتوبەرێ کو کوردان ئەنفال و جینوساید و بەعسیەتیا شیعەیان ژی دیت , بو دیار بو تنێ رێکەک ھەیە ل ڤێ دەردەسەریێ دەرباز ببن ئەو ژی ئێکگرتناکوردانە و پێنگاڤ ھاڤێتنە بو ئێمناھیا باژێری.پشتی زێدەتر ل سالەکێ ل داگیرکرنا دەڤەرێن رەسەنێن کوردی ھەر ژ شنگالێ بگرە ھەتا خانەقین ژ ئالیێ حەشدا شەعبی و گروپێن رەنگا و رەنگێن ئولی و مەزھەبی و حەزبی و نەتەوەی و کەسی و وەلایا خارجی دەرکەفت کێشا وان دەڤەرا ھاتنا توپ و دەبابە و ھێزێن داگیرکەر نینە ژ بەرکو ھەر ژ شازدێ ئوکتوبەرێ بگرە ھەتا نھا ب ھزاران ریدانێن ھوڤانە ل دەڤەرێ ریداینە ژبلی بەردەوامی دان ب ھەوا تعریب و مەزھەب سەپاندنێ و دەرکرنا خەلکێ دەڤەرێ , جارەک دیتر ھێرشێن تیرورستێن داعش نوی بونەڤە و دەست کریە ب کوشتن و سوتن و سێدارەدان و دووبارە رێکخستنەڤا رێزێن خوە کو مەترسیا دربێن مەزن لێ دئێتەکرن . وەکی دیار ل بەری ریدانێن شازدێ ئوکتوبەری ھێزێن پێشمەرگەی ل سەنگەرێن پاراستنا خەلکی دەڤەرێ بون ب ھەمی پێکھاتان ڤە بێ جوداھی , ھەر ئەڤ پیشەیی بونە بو خەلک بەرەف ھاریکاری کرنا پێشمەرگەی بری ل جھێ دوژمناتیێ .
زور گرنگە ھەردوو ھێزێن سەرەکیێن کوردستانی پارتی دیموکراتی کوردستان و ئێکەتی نیشتیمانی کوردستان ل بەغدا و کوردستانێ ل ھەڤھاتنەکێ بکەن کو ببیتە فاکتەرەک سەرەکی بو ڤەگەراندنا ئێمناھیێ بو دەڤەرێن رەسەنێن کوردستانی ل دەرڤەی ئیدارا حکومەتا ھەرێمێ. ھەبونا ئێکگرتنا کوردی پالدەرێ سەرەکی یە بو ڤەگەراندنا ھێز و پێگەھێ کوردی ل کەرکوکێ بەلێ فەرە د ڤێ گەرا لێک تێگەھشتن و رێککەفتنا د ناڤبەرا پارتی و ئێکەتی ب ھیچ ئاوایەکێ رێک نەھێتەدان بو بەرژەوەندیا پارتەکێ یان کەس و بنەمالەکێ کورد دەربەدەر ببیت و زور گرنگ کار بێتەکرن پارێزگارەک کورد دەسەلاتێ ل کەرکوکێ بکەت کو ھەردووھێزێن سەرەکیێن کوردی ئوکێ ل سەر بکەن.
یا خویایە کو ڤەدیتنا نەفتێ ل کەرکوکێ د نیڤا ئێکێ سەدێ بیستێ دا بویە ئەگەرێ ھندێ کو برێتانیا کیانەکێ دەستکرد ب ناڤێ عیراق ل ھەرسێ ویلایەتێن بەغدا وبەسرا و موسل دروست بکەت و ھەمی داخازی و پێکولێن کوردان ل ناڤ ببەت و دەست ب سەر گرنگترین دەڤەرێن نەفتی دا بگریت. ھەبونا داھاتێن مەزن ل کوردستانێ بگشتی کاریگەریەک خراب ھەبویە و بەردەوام ئەڤ سەروەت و سامانێن سروشتی بوینە دەرد و بەلا بو سەرێ کوردان و داھاتێ بن پێیێن کوردان ب چەکێن جورا و جور ل سەر سەری باراندینە. پشتی ریدانێن شازدێ ئوکتوبەرێ و ھاتنا ھێزێن حەشدا شەعبی و چەکدارێن جورا و جور و نە رێکخستی , دەڤەرێن کوردی ریبریێ پێلەکا دیتر یا شەر و کوشتن و مەترسی و دەربەدەرکرن و تەعریب و مەزھەبکرنێ بونو روژانە ھێرشێن تیرورستێن داعشێ ل زێدەبونێ دانە و مەترسیا ھێرشێن مەزنتر ژی دئێتەکرن ل وان دەڤەران ژ بەرکو خەلک و حەشد ل چو تشتەکێ ئێک ناگرن بەروڤاژی ھێزێن پێشمەرگەی کو ھەمی پێکھاتە بێ جوداھی دپاراستن . ب لێک نیزیک بون و رێککەفتنا پارتی و ئێکەتی رەوش دێ بەرەف باشتر چیت ب مەرجێ کو رێککەفتنەک بیت دووبارە شازدێ ئوکتوبەرێ ب دیف دا نەئێت! . زێدەبونا مەترسیا داعشێ دێ ھەمی ئالیەکێ پالدەت تایبەتی حکومەتا عیراقێ و ئەمریکا کو جارەک دن ھێزێن پێشمەرگەی ڤەگەرن بو کەرکوکێ لێ فەرە ئەڤ ڤەگەریانە ب پلان و رێککەفتن و لێک تێگەھشتن بیت .