پارڤەکرنا کوردستانێ ل سەر چار وەلاتێن نەتەوەپەرستێن دەڤەرێ کێشا کوردی ب رادەکێ ئالوز کریە کو چارەسەریا وێ ب زور زەحمەت و موعجیزە دئێتەناڤکرن . ھەبونا سنورێن دەست کرد چ جارەکێ نەشیایە پەیوەندیێن بھێزێن نەتەوەی ل ناڤبەرا کوردان دا قوت بکەت و ھەر ژ سەردەمێن کەڤن ھەتا نھا ل ھەر دەردەسەریێن ھاتیە سەرێ گەلێ کورد ھاریکاری ژ ھەر چار پارچەیان گەھشتیە ئێک.
ئاڤاکرنا ھەرێمەکا ئازاد ل باشورێ کوردستانێ مەزنترین مەترسی بو ژ بو دەولەتێن داگیرکەرێن دەوروبەر و ب ھەمی ئاوایەکێ کار دکر کو ئەزمونێ کوردستانێ ناڤ بچیت بەلێ سوپاس بو خودایێ مەزن کوردستان نھا بویە ھژمارەک مەزن ل ھەفکێشێن ئیراق و دەڤەرێ دا و ل نەخشێ سیاسی و ئابوری و سەربازی دا جھێ خوە گرتیە و شیایە ھەتا رادەکێ باش خو ل گەل بەرژەوەندیێن وەلاتێن دەردور و وەلاتێن مەزنێن جیھانێ بگونجینیت . پاراستنا کیانێ سیاسی و دەستوری یێ ھەرێما کوردستانێ ئەرکێ ھەمی ئالیێن کوردستانیە ل ھەر چار پارچێن کوردستانێ . شەرێ دەولەتا تورکیا ل گەل pkk ل سەر ھەرێما کوردستانێ دیرە ژ یاسا و رێسایێن نێڤدەولەتی و ب ھیچ ئاوایەکێ نابیت تورکیا وەکی وەلاتەک خوەدی سەروەری سنورێن دەولەتەکا خودی سەروەری ببەزینیت و کویراتیا سەدان کیلومەتران ل سنورێ ئیراقێ توپباران بکەت . تورکیا ب سیاسەتا شەر و کوشتن و توپباران و زیندانکرن و قەدەغەیا ھاتن وچویێ و بنپێکرنا مافێن کوردان ب ھیچ ئاوایەکێ ب ئێمناھیا نافخوی ناگەھیت و فەرە ب ئاقلانەتر سەرەدەری ل گەل پرسەک ب ڤی ئاوای مەزن بێتە کرن و سەدامێ دکتاتور ببیتە باشترین سەربور بو وان کو چو نەتەوەیەک ب کوشتنێ بێ دەنگ نابیت . ژ بال خوە ژی ڤە pkkفەرە چەند خالەکێن گرنگ ل بەر چاڤ وەربگریت ژ وانا پارستنا سەروەریا ئاخا ئیراقێ و ھەرێما کوردستانێ ھەروەسا ھەرێما کوردستانێ ل رەوشەک نازک دایە و ل ھەمی ئالیەکێ تایبەتی ل pkkدئێتە خاستن کو رەوشا سیاسی و ئابوری و ئێمناھیێ یا ھەرێمێ بەرچاڤ وەربگریت و نەھێلیت تورکیا pkk بکەتە ھیجەت بو ھێرشکرنە سەر کوردستانێ . ھەروەسا زورگرنگە pkk ھێزێن خوە ڤەگوھێزیت بو ناڤ باکورێ کوردستانێ و تورکیا بو پتر گەڤاشتن ئێخستنە سەر تورکیا ھەتا وی رادەی تورکیا ب نافخویێ خوەڤە بکەڤیتە ئاریشێ و ل باشور و روژئاڤایێ کوردستانێ بگەرێت . ھەبونا گەریلایێن pkk ل چیایێن کوردستانێ سالانە ب سەدان ملیون دولار زیان ب خەلکێ سڤیل و حکومەتا ھەرێمێ دکەڤیت و ئەو زیانە ژی د ڤێ رەوشێ دا بەردەوامن .
شەھیدکرنا شەش گەنجێن دەڤەرا شێلادزێ ژ بال فروکێن تورکیا ڤە جھێ دلگرانیە و فەرە ئەڤ جورە کریارە بێنە راوەستاندن و نابیت خەلکێ سڤیل ببیتە قوربانیی کێشەیەکا دەرڤەی سنوران . ئەو ھەلویستێ کو خەلکێ سڤیل گرتیە بەر ل سوتنا بارەگایێن ھێزێن تورک ل کەرب و تورەییا خەلکێ کەرب ل دلی ھات لێ مخابن دڤی وەلاتی دا دەستێن جورا و جور ناھێلن خوەدی ماف ژی داخازا مافێن خوە بکەن, تێکدانا زێدەتر یا رەوشێ کاریگەریەک راستەوخو ل ھەمی ھەرێمێ ھەیە و فەرە رەوش بێتە کونترول کرن و رێک نەھێتە دان ئیدی گەنجێن بێ گونە ببنە قوربانی پیلانێن ھەرێمی.
چارەسەری ل ڤان خالێن خارێ دا دبینین کو ھەمی ئالی ب وێ بگەھن یا خەلکێ سڤیل نەبیتە قوربانی .
١- دەولەتا تورکیا ل وێ چەندێ بگەھیت نە کورد و نەبزاڤا رزگاری خوازیا کوردی ب کوشتن و سوتن و شەری ژ ناڤ ناچیت و پێکولا چارەسەریا کێشا کوردی بێتەدان و ل جھێ بەردەوامی دان ب شەری .
٢- فەرە تورکیا و pkk ل وێ چەندێ بگەھن کو گورەپانا وان یا خوشی و نەخوشی و شەری و ئاشتیێ باکورێ کوردستانێ و تورکیا یە ئەوا ل شێلادزێ دروست دبیت تنێ بارگرانیە بو خەلکێ سڤیل و حکومەتا ھەرێما کوردستانێ .
٣- فەرە ھەردوو ئالیێن شەری سەروەریا ئاخا ئیراق و کوردستانێ ب پارێزن و نەھێلن سنور بێنە بەزاندن.
٤- ل سەر pkk فەرە کو رەوشا سیاسی و ئەمنی و ئابوری یا ھەرێمێ بەرچاڤ وەربگریت تایبەتی ل ڤێ قوناغێ دا کو رەوشا سەرانسەرێ دەڤەرێ ل دوخەکێ قەیرانا وی دایە .
٥- خو دیر کرن ل ئاڤاھیا و خەلکێ سڤیل ئەرکە ل سەر pkk و پاراستن و نە کرنە ئارمانجا سڤیلان ئەرکە ل سەر بالەفرێن تورکیا ل ڤی دەمی دا.
٦- حکومەتا ھەرێما کوردستانێ و حکومەتا ئیراقێ و پەرلەمانێ کوردستانێ و ئیراقێ فەرە رولێ خوە ببینن دەستپێکێ ل پاراستنا خەلکێ سڤیل و ڤەگەراندنا خەلکێ ئاوارەبوی بو سەر گوندێن وان و قەرەبویا زیان ڤێکەفتیان و کار کرن بودەرئێخستنا ھێزێن تورکی و پەکەکێ ل کوردستانێ .
٧- خەلکێ دەڤەرێن سنوری ژی ھەر چەندە یا ئالوزە و زەحمەتە ژی لێ فەرە خوە ل بنگەھێن ھێزێن تورکی و پەکەکێ دیر بکەن و ھەفکاری و سەرەدەریا دگەل وان ھێزان بو حکومەتا ھەرێما کوردستانێ بھێلن کو بکەنالێن رەسمی سەرەدەریێ دکەت .