تاک بەرێ بنیاتێ جڤاکی یە و ب پێشکەفتن و بەرەف پێش چون و ھوشیاریا تاکی جڤاکەک ب ھەمی پیڤەرێن خوەڤە دێ یێ سەرکەفتی بیت و ب ڤێ پێنگاڤێ دەسەلاتەک بھێز و ھەژی جڤاکی دێ بەرھەمی ئێت . لەوما زور گرنگە ھەمی ئالیەک پێکولا ئاڤاکرنا تاکەکێ ساخلەک بدەت ژ ھەمی روویەکێ ڤە .
تاکێ کورد ب درێژاھیا دیروکێ کەفتیە بەر ڤەکولینێن جودا جودا ژ ئالیێ روژھەلاتناس و گەروک و ڤەکولەرێن نافخوی و بیانی , کو ھەر ئێک ژ وانا ژ بال خوەڤە دووپاتی ل سەر خالێن بھێز و لاوازێن جڤاکێ کوردی کرینە کو دڤێ گوتارێ دا تنێ دێ بەحس ژ ئاڤاکرنا تاکێ کورد کەین بو ھندێ دەست ل ناڤ دەست بین بو ئاڤاکرنا کوردستانەکا بھێز و دیر ژ کێشە و ئالوزی. حکومەتا ھەرێما کوردستانێ ب درێژاھیا ژیێ خوە دا زورتریت کار کریە بو ھندێ رێژەیا توندوتیژیێ کێم بیت و خوشگوزەرانی و ئاشتی و ئێمناھیی بەرقەرار بیت , بەلێ ئەڤ چەندە ل بەرچاڤ وەکی پێتڤی نینە و جھێ رەخنێ یە ! بوچی ؟ لێرەدا دێ زڤرینە سەر وێ خالێ ئەگەرتاک ساخلەم بو ژ ھەمی ئالیەکێ ڤە دێ جڤاک ژی ساخلەم بیت و ئەو داھات و دەمێ ل بەر دەستی دێ مفا ژێ وەرگریت. زورکەس رەنگە دووپاتیێ ل سەر وێ خالێ بکەن کو ئەگەر سەرکردە باش بون دێ جڤاک ژی باش بیت , بدیتنا من باش و خرابی و ب بەرنامەیی و بێ بەرنامەییا سەرکردە و دەسەلات و حکومەتێ ل دەرئەنجامێ باشی و خرابیا تاکیە و ب گشتی یا جڤاکیە. ئەگەر ھەر ئێک ژ مالا خوە دەست ب پاراستنا کارەب و ئاڤ و پاراستنا ژیینگەھێ ڤە بگرین و ل دەمێ دەوامێن فەرمی دا ب رەسمی و دیر واستە و رەشوە کار بکەین و بەرامبەر ھەڤدو راست و بێ فێل و دزی و گەندەلی بین وی دەمی تاکەکە ل ناڤ مەدا دبیتە وەزیر و سەروک و رێڤەبەر و بەرپرسێن بلند.. چرچل سەروک وەزیرێن بەرێ یێ برێتانیا ل گوتنەکا خوە دا دبێژیت (ھەر میللەتەک دێ ب وێ دەسەلاتێ گەھیت کو یا ھەژی ویە) ئانکو میللەتێ زیرەک و شارەزا و دانا و ئاقلمەند و داھێنەر و وێرەک و دیر ژ دزی و گەندەلی و راستە و رەشوە دێ ب حکومەتەکا خوەدی زورترین خاسیەتێن باش بیت و ئەنجامدا دێ ھەمی تاکێن وەلاتی ب خێر و خوشی و دیر ژ ئالوزی و بێ دادیێ ژین .
یا ئەڤرو ئەم ل کوردستانێ دبینین ب راستی جھێ داخێ یە کو واستە و دزی و گەندەلی و رەشوە و نەشەفافی و بێ پلانیەک خراب ھەیە و ھەژیە ب گشتی ژ ئالیێ زانکو و پەیمانگەە و رێکخراوێن جڤاکێ سڤیل و روشنبیر و نڤیسەر و پارتێن سیاسی و مەلا و ماموستا و ھونەرمەندان کار ل سەر بێتەکرنبو ھوشیاریا جڤاکی و نەھێلانا ھەمی سالوخەتێن خرابێن ناڤ جڤاکی و دەف تاکی ھەتا پێنگاڤا دیڤدا حکومەتەک بەرھەم بێت . ئەو پێشکەفتنا ئەڤرو ل یابان و ئەوروپا و ئەمریکا ھەی ھەر ھەمی بەرھەمێ تاکەکێ ساخلەمن کو تاک گەھشتیە رادەکێ ژ تێگەھشتنێ کو پاراستنا یاسا و رێسا و داھات و مال و مولکێن وەلاتی ئەرکێ ویە و پێتڤی ب چ چاڤدێرا نینە . ئاھا ئەڤەیە کو جڤاکێ مە ژێ بێ بەھر کو ئەم وی دەمی ھەست ب ھەبونا یاسایێ و پاراستنا دەستکەفتیێن وەلاتی دکەین کو چاڤدێرەک ب سەر سەرێ مە ڤەبیت !!
پروسائاڤاکرنا تاکەکێ ساخلەم ژی پێتڤی ب چەند پێنگاڤێن گرنگە و ھەر کەسەکێ خوەدی شیان د وەلاتی فەرە ب ئەرکێ خوە رابیت دڤی بیاڤی دا . د دەستپێکا پێنگاڤان ژی دا حکومەتا ھەرێما کوردستانێ فەرە دەست بکەت ب دارێشتنەڤا تەمامیا سیستەمێ خاندنێ ژ باخچێن ساڤایا ھەتا دگەھیتە خاندنا بلند, ژ بەرکو ئاڤاکرنا ھەر میللەتەکێ چەند رێکەک ھەنە بەلێ سەرکاروانێ وان ھەمی رێکان ژی پەروەردە و فێرکرنە . ھەروەسا ب ھیچ ئاوایەکێ نابیت تاک بێ ھیڤی ببیت و خوە رادەستێ کاودانێن دەمکی بکەت و بھێلیت ب کێشەیەک ب چیک دەست ژ ھەمی ھیڤیێن خوە بینیت , ئەوا وەلاتێن پێشکەفتی ئەڤرو گەشتیێ پتریا وان کەدا دەستێ تاک تاکێن جڤاکی بویە کو ھەمی ژی ب ئێک رێک گەھشتینە وان ئارمانجێن وان دڤێت کو ئەڤرو وەلاتێن وان و جیھان ھەمی مفای ژ داھێنانێن وان وەردگریت ئەو رێک ژی بەردەوام کارکرنە بو وێ ئارمانجا کو دشیان دا ھەیە پاشەروژا وەلاتی روون بکەت . ھەروەسا فەرە بەردەوامی ب گرنگی دانا رولێ ماموستایێن ئولی بێتە دان و رێکخراوێن جڤاکێ سڤیل کار بکەت بو پتر ھوشیاریا جڤاکی و راگەھاندن ژی دەست ژ تێکدان و بەرەلاکرنا جڤاکی بینن و دەست بکەن ب پالدانا جڤاکی بو رەوشتێن باش و پاراستنا وەلاتی و گرنگی دان ب خاندن و داھێنانێ و ڤیانا وەلاتی.
تاک بەرێ بنیاتێ جڤاکی یە و ھەر پێشھاتەکا د وەلاتی دا ب باش و خراب ڤە ریددەت ڤەدگەرێت بو ئاستێ پێشکەفتن و پاشکەفتنا تاکێ جڤاکی. ھەر دەسەلاتەکا باش و رێک و رێکخستی ھەبیت بەرھەمێ جڤاکەکێ پێشکەفتی و ھشیاریا ڤی جڤاکی ب پەروەردەو فێرکرن و کارکرنا ھەمی ئالی و گرنگی دانا جڤاکیە ب شیانێن خو و نەراوەستیانە بەرامبەر ھەر ئاستەنگەکێ . ئاڤاکرنا تاکێ ساخلەم واتا وەلاتێ پێشکەفتی .