گرنگترین سامانێ وەلاتی سامانێ مروڤیە , و گرنگی دان ب شیانێن مروڤی و بەرەف پێش برنا تاکی دبیتە فاکتەرەک سەرەکی بو راکێشانا ملیارات دولاران بو وەلاتی و دەھان نموونە ل جیھانا نوی دا ھەنە کو ژ لایەنێ سامانێن خوزای ڤە ل وەلاتێن ھەژارن , بەلێ وەک پێشکەفتن و خوشگوزەرانی و پەروەردا پێشکەفتی و تەکنەلوژیا و ئاستێ داھاتێ تاکی و سیستەمێ ئابوری یێ موکم و ئێمناھیا سیاسی ل بەری دەھان وەلاتێن خوەدی پترول و گاز پێشکەفتی ترن , وەکی یابان و تایوان و ھونک کونگ و پرانیا وەلاتێن ئەوروپی ...تد. ئەڤ وەلاتە ژ وێ چەندێ پێش کەفتن دەمێ گرنگی دان ب سامانێ مروڤی بیە کارێ ژ ھەری پێشیێ یێ وان , ئەوروپا زور زوتر ژ وێ پێشبینیا دھاتە کرن ل پشتی شەرێ جیھانی یێ دوویێ (١٩٣٩ - ١٩٤٥ز) کو ب سەدان ملیون قوربانی ژێ کەفتن و وێرانکاریەکا سەرتاسەری ڤەگرت بەلێ زور زوو رابیەف سەر پێخو , بەلێ گرنگی دان ب مروڤی و شیانێن وی ل رێکا پەروەردەیەکا ساخلەم و سیاسەتەکا گشت گیر و ب پلان و ئارمانەکا روون و ئاشکرا ئەوروپا و یابان پشتی شەرەکێ وێرانکەر گوھرین بو پێشکەفتی ترین وەلاتێن جیھانێ ! نھا پرسا گرنگ ئەوە کوردستان چەند دشێت ل گەل سامانێن خوزای یێن زور ل ھەمی بابەتان , دشێت مفای ل سامانێ ھەری گرنگ وەربگریت ئەو ژی سامانێ مروڤیە ؟
ئەگەر چاڤ پێخشاندنەکێ ب وان وەلاتان بکەین کو نھا د شەرێن نافخوی و کودەتا و سیستەمێن دکتاتوری و پاشڤەمانەکا زور و نە بونا ئارامیا سیاسی دانە و ل ھەمی بیاڤەکێ دا ل وەلاتێن پاشکەفتی نە و ب ھیڤیا ھاریکاری و قەر و دەینێن ئەوروپی و وەلاتێن پێشکەفتی نە و پەروەردەیەکا سەقەت و ساخلەمیەکا خراب دانە کو ھەتا نھا بەرپرس و شاە و سەروکێن وان ل دەرڤە چارەسەریا خوە دکەن !! پرانیا وان وەلاتان خوەدی سامانێن مەزنێن خوزاینە کو شەرێ مەزن ل سەر ھندێ یە کو کی دێ پتر پترول و زێر و گازا سروشت و داھاتێن دیتر بو خوو و حزب و بنەمال و مەزھەب و تائیفا خوە بەت ؟! کێشە ئەوە د ڤان وەلاتان دا کو پرانیا وان ل جیھانا سیێ نە گرنگی دان ب سامانێن مروڤی نینە , ئەڤ چەندە بویە فاکتەرەک سەرەکی تێکچونا ھەمی وەلاتی و مفا وەک پێتڤی ل سامانێن خوزای نەھێتە وەرگرتن. ھەرێما کوردستانێ ژی وەک پارچەک ل ڤێ دەڤەرا ریبریێ نەئارامیا سیاسی و گەندەلی و سیستەمێت پاشکەفتی بوی پارچەکا دانەبریە ل ڤان کریزان و ھەتا نھا وەک پێتڤی مفا ل شیانێن مروڤی نەھاتیە وەرگرتن و ھەمی خەم و گرنگی دان ب پرسێن سامانێن خوزای بویە کو چارەسەرا کێشەیان نەکریە بەلکو بەردەوام ل سیستەمێ سیاسی و ئابوری و جڤاکی و پەروەردەی دا کێشە ھەبوینە و بەردەوام دووبارە ژی دبن و چاڤەرێ کێشێن بەردەوام دئێتەکرن ژبەرکو فەرە سەروکانێن کێشەیان بێنە ھشک کرن ئەو ژی دێ ب گرنگی دان بیت ب سامان و شیانێن مروڤی و مروڤ ببیتە نەمبەر وەن د ھەمی بیاڤەکێ دا . ئەڤ چەندە ژی ب دیتنا من دێ ب چەند پێنگاڤان بیت کو ھەتا نھا حکومەتا ھەرێمێ ھەتا رادەکێ کار بو کریە بەلێ ھیڤی و داخازیێن کوردستانیان زێدەترن , ژ وان پێنگاڤان ژی پەروەردەیەکا ساخەلەم و پێشکەفتی یە :
سیستەمێ پەروەردە و فێرکرنێ یێ پێشکەفتی بەرێ بنیاتی یێ ھەمی پێشکەفتنانە و بێ گرنگی دان ب ڤی بیاڤی وەلات ب وێ وێ ئارمانجێ ناگەھیت کو ھیڤیان و خەباتێ بو دکەت , ب پەروەردەیەکا ساخەلەم و پێشکەفتی ئاستێ روشنبیریا تاکی دێ بەرەف پێش چیت و جڤاکەک پێشکەفتی و بەرھەمدار و بێ کێشە پەیدا بیت و وی دەمی دا دێ حکومەتەک بھێز و پێشکەفتی پەیدا بیت , لێ بەروڤاژی جڤاکەکێ بێ بەرھەم و بکار بەر دێ بەرھەم ئێت کو ھەمی داھاتێ سامانێن خوزای وەکی نھا عیراق و لیبیا و کەنداڤ و دەھان وەلاتێن دیتر دێ بو دەرڤە چیت بو خارن و ڤەخارنێ و ھەتا نوکە ژی بەرھەم ئینان ل سفرێ دایە و ھەر تشتەکێ ھەی ل دەرڤە دئینن , نھا ئەو وەلاتێن خوەدی سامانێن خوزای ل دەستێ وەلاتێن خوەدی سامانێن مروڤی دایە , ژ بەرکو ھەر ھەمی تشتەکێ بەرھەم دئێت ل وان وەلاتان ل تەکنەلوجیا و چەک و ھوکارێن بکار ئینانێ ل ھەمی بیاڤەکێ بەرھەمێ ئەقلێ مروڤیە و ئەڤ چەندە ژی بەرھەمێ پەروەردە و فێرکرنەکا پێشکەفتی یە . کو مخابن ھەتا نھا ل کوردستانێ سیستەمێ پەروەردێ دەھان کێشە ھەنە ھەر ژ پروگرامێن خاندنێ کو فەرە دیف پێش ڤەچونا سەردەمیانە گوھرین تێدا بێنەکرن و ھەروەسا گرنگی دان ب ژیانا ماموستای کو ل پروسا پەروەردێ دا سەنتەرە و فەرە ل ژیانا خو یا ماددی و مەعنەوی ئێمن بیت و کەساتیا وی یا پاراستی بیت و خوەدی ئیمتیازات بیت و بەردەوام راھێنان پێ بێنەکرن بو ھەتا ل ژیانا سەردەم و وەلاتێن پێشکەفتی ئاگەھدار بیت . ھەرچەندە ھێشتا کریزا دارای ب تەمامی داوی نەھاتیە بەلێ رەوشا کوردستانێبەرەف باشترە تایبەت پشتی ریدانێن شازدێ ئوکتوبەرێ و ئەو سیاسەتا بەرێز نێچیرڤان بارزانی گرتیە بەر بەرامبەر ھێزێن نافخوی و بەغدا و دەرڤە ژی رەوش باشتر کریە بەلێ کریز ب داوی نەھاتیە , فەرە جارەک دن حکومەتا ھەرێما کوردستانێ دەست بکەت ب ئاڤاکرنا ئاڤاھیێن قوتابخانا بو ھندێ ئەو دوو و سێ دەوامی و ئاڤاھیێن کەڤن و بێ سەروبەر ب داوی بێت .
سیستەمێ پەروەردە و فێکرنێ یێ پێشکەفتی بنیاتێ ئاڤاکرنا جڤاکێ ساخەلەم و بەرھەمدارە و پێشکەفتی یە و ب ڤێ چەندێ دێ مفای ل سامانێن خوزای وەرگرین و دێ وەک پێشتڤی شێین ل خزمەتا کوردستانێ بکار ئینین , ئەگەر گرنگی دان ب سامانێ مروڤی نەبیت بھیچ ئاوایەکێ وەلات پێش ناکەڤیت ئەگەر روژێ دەە ملیون بەرمیلێن نەفتێ فرێکەینە دەرڤە !!