دەمێ روپەلێن دیروکا کوردان ھەلددەین زورترین دەرفەتێن سەرکەفتنێ دکەڤنە بەرچاڤێن مروڤی و ھەر جار ژی ل رەخنە و خەمخارنەکا دەمکی ئەو روپەلە ل سەر مە دەرباز دبن ! کو براستی فەرە دیروک بو ھندێ بیت شیرەت و ئاقل لێ بێنە وەرگرتن نەک تنێ خاندنەک بیت و دەم بوراندن. بیست و حەفت سالێن حوکمرانیا کوردی ل ھەرێما کوردستانێ نەشیایە وەکی پێتڤی خزمەتا کوردستانیان بکەت و زێدەبارێ ھەبونا دەھان کێم و کورتیێن دیتر ژی کو جھێ پرسیارێ یە ھەتا نھا حکومەتا ھەرێمێ نەشیایە سنورەکێ بو ڤان دربێن کوژەکێن سیستەم و کیانێن سیاسی دابنێت.زێدەبارێ ھەبونا کارەک مەزن کو بویە خەون بو باشور و ناڤەراستا ئیراقێ دیف گوتنا خەلکێ پارچێن دیترێن ئیراقێ , بەلێ ھیڤی و خواست وخەباتا مە زێدەترێ دخازیت ژ دەسەلاتا کوردی.
وەک ل ئولێ ئیسلامێ دا ھاتیە ھندێ روحا مروڤی نەگەھیت گەریێ و روژ ل روژئاڤایێ نە ھەلاتی ژ خوە زڤرین و تەوبەکرن یا وەرگرتیە و دێ ئێت قەبولکرن . ل سیستەمێن سیاسی ژی چەند ژ خو زڤرین دیربکەڤیت و درێژی ب ژیێ گەندەلی و نەشەفافی و بێ سەروبەریێ بێتە دان وی دەمی دا ھەرفین و نەرازیبون و پاشکەفتن نیزیک دبیت و ئیدی لادانا وێ پێتڤی ب چەند نڤشێن ئێک دیف ئێک دبیت . دوو نموونە ل کیشوەرێ ئەفریقا ھەردەم جھێ ھندێ نە کو وەلاتێن پاشکەفتی و جیھانا نڤستی و جیھانا سیێ باس ژێ بکەن , ئەو ژی وەلاتێن ئەسیوبیا و رواندانە , کونھا ھەر دوو وەلات کەفتینە سەر سکەیەکێ چاکسازیێ و نەھێلانا گەندەلیێ و گرنگی دان ب شیانێن گەنجێن وەلاتی و ئالایێ پێشکەفتن و گەشەپێدانێ بلندکریە و ھەر ب وان داھاتێن کو بەری چەند سالەکان خەلک ژ برسان دمر و کوچبەرێ وەلاتێن جیھانێ دبو !!!
ئەرێ شیان ھەیە کوردستان ژی وەکی رواندا و ئەسیوبیاو وەلاتێن بەری وان مالیزیا و سەنگافورا لێبێتن ؟
دیف خاندنا مە بو ریدانێن دیروکی کو زور نموونە ھەبوینە وەلاتێن پارچەکریە و وێران و خەلکەک ریس و پێخاس ب گوپیتکێ گەھشتینە , وەلاتێن کەنداڤی ل سالێن حەفیتێن سەدێ بیستێ سەربەخوی بدەست ئینا و ھەمی ھیڤیا وان ئەو بو کو ب وەلاتەکێ وەکی ئیراقێ بگەھن!! نھا کەنداڤێ ئەرەبی ل کیڤەیە و ئیراق ل کیڤەیە ؟ وەکی شەڤ و روژا ژێک جودانە !! بوچی ؟ ھەروەسا مالیزیا و سەنگافورا و ھونگ کونگ و ژاپون و کوریا باشور ...تد. ھەمی ئەو وەلاتە بون کو رێژا ھەژاری و و تاوان و گەندەلی و بندیوار و شەرێن نافخوی ل گوپیتکێ بون , ب وێ گەھشتن کو نھا ئەم دبینین .ھەمی ژی بەر سەروەریا یاسایێ و نەھێلانا گەندەلیێ و یەکسانی و دادپەروەریێ و کەسێ ھەژی بو جھێ ھەژی و ئارامیا سیاسی و پلانێن ئابوریێن موکم و کارکرن ل سەر سێکتەرێن پەروەردە و فێرکرن و ساخلەمیێ ..نیزیک بونا ئاڤاکرنا حکومەتا نوی یا ھەرێمێ و باشتر بونا پەیوەندیێن ناڤبەرا ھەولێر و بەغدا و ئارامتربونا رەوشا سیاسی و ئابوری و جڤاکی ل نافخو دا و ڤەبونا دەرگەھێن دبلوماسی ل سەرکوردستانێ و دیاربونا گرنگیا پێگەھێ ھەرێمی ل ئیراق و دەڤەرێ و ھەبونا دەھان ژێدەرێن ئابوری ل وەلاتی دا ھەمی ھاریکارن کو مروڤ بێژیت د شیان دا ھەیە کوردستان ژی بکەڤیتە سەر وی سککەیێ پێشکەفتنێ کو رواندا و ئەسیوبیا و مالیزیا و کەنداڤ و ھەمی وەلاتێن پێشکەفتی پێگەھشتی.

بو ھندێ ب ئاستێ وەلاتێن پێشکەفتی بگەھین و ببینە نمونەک ژ سەرکەفتن و پێشکەفتنێ فەرە سەکرداتیا سیاسی یا کوردستانی ب تایبەت سەروکێ ھەرێمێ و سەروکێ حکومەتێ ھەمی شیانێن خوە پێخنە کاری بو ھندێ یاسا سەروەر بیت وھەمی وەلاتی بەرامبەر یاسایێ یەکسان بن و خەلک ھەست ب داوەریی بکەت و واستە و واستەکاری نەمینیت و کارئینانا پلە و پوستێن گشتی بو بەرژەوەندیا تایبەت نەمینیت . ھەروەسا بەردەوامی ب کاروانێ چاکسازیێ بێتە دان ئەوێ کو ل کابینا چوی دا سەروکێ حکومەتێ پێشکێش کری و ل بەر کێشمە کێشما سیاسی نەھاتیە تێپەراندن ل پەرلەمانی , بدیتنا من فەرە ب یاسا و دادگەھا ریبریێ گەندەلی و بندیوار و نەشەفافیەت و دزیێ بێتە کرن بو ھندێ باوەریا سازیێن حکومی دەف خەلک زێدەتر ژێ بیت و سنورەک بو راوەستاندنا کاروانێ گەشەپێدانێ بێتە دان . بنگەھێ پێشکەفتنێ و گەشەپێدانێ ئێمناھیا سیاسی و جڤاکی یە ل وەلاتی دا فەرە ژ کارێن ھەری پێشین یێن سەرکرداتیا سیاسی یا کوردستانێ ل ڤان چار سالێن بھێت کارکرن بیت کو پەیوەندیێن ئالیێن سیاسی ب دەسەلاتدار و ئوپوزسیون د باش بن و ل خزمەتا کوردستانیان دا بن . کەشێ ئازادیێ رەخساندن بو میدیایێ ب گشتی و چالاکڤان و نڤیسەر و روشنبیرا پێنگاڤێن سەرکەفتنێ نیزیکتر دکەن و حکومەتێ ژی ل کریاریێن خراب ھشیار دکەت . ئەڤ پێنگاڤە ھەمی ژ ئالیەکێ و گرنگی دان ب پەروەردە و فێرکرنێ ل ئالیەکێ دیتر ژ بەرکو ئەو وەلاتێ سیستەمێ پەروەردەیی یێ پێشکەفتی بیت ئەو وەلاتە یێ سەرکەفتی و پێشکەفتی یە و نموونا مالیزیا و یابان و یھانا نوی ژ پێش چاڤێن مەیە , سیستەمێ پەروەردەیی ل کوردستانێ پێتڤی ب چەندین پێنگاڤێن چاکسازیێ یە و نەھاڤێتنا وان پێنگاڤان کوردستانێ ل پێشکەفتن و سەرکەفتن و پێشڤەچونێ دیردکەت .