خۆشبەختانە ، سەرەرای نەبوونا چ برواناما ، ژبلی کۆ لڤان دووماھیا پشتی ژیێ ٤٥ ساڵی ، درێکا خاندنا دەرەکی من شیا بگەھمە ئاستێ دەرچوونا قوناغا ناوەندی ، پشتی ھەول و ماندیبوونەکا بەردەوام ، خودایێ مەزن بەھرا نڤیسیێ بمن بەخشی ، وھەتا رادەیەکی من شیایە ھەبوونا خۆ دیار بکەم دوارێن گۆتار نڤیسینێ و رۆژنامەڤانیێ دا .
چونکی وەک کادرەکێ مەزنترین و کەڤترین و پڕ خزمەت ترین پارتیا کوردستانی کو پارتی دیموکراستی کوردستانە ، خۆ رەوشەنبیرکرن من ب ئەرکێ خۆ زانی یە .
لێ لدەمێ نڤیسنێ دا رۆژانە چەندین پسیار ئاراستەی من دھێنە کرن ، چ ژلایێ ھەڤالێن کاری یان ھەڤالێن دیتر .
ژوانا ، تۆ بۆچی دنڤیسی ..؟ ئەری کی ئاگاە ژ تەھەیە ..؟ ما چ دگەھیتە تە ...؟ کی دخوینیت ...؟ چ مفا تێدا ھەیە ...؟ تە چاڤ ل خۆ کۆرەکرن ...؟
ھەرە بۆ خۆ کارەکێ باشتر ربکە ..؟ چەندین سالە کارێ تە ئەڤە ، ھێشتا تۆ یێ قەردار ...؟ ئەرێ پارتیا تە ڤێ خزمەتێ لبەرچاڤ دگریت ..؟ تۆ ھەر بنڤیسە و خەلکەکێ دی بھێتە پلە بلند کرن ...؟ خەلکەک ل پلەدارێن پارتیا تە ، تە ب خەشیم دزانیت ..؟ و چەندین پسیارێن دیتر .
ژلایەکێ دیتر خەلکەکێ دەرڤەی پارتیا من ، بتایبەت ئەوێن ژ نێزیک من ناسنەکەن ، وەسا ھزر دکەن پارتیا من ئەزێ بڤی ئەرکی راسپاردی و بەرامبەر ڤێ چەندێ ، بەردەوام دھێمە پاراشت کرن و رێز لمن دھێـە گرتن و داخازیێن من ئێکسەر دھێنە بجە ئینان ، رەخنێن دژوار لمن دگرن و زۆر جاران کۆمێنت و گۆتنێن بێ رێز ژی دگەھیننە مە .
ئەز باوەرم زۆربەریا ھەرە زۆرا وان ھەڤالێن دڤی واری دا کاردکەن ، بتایبەت کادر ، رۆژانە پێشوازیێ لڤان پسیارا و رەخنا دکەن .
پشتی رێز و سلاڤ و سۆپاسیا من دڤێت بێژمە ھەڤال و خاندەڤانێن وان سازیێن گۆتار لێ دھێنە بەڵاڤکر ، یان تۆرێن جڤاکی .
پسیارێن وە دجھێ خۆدانە ، لێ ھەلبژاردنا من بۆ ڤی واری ، نە ژبەر دەسکەفتێن مادی و پلە بلندکرنێ یە ، نەژی بۆ رێزدارکرنێ یە ، تنێ خۆ رەوشەنبیرکرن ئەرکەکە لسەر ھەر تاکەکی ، نەخسامە بۆ کادران ، بۆ پتر خزمەتکرنا جڤاکی و مرۆڤاتیێ و جەماوەرتر کرنا پارتیا خۆ و چاڤکرنا کار و چالاکی و دەسکەفتێن نەتەوی و نشتیمانی و کارگێری یێن سەرۆک و سەرکردایەتیا پارتیا خۆ و وێ حکومەتێ نە ئەوا لسەر دەستێ وێ پارتیێ ، گەل و وەلات ل پیلان و مەترسیێن دژوار پاراستی و بەرڤ دەسکەفتێن مەزنتر دچیت .
ژلایەکێ دیتر دبێژینە بەرپرس و پلەدارێن پارتی ، پلان و بەرنامێن باشتر یێن رەوشەنبیری دابرێژن و خۆ رەشەنبیرکرن لسەر بھێتە سەپاندن ، چونکی دەم دەمێ رەوشەنبیری و راگەھاندنێ یە ، کادرێ نە رەوشەنبیری نەشێت دناڤ خەلکی بەرەڤانیێ ل پارتیا خۆ بکەت و پەیاما وێ بدروستی بگەھینیت .
ھەر وەسا خزمەتا کادرێن رەوشەنبیر و نڤیسەر بھێتە لبەرچاڤگرتن و سازیێن راگەھاندنا پارتی ژی باشتر بھێنە ئەگتیڤ کرن و پشتەڤانی لێکرن .
دبێژینە وان کەسێن دەرڤەی پارتیا مە ئەوێن وان ھزرا لمە دکەن و رەخنا لمە دگرن . پارتی خۆدان رێبازەکا تایبەتا کوردایەتیێ یە کۆ رێبازا پیرۆزا بارزانی نەمرە و پێشەنگا بزاڤا رزگاریخوازیا کوردستانی یە و تاکە بەرەڤانکارە ل ماف و ئارمانجێن نەتەوی و نشتیمانی و ھەمی دەسکەفتێن کوردستانێ لسەر دەسێ بۆ بدەستڤە ھاتینە . وەک تاکەکێ جڤاکێ کوردستانێ دوور ل ئایدیۆلۆژیا سیاسی ، ب ئەرکێ خۆ دزانین بەرڤانیێ لڤان راستیان بکەین ، نەک بۆ دەسکەفتێن مادی ، یان بەرژەوەندێن تایبەت و پێتڤی یە ھەر رەوشەنبیرەک و نڤیسەرەک بڤی رەنگی ھزر بکەت ، چونکی دیارکرنا راستیان بەری ھەر کەسەکی ئەرکێ وانە ، راستە کێماسی ھەنە ، لێ ئەڤ کێماسیە ، نە تنێ گۆنەھا دەسھەلاتێ یان پارتی بتنێ نە ، بەلکی گونەھا ھەمی ئالیێن سیاسی و جڤاکی ژی یە ،
نە جڤاکێ مە گەھشتیە وی ئاستی کۆ داخازا مافێن نە ھەژی بکەت ، نەژی پارتیێن کوردستانی ژبەر لدەستدانا جەماوەری دشێن یاسایەکا دادوەرا بچەسپینن .
دیسان دبێژمە وان لایەنان ، بلا دوور نەچین ، تنێ ئەوا رێزدار نێچیرڤان بارزانی سەۆکێ حکومەتا ھەرێما کوردستانێ ، پشتی خیانەتا ١٦ ێ ئکتۆبەرا سالا بووری کری ، بۆ شکاندنا گەماروویێن سیاسی و ئابووری و چارەسەرکرنا قەیرانا دارایی و شکۆدارکرنەڤا پێگەھێ ھەرێما کوردستانێ ، ئەوا ب پشتەڤانیا خیانەتکار بسەر مەدا ھاتی ، ھۆن دا چەند دەستێن دووڵ و زنایا بۆ لێدەن ..! .
ژبلی وان ھەمی دەسکەفتێن ئاڤەدانی و ئێمناھی و لەشکری و ....ھتد .
د بێژمە ھەڤالێن نڤیسەر ژی ، بەدەوام بن لسەر ڤی ئەرکێ جڤاکی و نشتیمانی ، پەیاما وە زۆر پیرۆزترە ل ھندەک دەسکەفتێن مادی یا رێزلێنانەکا بچیت ، ئەم بۆ خۆ ، و تەناکرنا وژدانا خۆ و دیارکرنا راستیان دنڤیسین و ب گرنژین پێشوازیێ ل رەخنێن ھەڤالا و نەیارا بکەن .