ب راگەھاندنا ئەنجامێن داویێ یێن ھەلبژاردنان ھەفکێشا سیاسی ھاتە گوھرین و جوداھیەک مەزن کەفتە دناڤبەرا ھێزێن سەرکەفتی دا. زور پەیڤ ل سەر ڤێ ریدانا گرنگ ھەبون و سەرکەفتیان ب ئاھنگ و پیروزباییان ئەنجام وەرگرتن و ھێزێن خوساربوی ژی ب تانە لێدان و توھمەتبارکرن و گازندێن جودا جودا ئەنجام رەتکرن . ئەگەر ئەم رەوشا ھەلبژاردنان و سەرکەفتنا پارتی دیموکراتی کوردستان شروڤەبکەین و دێ بینین کو بەری سالەکێ و ب تایبەتی پشتی ریدانێن شازدێ ئوکتوبەرێ کیانێ سیاسی و دەستوری و دیروکی و جوگرافی و نەتەوەیێ ھەرێما کوردستانێ کەفت ببو بەر مەزنترین گەف ژ سالا ١٩٩٢ ھەتا نھا چو گەف و مەترسیێن ب ڤی ئاوای ریبریی نەببون.دەستپێکرنەڤا پروسا سیاسی ئێک بو ژ مەزنترین شانازییان بو حکومەتا ھەرێما کوردستانێ پشتی مەترسیا نافچونێ . ھەروەسا ب ئارامیی بێ ئاریشە رێڤەچونا ھەلبژاردنان دەستکەفتیەک مەزن بو ژ بەرکو گەلەک کەس و ئالیان ھوسا ھزردکر کو ئەڤ پروسەیە دێ بیتە فاکتەرێ سەرەکی بو پتر تێکچونا پەیوەندیێن ناڤبەرا ھێزێن سیاسی. ھەبونا گازندە و تانە لێدان و دیارکرنا کێم و کورتیان کارەک نورمالە و فەرە دەسپێکێ کومسیون و ھەمی ئالیێن پەیوەندی دار پێداچونێ ب کارێن خوە دا بکەن بو ھندێ ل ھەلبژاردنێن داھاتی دا جوانترین نموونە پێشکێش بکەن. لێ ئەڤ کێم و کورتیە نابنە ئەگەرەک کو ھێزێن خوسارەت بوی دەست ب ھێرشێن نەرەوا بکەن بو سەر ھەمی سازیێن شەرعی ل کوردستانێ ل جھێ ڤێ چەندێ فەرە ئەڤ ئالیە ل خالا لاواز و فاکتەرێ کێم بونا دەنگێن خوە بگەرێن. ئەڤ جورە نەرازیبونە ل دەمێ ھەلبژاردنێن پەرلەمانێ عیراقێ ژی دووبارە بونەڤە بەلێ داویێ دا ھەمی ئالیەکێ خوسار رازیبو و چونە دناف ھولێن پەرلەمانی دا , ل کوردستانێ ژی دێ ھەمان سیناریو دووبارە بیت و ئیدی جادە ل جورێ رازیبون و نەرازیبونا گەھشتیە کو مەرەم پێ چیە!.
ئەو سەرکەفتنا مەزن ئەوا پارتی بدەست ئینای و زێدەکرنا ھژمارا کورسیێن خوە ل (٣٨ ) کورسیان ل سالا ٢٠١٣ بو (٤٥) کورسیان نویترین پێشھات بو د ھەلبژاردنان کو ئیدی دەنگدەرێ کوردستانێ یێ ژ وێ گەھشتیە کو پارتەکێ وەک پرانیا وەلاتێن جیھانێ بکەتە سەرکردە بو ھندێ زورترین خزمەتان بکەت.
بدیتنا من سەرکەفتنا پارتی ل ڤان ھەلبژاردنا و زێدەکرنا کورسیان ب رێژەک زور ڤەدگەرێت بو چەندین ھوکارێن جودا:
- پارتی سیاسەتەکا روون و ئاشکرا پەیرەودکر ل نافخوی و دەرڤە دا .
- ئەنجامدانا ریفراندومێ ل سالا ٢٠١٧ روحەکا دیتر یا نەتەوەی و نیشتیمانی دا بەر پارتی.
- سەرکەفتنامەزنا ھەلبژاردنێن (١٢ ئایارێ ) بو پەرلەمانێ عیراقێ و بون ب ئێکەمین حزب ل سەر ئاستێ عیراقێ کاریگەریەک مەزن ھەبو ل سەر مورالا پارتیان.
- سەرنەکەفتنا ئالیێن ئوپوزسیونێ نە د حکومەتێ و نە شیان ژی ئوپوزسیونەک ساخلەم پێشکێش بکەن.
- وەرگرتنا بەرپرسیاریەتی ل ھەمی قوناغێن سیاسی دا , پشتی شازدێ ئوکتوبەرێ پارتی مل دا بەر ھەمی کارەکێ ژ وانا شەرێ دگەل حەشدێ و سوپایێ عیراقێ .
- سیاسەتا حکومەتا ھەرێما کوردستانێ ل قوناغا پشتی شازدێ ئوکتوبەرێ . لێرەدا رولێ نێچیرڤان بارزانی زور ب گرنگی دیار بو تایبەت دەمێ سیاسەتەک نەرم و دبلوماسیانە بجە ئینای ھەمبەری بەغدا و وەلاتێن ھەفسی و ھێزێن نێڤدەولەتی , جێگرێ سەروکێ پارتی کارەک مەزن کر ھەتا شیای وان سزایێن کو ل سەر کوردستانێ ھاتیە سەپاندن لادەت و ھەروەسا قوناغەکا نوی ژ پەیوەندیان ل گەل دەرڤە دەست پێبکەت و کوردستانێ ل قوناغا مەترسی و ناکوکی و کریزێن سیاسی و نە ئارامیێ دەرباز بکەت . ھەروەسا ل بیاڤێ ئابوری ژی دا سەروکێ حکومەتێ شیا ب دانوستاندن و پروسا چاکسازیێ و کارێن بەردەوام رێژا پاشکەفتی کێم بکەن . پشتی باشتر بونا رەوشا دارایی نێچیرڤان بارزانی چەندین پروژێن گرنگ ڤەکرن و دەست ژی ب تمام کرنا چەندین پروژێن ستراتیجی ژی ھاتە کرن ,ئەڤان کارێن حکومەتێ کو پارتی تێدا خوەدیا پشکا شێری بی پتر خەلک ھاندا دەنگی ب پارتی بدەن.
دەرباز کرنا قوناغا پشتی شازدێ ئوکتوبەرێ خو بخو سەرکەفتن و شانازیەک مەزن بو , دەستپێکرنەڤا پروسا سیاسی ل کوردستانێ ب ڤێ ھەلبژاردنێ قوناغەکا مەزن یا کریزان ھاتە دەربازکرن و ھەر کێم و کورتیەک ژی ھەبیت فەرە بێتە چارەکرن و ھەمی ئالی پێداچونێ ب سیاسەتا خوە بکەن تایبەت یێ خوسارەت بوی ل جھێ تانە لێدان و رەتکرنێ . ئەڤ سەرکەفتنا پارتی ژی ب چەند فاکتەرێن جودا جودا ڤە گرێدایە تایبەتی ئەو کار و کریارێن کو جێگرێ سەروکێ پارتی ل پشتی خیانەتا شازدێ ئوکتوبەرێ ژ پاراستنا کیانێ سیاسی و دەستوری یێ کوردستانێ و دەستپێکرنا قوناغەکا نوی ژ پەیوندیێن نافخوی و دەرڤە و دەسپێکرنەڤا پروژێن ئاڤەدانیێ و سڤک بونا کریزا دارایی پتر ھاریکاریا پارتی کر کو رێژا کورسیان زێدە بکەت.