ئەگەر ل سەر رەوشا نھا یا ساخلەمیێ ب ئاخڤین کو چەند کێم و کورتی و درزێن مەزن ھەنە ل بیاڤێن جودا جودا , ھەر ژ کولێتیا دەرمانان ھەتا کارکرنا بێ مولەتا ھندەک دەرمانخانە و ھاریکارێن نوژداری و نوژدار و کومپانیا و رێڤەبرنا چەند دەرمانخانان ب ئێک مولەت و خرابیا کوگەھێن دەرمانا و شاشیێن بەربلاڤێن نوژداران و سەرەدەریا خرابا پشکەک ژ کارمەندێن ساخلەمیێ ل نەخوشخانێن گشتی و سەد و ھەشتێ پلە ھاتنە گوھرین ل کلینکێن تایبەت و بازرگانیکرن ب گیانێ وەلاتیان و پێگیرنەبون ب بریارێن ساخلەمیێ و بجە نەئینانا ئەرکێ خو و بێ سەروبەرکرنا کەرتێ گشتی و ب دولار و یوروکرنا کەرتێ تایبەت و ئێکسپایەربونا دەرمانان و ب قچاخ ئینان و برن و فروتنا بەرەلا و بێ کونترول و قورخکرنا بازاری و دەست وەردانا بەرپرسان ل گەل چەند کومپانی و نوژدارێن بازرگان و بازرگانی کرن ب کەرتێ ساخلەمیێ و پاشڤەچونا کەرتێ ساخلەمیا کوردستانێ و نەبونا چاڤدێری و دیفچون و سزادانێ و واستە واستەکاری و بکار ئینانا جھێ کارێ گشتی بو مەرەمێن تایبەت و بەلاڤنەکرنا تێبینی و ھوشیاریا ساخلەمیێ ل ناڤ جڤاکی دا دەھان کێم و کورتی و فەزاحەت ل ڤی کەرتی دا ھەنە کو ب گوتارەک و دەە گوتاران نائێنە ھژمارتن .
ئەڤ کێم و کورتیە دەمێ دئێنە ھژمارتن رەنگە کادرێن ساخلەمیێ ل سەر ب گوتن بێن ! د ڤی وەلاتی دا ھەمی بیاڤێن جودا کێم و کورتی ھەنە و ھەر دەمێ کاروانێ چاکسازیێ ب ھەمی بیاڤان نەگەھیت وی دەمی دێ سەرێ مە ھەمیان تێچیت. باس کرنا ڤان کێم و کورتیان رەخنەگرتن و ئاشکرا کرنا ڤان شاشی و تێبینی و فەزاحەتان گرنگیا سێکتەرێ ساخلەمیێ دیار دکەت ژ بەرکو ساخلەمی سەرەدەری کرنە ل گەل گیانێ مروڤی ھەر شاشیەک ئانکو کوشتن و مالوێران کرنەک ھەروەسا ب ھەبونا کەرتێ ساخلەمیێ یێ پێشکەفتی و مودرێن و سەرکەفتی وی دەمی دێ گەلەک ساخلەم و چالاک و ھوشیار و خوەدی ھێز پەیدا بیت . ل گرنگیا ڤی سێکتەری و ھەبونا سەدان کێم و کورتیان راگەھاندکار و روشنبیر و نڤیسەر و ئەکادیمی و رێکخراوێن جڤاکێ سڤیل پالدان کو ڤان شاشی و رەخنێن ل سەر ساخلەمیێ ھەی ب رایا گشتی بگەھینن و حکومەت ب بەرپرس و ھژمار ئێک دانا بو ھندێ سنورەکێ بو ڤێ بەرەلایێ دانیت . ل سەر ڤی بابەتی و پشتی دیفچونەکا زور و دیراسەکرنا بابەتی و دیار بونا رەوشێ ب تمامی, نێچیرڤان بارزانی سەروکێ حکومەتا ھەرێما کوردستانێ چەندین بریارێن گرنگ دان بو ھندێ ڤێ رەوشا ساخلەمیێ تایبەتی دبیاڤێ ئینان و برن و کومکرن و فروتنا دەرمانا و تومارکرنا ناڤێ کومپانی و دەرمانخانە و دانا دەرمانا ب نەخوشا و رێڤەبرنا وان و پەیوەندیا ناڤبەرا بازرگان و نوژدار و خوەدیێ دەرمانخانێ...ھتد.مەرەما ڤان بریارێن کو ھاتینەدان ژ بال حکومەتێ ڤە دیار دبیت :
- دووبارە رێکخستنەڤا کەرتێ ساخلەمیێ پشتی رەخنێن جدی و کێم و کورتیێن مەزن بخوەڤە دیتی .
- پاراستنا گیانێ وەلاتیان , پشتی ڤان شاشی و کێم و کورتیان چەندین کێشە بو وەلاتیان دروستکری .
- دیارکرنا ئەرک و ماف و کار و پەیوەندێن خوەدان باوەرنامە و کومپانیێن بیاڤێ دەرمانا و مەندوبێن کومپانیا و کوگەھێن دەرمانا و رێڤەبرنا دەرمانخانا .
- بلندکرنا ئاستێ کەرتێ ساخلەمیێ ل کوردستانێ , ھەر ھیچ نەبیت بگەھیتە ئاستێ وەلاتێن ھەفسی .
ئەڤ بریارێن حکومەتا ھەرێما کوردستانێ کو ھاتینە دان ل ڤی دەمی دا زورگرنگن وەکی پشکەک ژ وی پروژێ چاکسازیێ ئەوێ کو سەروکێ حکومەتا ھەرێما کوردستانێ بریار ل سەر دای و چەند کار و چالاکی و پێنگاڤێن باش ژی ھاڤێتینە کو ھیڤیا ھەمی وەلاتیەکێ یە ئەڤ چاکسازیە ب ئەنجام بگەھن و گەندەلی و نەشەفافی نەمینیت و ب دەسەلاتەکا باشتر بگەھین کو ھەژی وێ خەبات و قوربانی دانێ بیت کو گەلێ کورد بو دەمێ سەد سالانە بەردەوام کار بو کری . بجە ئینانا ڤان بریارێن کو ھاتینە دان ئەرکێ ھەمی ھێزێن ئێمناھیێ و لێژنێن قایمقامیا و راگەھاندکارا و رێکخراوێن جڤاکێ سڤیلە کو دیفچونێ بو بکەن و خەلکی و حکومەتێ ل وی جھی و کەسی ھشیار بکەن کو پێگیرێ رێنمایا نەبیت و ھەروەسا فەرە دەرمانساز و خوەدی کومپانیا و نوژدار و بەرپرسێن ساخلەمیێ ھەمی ھاریکار بن بو ھندێ کەرتێ ساخلەمیێ ل ڤێ فەوزایا ھەیی دەربازبکەن .