ھەلبژاردن وەک ئێک ژ ستین و پرەنسیپێن دیموکراسیێ و مافێ گەلی ل سەر بریار دانا چارەنیسیێ خوە , د چەند فلتەران را دەرباز دبیت ژ ھەمیان گرنگتر ژی ھەوا ھەلبژاردنانە و نھا خەلکێ کوردستانێ بەرەف پروسا ھەلبژاردنا دچن بو دیاری کرنا نونەرێن خوە ل پەرلەمانێ کوردستانێ کو فەرە دیف یاسا و رێسایێن کوردستانێ ھەمی ئالیەک پێگیر ببیت ب دەم و چاوانیا بانگەشێ .
لیستێن ڤەکری پتر دەرفەت ب دەنگدەری دایە ب ئازادی کەسەکێ ھەژی دەست نیشانبکەت بو ھندێ ببیتە نونەرێ وی , ھەروەسا ژ ئالیەک دیتر ڤە دەرفەتەک باش ژی ب بەربژێری دایە ب ھەمی شیان کار بکەت بو دەست ڤە ئینانا باوەریا خەلکی . لێرەدا ئەو پرس تێـتە روژەڤێ کو ئەم دێ ل گوتارێ دا بەحس ژێ کەین, خەلک ل چ دگەرێت ؟ سیستەمێ سیاسی و جڤاکی و ئابوری و ئولی ھەمی پارتێن سیاسی نەچارکرینە کو دیف نەرینێن دەنگدەری بەربژێران دیار بکەن . نھا ل کوردستانێ دا چو پارتەک نەشێت خوە ژ سنورێن عەشیرەتیێ لابدەت بو دیاری کرنا بەربژێران ژ بەرکو جڤاکێ کوردەواری ب خویندەوار و نەخویندەوار ڤە ھەتا رادەکێ زور پێگیرە ب عشیرەتیێ ڤە . ھەروەسا دیاری کرنا کەساتیێن ئولی ژی بوینە ھژمارەک مەزن ل ڤێ پروسێ ئەو ژی بو وی پێگەھێ وان یێ گرنگ د زڤریت ل ناڤ جڤاکی دا . ھەروەسا میدیاکار و ھونەرمەند و سیاسێن دیار ژی د ڤێ ھەفکێشێ دا خوەدی دەنگن . بەرامبەر ڤێ چەندێ د کوردستانێ وەکی ھەر دەڤەرەکا دی یا عیراقێ و ھەتا روژھەلاتا ناڤین ئیسرائیل تێنەبیت ! ھەمی ل سەر ئاستێ عشیرەتی و ئولی و مەزھەبی و کارێزما و ھێز و دیروکا پارتێ دەنگی ددەن.
ئەم نھا بێین ڤێ پرسێ بکەین , ئەرێ دەنگدەرێ مە ل سەر جادێ چ دڤێت ؟ پشتی ریبریبونا کوردستانێ ب مەزنترین کریزا دارایی ئەو ژی ب ئەگەرێ داکەفتنا بھایێ پترول و ھاتنا ھژمارەکا زورا ئاوارە و پەنابەران ل نافخو و دەرڤە و ئیدارەدانا خراب و قوتکرنا بوجێ کوردستانێ ژ ئالیێ بەغدا ڤە و ھەروەسا کریزێن سیاسی و گەفێن سەربازی و خیانەت و دورپیچێا ل سەر کوردستانێ. نھا ئەڤ سەروبەرە سوپاس بو خودێ ھەتا رادەکێ باش بەرەف تەمام بونە و وەکی سەروکێ حکومەتێ د چەندین جاران دا راگەھاندیە کو کوردستان بەرەف ئایندەیەکێ گەشە و روژێن خوشتر و باشتر و گەشتر ل پێشیا مەنە و ئەڤ کریزە بەرەف داویێ نە . ئەڤ چەندە ل پێش چاڤ ژی دیارە و کاریگەریا کریزان ھەتا رادەکێ کێمتر بویە و خەلکی نھا دڤێت :
- ھەبونا ئێکرێزیێ د ناڤبەرا ھەمی ئالیێن سیاسی دا بو ھندێ زێدەتر کریز ریبریێ وان نەبن و بەردەوام گوتنا وان ئەوە دبێژن (تنێ ھەژار یێ خوسارەتە) ب راستی فەرە بەربژێر و پارتێن کوردستانی ژی ڤێ گوتنێ ب گرنگ وەربگرن و نەھێلن ئەڤ ھەوە و پروسەیە ببیتە فاکتەرێ زێدەبونا لێک دیرکەفتن و پەیدابونا کریزێن سیاسی و ئابوری کوردستانێ دا .
- ل کوردستانێ ھەمیێ بگەرێن چو دەنگدەرەک داخازێ ژ بەربژێران ناکەت میتر و فروکەخانە و تاوەرێن سەدان نھومی و ژیانەکا وەکی سوید و سویسرا ل ڤێ رێ بو ئاڤا بکەن ! لێ کوردستانیان داخازیا سەرەکی کو دکەن ھەبونا خزمەتگوزرایێن سەرەکی یە ژ ئاڤ و کارەب و جادە و خاندن و ساخلەمی . لەوما ب ھیچ ئاوایەکێ یا رەوا نیە کو بەربژێر ب گوتنێن مەزن و دیر ژ ژیواری پێکولا بدەست ڤە ئینانا دەنگێن خەلکێ سادە بدەت. ئەگەر ئەڤرو بەربژێر ب گوتنێن نەراست دەنگان بدەست بینیت ل دەف خەلکی بێ ھیڤی بون دروست دبیت و دگەھیتە رادەکێ باوەری ب وی کەسی و سازیێن دەولەتێ و پروسا سیاسی ژی نەمینیت .
- د سیستەمێ ئابوری دا ل کوردستانێ دا نیزیکی (٣٠%) خەلکێ کوردستانێ موچەخورێن حکومەتێ نە!!! ب راستی ھژمارەکا نە ل ھندستان و نە ل چینێ ھوسانینە! ئەڤی موچە خوری ل بەربژێری دڤێت سوبەھی کار بکەت بو گەرنتی کرنا موچێ وی دیف یاسایێن وەلاتی , ھەروەسا کار بکەت بو ڤەگەراندنا وێ رێژا موچەی کو ھاتیە پاشکەفت کرن ژ بال حکومەتێ ڤە .
- خەلکێ مە د ڤێ ھەلبژاردنادا ل وان کەسان دگەرێت کو بریار دای خو گوری وەلاتی بکەن و خوینا خو بو ئازادی و سەربەخویێ رێشتی بەرامبەر داعش و حەشدێ . ب راستی ئەوان ریدانێن کوبوینە ھوکارێ سەرەکی یێ ماینەڤا کیانێ سیاسی و دەستورێ یێ کوردستانێ دێ خالا ئێک لایکەر بیت د ڤێ ھەلبژاردنێ دا .
- خەلک ل ڤێ ھەلبژاردنێ دا دێ سزا ھندەک ئالیان دەت کو نەشیان ببنە ئەو کەس و بەربژێر و ئالی ئەوێن پێنج سالێن چوی باوەری دایێ . ھەروەسا ل سەر وان کریار و پێنگاڤێن کو ل دەرڤەی ئێکرێزیا ناڤ مالا کوردی ھاتیە ھاڤێتن .
ل داویێ فەرە بەربژێر باش بزانن خەلک ھەمی ب ئێک تون و سوز ناھێنە رازیکرن , بەلکی چەند تەخ و چینن و ب چەند تشتێن جودا رازی دبن و دڤێت کار بو رازیکرن و وەرگرتنا باوەریا وان بکەت بێ بلاڤکرنا پروپاگندە و درەوێن بێ بھا.